Wednesday, August 27, 2014

የኢትዮጵያ ሕዝብ አርበኞች ግንባር፣ የግንቦት 7 የፍትህ፣ የነፃነትና የዲሞክራሲ ንቅናቄ እና የአማራ ዲሞክራሲ ኃይሎች ንቅናቄ የውህደት ስምምነትን በተመለከተ -የዜናው ይዘት፣ የውህደቱ ደረጃ ፣ውህደቱ በምን ያህል ፍጥነት እንደሚጠናቀቅ እና የውህደቱ ዜና በኢትዮጵያውያን እና በውጭ ኃይላት ዘንድ የሚኖረው ትርጉም (የጉዳያችን ጡመራ አጭር ጥንቅር)


ዜናው 

ነሐሴ 19/2006 ዓም ምሽት የኢትዮጵያ ሳተላይት ቴሌቭዥን (ኢሳት) በሰበር ዜናነት የሚከተለውን ዜና አሰማ -
''በስልጣን ላይ ያለውን የኢህአዲግ መንግስት በተለያየ መንገድ ሲታገሉ የነበሩ ድርጅቶች ወደ ውህደት የሚያደርሳቸውን ስምምነት ተፈራረሙ።ስምምነቱን የተፈራረሙት የኢትዮጵያ ህዝብ አርበኞች ግንባር፣ የግንቦት7 የፍትህ፣የነፃነትና የዲሞክራሲ ንቅናቄ እንዲሁም የአማራ ዲሞክራሲያዊ ኃይሎች ንቅናቄ ናቸው።ድርጅቶቹ በጋራ ባወጡት መግለጫ ትግላቸውን በአንድነት አቀናጅተው እንደሚንቀሳቀሱ አስታውቀዋል” ይላል። 
ድርጅቶቹ ያወጡት መግለጫ ይህንን በመጫን ይመልከቱ።
ከእዚህ ጋር ተያይዞ ሰሞኑን የወጡ ዘገባዎች የውህደቱን ደረጃ እና በምን ያህል ፍጥነት እንደሚከናወን የሚገልጡ ናቸው።

የውህደቱ ደረጃ 

ነሐሴ 20/2006 ዓም የግንቦት ሰባት ንቅናቄ ምክትል ሊቀመንበር አቶ አበበ ቦጋለ እና የኢትዮጵያ ሕዝብ አርበኞች ግንባር ሊቀመንበር አቶ መዓዛ ጌጡ የውህደቱን ደረጃ አስመልክተው ለኢሳት ራድዮ በሰጡት መግለጫ የውህደቱ ደረጃ -
1/ ድርጅቶቹ ሙሉ በሙሉ ተዋህደው የቀድሞ ድርጅቶች ከስመው ሶስቱም አንድ ድርጅት እና በአንድ አመራር ስር እንደሚሆኑ፣
2/ አቶ አበበ የግንቦት ሰባት ንቅናቄ ምክትል ሊቀመንበር ቃል በቃል እንዳስቀመጡት ''ዋናው ዓላማ ብሔራዊ የሆነ ነፃ አውጪ ኃይል መፍጠር'' መሆኑን መግለፃቸውን እና 
3/ የሶስቱም ድርጅቶች ሰራዊት በአንድ ዕዝ ስር እንደሚገቡ ገልፀዋል። 

ውህደቱ በምን ያህል ፍጥነት እንደሚጠናቀቅ

የብዙዎች ጥያቄ የሆነው ውህደቱ በምን ያህል ፍጥነት የከናወናል? የሚለው ነው።ለእዚህ ጥያቄ የኢሳቱ ጋዜጠኛ አቶ መሳይ ለአቶ አበበ ቦጋለ የግንቦት ሰባት ንቅናቄ ምክትል ሊቀመንበር ''ምናልባት የውህደቱን ጊዜ በጊዜ ማስቀመጥ ይቻላል?'' በሚል ላቀረበው ጥያቄ አቶ አበበ እንዲህ መልሰዋል -
''.....ይህ ውህደት በዓላማ እና በራዕይ ተመሳሳይ በሆኑ ድርጅቶች መካከል የተደረገ ነው.........አሁን ሂደታችንን በተመለከተ የውህደት ኮሚቴ ተመስርቷል ውህደቱን በወራት ምናልባት ቢዘገይ እሰከመጪው ጥቅምት 30 እንደ ኤውሮፓውያን አቆጣጠር ይጠነቀቃል ብለን እናስባለን.....ውህደታችን በጉልበት፣በገንዘብ እና በንብረት የተሻለ አቅም ይፈጥራል።በሂደትም ከሌሎች ድርጅቶች እንደ ትግራይ የነፃነት ድርጅት ጋር በጥምረትም ሆነ በትብብር የምንሰራበት ሁኔታ ይኖራል'' ብለዋል።

