Tuesday, June 13, 2023

ኢቲቪ ሊሸልማትና ለሴት ጋዜጠኞች ምሳሌነቷ በስራዎች ዙርያ ጥናታዊ ፊልም ሊሰራላት የሚገባው ከጋዜጠኛ ብዙ ወንድማገኘሁ ጋር የሀገሬ ቲቪ ያደረገው ቃለ መጠይቅ ክፍል 1 እና 2 ቪድዮ።

ኢትዮጵያን ተራራ እየቧጠጠች፣ቁልቁለት እየወረደች በኢቲቪ ''ተጓዥ ካሜራችን" ፕሮግራም አስተዋውቃለች።ከሀገር ወጥታም ለኢትዮጵያ ስትሟገት ኖራለች።በዘመነ ህወሓት ኢቲቪ ካለጡረታ አስወጣት።ከ20 ዓመታት ስደት በኋላ ሀገሯ ገብታ ከሀገሬ ቲቪ ጋር ቃለ መጠይቅ አድርጋለች። ኢቲቪ በክብር ጠርቶ ሊሸልማት፣ የጋዜጠኝነት ስራዋን በጥናታዊ ፊልም አዘጋጅቶ ምን ዓይነት ድንቅ ሴት ጋዜጠኞች እንዳሉ ለአሁኑ ትውልድ ሴት ጋዜጠኞች ሊያስተምርበት ይገባል።

ከድንቋ ጋዜጠኛ ብዙ ወንድማገኘሁ ጋር ሀገሬ ቲቪ ያደረገው ውይይት ክፍል 1 


ክፍል 2





Friday, June 9, 2023

ጠቅላይ ሚኒስትር ዐቢይ ዳግማዊ አፄ ምንሊክ ኢትዮጵያን በደን ለማልበስ የጀመሩትን በጎ ጅምር በማስቀጠላቸው ሀገራዊም፣ዓለም አቀፋዊ ሽልማት ይገባቸዋል።



  • ማመስገን ''አድርባይ'' በሚያስብልበት ዘመን ላይ ብንሆንም።ይህንን መልካም ስራ ሳያመሰግኑ ማለፍ ግን ፈጽሞ አይቻልም።
  • የዳግማዊ ምንሊክ የደን ልማት
  • አሁን ኢትዮጵያ እያለማች ያለችው የደን ልማት አጀማመር፣
  • የሚተከሉት ችግኞች ቁጥር እንዴት ታወቁ?
  • ዘንድሮ ለመትከል የታሰበው ምን ያህል ነው?

ማመስገን ''አድርባይ'' በሚያስብልበት ዘመን፣መሳደብ ተከታይ በሚያበዛበት ዘመን ላይ ብንሆንም።መልካሙን ስራ ሳያመሰግኑ ማለፍ ፈጽሞ አይቻልም።
  
ይህንን የጉዳያችንን ገጽ የዛሬ 11 ዓመት ስጀምር የመጀመርያ ጽሑፌ የማመስገን ባሕላችን ምን ያህል እንደተጎዳ በሚገልጽ ጽሑፍ ነበር።ለእዚህም ማጠናከርያ የሆነኝን የአዲስ አበባ ንግድ ሥራ ኮሌጅ መምህሬ ዶ/ር ማረው ዘውዴ ክፍል ውስጥ ስለ የማመስገን ባሕላችን የተናገሩት ነበር። የዛሬ 11 ዓመት የመጀመርያው የጉዳያችን ጽሑፍ ርዕስ እና ሊንክ ''የምስጋና አና የ ወቀሳ ባህላችን'' የሚል ነበር።

ዛሬ ላይ ለአንዳንዶቻችን መልካሙን ለማመስገን የሚያሳቅቅ፣መውቀስ (መውቀስ ተገቢ መሆኑ ሳይዘነጋ)፣መሳደብ እና ማጥላላት ግን ብዙ ተከታይ የሚያስገኝበት ጊዜ ነው።ብዙ ወቀሳ ካለ ሊዘለል የማይችለውን መልካሙን እና ዳግማዊ ምንሊክ ከአውስትራልያ ድረስ የበሃርዛፍ ችግኝ እያስመጡ ኢትዮጵያን በደን የማልበስ ግዙፍ ስራ ያስቀጠሉት ጠቅላይ ሚኒስትር ዐቢይን በእዚህ የደን ልማት ስራቸው አለማበረታታት ፈጽሞ አይቻልም።

የዳግማዊ ምንሊክ የደን ልማት

ዳግማዊ ምንሊክ ኢትዮጵያን በደን የማልበስ እቅዳቸው ብቻ አይደለም አስደናቂ የሚያደርጋቸው።ከመቶ ዓመታት በፊት የአካባቢ ጥበቃ ሳይንስ ያላቸው ግንዛቤ እና የመጪው ዘመንን የኃይል ፍላጎት ቀድመው መተንበያቸው ነው።ንጉሱ ከአካባቢ ጥበቃ በላይ አስደናቂ የሚያደርጋቸው ተጨማሪ ሦስት ጉዳዮችም ናቸው።