የውህደቱ ዜና በኢትዮጵያውያን እና በውጭ ኃይላት ዘንድ የሚኖረው ትርጉም 

የውህደቱ ዜና በኢትዮጵያውያን ዘንድ ትልቅ መደመምን ፈጥሯል።በርካታ ተቃዋሚ ድርጅቶች በአንድነት መዋሃድ ሲሳናቸው ለዓመታት የሰማ ሕዝብ የሰሞኑ ዜና በትልቅ ብስራትነት ቢመለከት ቢያንሰው እንጂ አይበዛበትም።ይህ ጉዳይ ግን በውጭ ኃይላት ዘንድ የሚኖረው ትርጉም እንደሚለያይ መገመት ብዙም አስቸጋሪ አይደለም።በኢትዮጵያ ላይ ስልታዊ ጥቅም ያላቸው ኃይሎች ካላቸው ጥቅም አንፃር ለውህደቱ የሚሰጡት ትርጉም የተለያየ መሆኑ ሳይታለም የተፈታ ነው።
አንድ ነገር ግን ከወዲሁ ማለት ይቻላል።በተለይ የውጭ ኃይሎችን በተመለከተ።ይሄውም ሁሉም የውጭ ኃይሎች ባላቸው መረጃ የሚያረጋግጡት ጉዳይ አሁን በስልጣን ላይ ያለው ኢህአዲግ/ወይኔ የህዝብ ድጋፍ የራቀው ብቻ ሳይሆን እርስ በርሱም በሙስና፣በርዕዮት ዓለም ቀውስ እና በስልጣን ሽምያ ችግር ውስጥ መሆኑን እና ወደውድቀት እያመራ ያለ መሆኑን ነው።
በሃያላኑ አንፃር ግን ጉዳዩ ከእዚህም እንደሚዘል ይታሰባል።የሄውም የለውጥ ተዋናይ የሆኑት ድርጅቶች  በኢትዮጵያ የሚያመጡት ለውጥ የሃያላኑን ጥቅም በአፍሪካ ደረጃም የሚጎዳ እንዳይሆን ብቻ ሳይሆን የአፍሪካ ቀንድ እና የመካከለኛው ምስራቅ አካባቢ  ካንዣበበባቸው የፅንፈኛ እስልምና ኃይሎች ነፃ መሆኑን ማረጋገጥ ላይ ትኩረት መስጠታቸው አይቀርም።
በመሆኑም ውህደት የፈጠሩት ኃይሎች በዓለም ዓቀፉ የዲፕሎማሲ መድረክ ላይ ተሰሚነትን የማግኘቱን ሂደት የውጭ ኃይሎችን ጥቅም  በማያስደነብር መልኩ ግን ደግሞ የኢትዮጵያን ሉዓላዊነት እና ዘለቄታዊ ጥቅም ባስከበረ አቀራረብ ዓለም አቀፉን ማሕበረሰብ የማማለል እና ኢትዮጵያ ውስጥ ላሉት ፖለቲካዊ ችግሮች በአማራጭ ኃይልነት ቶሎ እራሳቸውን ማቅረብ አለባቸው።ይህ እንግዲህ በሀገር በት ከሚኖረው ዋናው ትግል ጎን ለጎን የሚካሄድ ይሆናል ማለት ነው።

ጉዳያችን 
ነሐሴ 22/2006 ዓም (ኦገስት 28/2014)





የእዚህ ትውልድ የሰላማዊ ትግል ገድል በሚገባ የተገለፀበት ሊመለከቱት የሚገባ አዲስ ልዩ ጥናታዊ ፊልም።የፊልሙ ርዕስ- ‹‹የፀረ ሽብር ህጉ ሰለባዎች ››በፍኖተ ነፃነት ዝግጅት ክፍል የተዘጋጀ

''በጥፍሩም በጥርሱም ለስልጣኑ የሚተጋን መንግስት በሁሉን አቀፍ ትግል መጣል አለብን ብለው ጠብ መንጃ ቢያነሱ ክፋቱ ምን ላይ እንደሆነ አልታይህም እያለኝ ነው፡፡ ለምን በጠብ መንጃ ፍልሚያ ስልጣን መያዝ እንዳለብኝ በግሌ ባይገባኝም አሁን ግን የኢህአዴግ ዓይነት መንግሰት ከደርግ እንዴት እንደሚሻል ማሰብ እያቃተኝ ነው፡፡ የሰላማዊ ትግል ሰራዊት እንዴት እንገንባ ለሚለው ጥያቄ አፋጣኝ ምለሽ ካልሰጠን በስተቀር መንግሰት በግልፅ እየደገፈ ያለው በጠብ መንጃ ሊገዳደሩ የፈለጉት ነው፡፡ በሰላም ያልነውን ሰላም እየነሳን ይገኛል፡፡ መንግሰት ሆይ ሰላም እንድትሆን ሰላም ሰላም ለምንል ዜጎች ሰላም ሰጠን የምር የቀረበ ጥያቄ ነው'' ብቸኛው ተቃዋሚ የፓርላማ አባል የተከበሩ አቶ ግርማ ሰይፉ ሰሞኑን በጡመራ ገፃቸው ላይ ከፃፉት የተወሰደ


ጉዳያችን GUDAYACHN BLOG

Monday, August 25, 2014

''የአፄ ኃይለ ስላሴ ውርስ ጠንካራ እና ሕጋዊ እንደሆነ ቀጥሏል'' የቻይናው ሲሲቲቪ በቅርቡ ከለቀቀው ፊልም ግርጌ ከተፃፈው ማስታወሻ። የቻይናው ሲሲቲቪ ''የአፍሪካ ገፅታ'' በተሰኘው ፕሮግራሙ ''ኃይለ ስላሴ የዘመናዊት ኢትዮጵያ መስራች አባት'' (Haile Selassie: The pillar of Ethiopia) በሚል ርዕስ ስር የሰራው አስደናቂ ጥናታዊ ፊልም ለዘመናችን ባለስልጣናትም ሆነ ትውልድ አስተማሪ ነው።Faces Of Africa - Haile Selassie: The pillar of Ethiopia, part 1 & 2 CCTV (ቪድዮውን ይመልከቱ)

ማንኛውም መሪ መቶ በመቶ ትክክል ሊሰራ አይችልም ግን ከ 80 በመቶ በላይ መልካም ሥራ ቢሰራ የቀረው ''ስህተት'' የተባለውም ለሀገሩ ካለው ፍቅር የሰራው ከሆነ ይህ መሪ ታላቅ ነው።
አፄ ኃይለ ስላሴ ከስልጣን ከወረዱ በመጪው መስከረም 2/2007 ዓም ሙሉ አርባ ዓመት ይሞላቸዋል።ዛሬም ግን ታሪክ እየጎለጎለ የሚነግረን ለኢትዮጵያ ታላቅ ሥራ የሰሩ መሪ መሆናቸውን ነው።
የምዕራቡ ዓለም መገናኛ ብዙሃን ብዙ ብለዋል።እንደ ''ታይም'' አይነት መፅሄቶች''የመቶ ዓመቱ ታላቅ ተፅኖ ፈጣሪ'' ብለው አወድሰዋቸዋል።ለነገሩ የታሪካችን አካል የሆኑ መሪን ማንነት የባዕዳን መገናኛ ብዙሃን እና ፀሐፍያን ሲመሰክሩልን ብቻ የምናምን ሲያብጠለጥሉ ደግሞ ዝቅ የማድረግ አባዜ ሊጠናወተን አይገባም።አፄ ኃይለሰላሴን በኢትዮጵያም ሆነ በአፍሪካ ዘመናዊ ታሪክ ላይ ያላቸውን አሻራ የዘገቡልን በሁሉም ርዕዮተ ዓለም ውስጥ ያሉ ሃገራት መሆናቸው ጉዳዩ ምን ያህል ተአማኒ መሆኑን አመላካች ነው።ለምሳሌ የዛሬውን የታሪክ ዘገባ የቀረበው  የቻይናው ታዋቂው  ቴሌቭዥን ''ሲሲ ቲቪ'' ነው።ቪድዮውን ይመልከቱት።

Haile Selassie I (1892 -1975)
ጉዳያችን GUDAYACHN BLOG