የእዚህ ጽሑፍ ርዕስ ወደሆነው የደን ልማት ጉዳይ ስንመጣ ንጉሱ ለኢትዮጵያ ያስተዋወቁት የበሃርዛፍ ብቻ ሳይሆን የተለያዩ የአበባ እና የፍራፍሬ ዛፍ ዝርያዎችን (ለምሣሌ የኮክ ፣ የእንጆሪና የወይን ) ከአውሮፓ እያስመጡ አራብተዋል። የባሕር ዛፍ ወደ ኢትዮጵያ በንጉሰ ነገስቱ ወደ ኢትዮጵያ እንዲመጣ አድርገው እንዲራባ ባይደረግ ኖሮ በኢትዮጵያ ላለፉት አንድ መቶ ዓመታት ውስጥ ሊፈጠር የሚችለው የኃይል ክፍተት ቢጠና የንጉሰ ነገስቱ ውሳኔ ምን ያህል ለውጥ እንዳመጣ በሚገባ ለመረዳት ይቻል ነበር።

ከዳግማዊ ምንሊክ በኋላ በንጉሱ ዘመንም ሆነ በወታደራዊ መንግስት ዘመን የደን ልማት ስራ በኢትዮጵያ ተከናውኗል። በተለይ በወታደራዊው መንግስት ዘመን በሀገር አቀፍ ደረጃ ዘመቻዎች ተደርገው አሁን ድረስ የሀገሪቱ አሻራዎች ሆነው የሚታዩበት ማሳያ ቦታዎች አሉ።

አሁን ኢትዮጵያ እያለማች ያለችው የደን ልማት አጀማመር 
  • ሐምሌ 22 ቀን 2011 ዓ.ም 'አረንጓዴ አሻራ' በሚል ዘመቻ ጠቅላይ ሚንስትር ዐብይ አሕመድን ጨምሮ ከፍተኛ ባለሥልጣናትና የተለያዩ አካባቢ ነዋሪዎች በአገር አቀፍ ደረጃ የችግኝ ተከላ መርሐግብር በይፋ ተጀመረ።
  • ከእዚህ ዘመቻ በፊት ጠቅላይ ሚኒስትር ዐቢይ ባዘጋጁት 'ገበታ ለሸገር' የእራት ግብዣ ላይ በሕንድ ተይዞ የነበረውን በመላ አገሪቱ ዛፍ የመትከል ክብረ ወሰን ለመስበር የሚያስችል ዘመቻ ለማካሄድ ማሰባቸውን በንግግራቸው ለመጀመርያ ጊዜ ይፋ አደረጉ።
  • ጠቅላይ ሚኒስትሩ በንግግራቸው "ሕንድ 100 ሚሊዮን ዛፍ በመትከል ክብረ ወሰኑን ይዛለች። እኛ በመላ አገሪቱ ሁለት መቶ ሚሊዮን ችግኝ ለምን አንተክልም?" በሚል አባባል ገልጸውት ነበር።
  • በእዚያው የክረምት ወቅት የክረምት ወቅትም 4 ቢሊዮን ችግኝ ለመትከል በጠቅላይ ሚኒስትር ዐቢይ አሕመድ የሚመራ የሚኒስትሮች ኮሚቴ ተቋቋመ።
  • ለእዚሁ ለሐምሌ 22 ቀን 2011 ዓም የዛፍ ተከላ ዘመቻ በኦሮሚያ 126 ሚሊዮን፣ በአማራ 108 ሚሊዮን፣ በደቡብ ብሔር ብሔረሰቦችና ሕዝቦች ክልል 48 ሚሊዮን፣ በትግራይ ዘጠኝ ሚሊዮን ችግኞች ሊተከሉ እቅድ ተይዞ፣ ቦታ ተመርጦ፣ ጉድጓድ ተቆፍሮ ተዘጋጀ።
  • የአዲስ አበባ ከተማ አስተዳደር በበኩሉ በሁሉም ወረዳዎች 3 ሚሊዮን ችግኞችን ለመትከል የሚያስችለው ዝግጅት አደረገ።
  • "የአራዳ ልጅ ዛፍ ይተክላል" በሚል በትዊተር ላይ የተጀመረ ዘመቻ ተቀጣጠለ። የዚህ ዘመቻ አስተተባሪዎች "ዛፍ መትከል ጤናን መገብየት ነው" በሚል በተለያዩ የአዲስ አበባ አካባቢዎች ዛፍ ለመትከል ጥሪ አቀረቡ።
  • ሐምሌ 22 ቀን በአንድ ጀንበር 200 ሚሊየን ችግኝ ለመትከል ለተያዘው እቅድ 54 ሚሊየን ብር መመደቡ ተግለጸ የሚያስተባብረው ብሔራዊ የቴክኒክ ኮሚቴ ስራውን ማቀላጠፍ ጀመረ።
  • ከተመሰረተ ከ30 ዓመታት በላይ የሆነውና የቀድሞው የኢትዮጵያ ፕሬዝዳንት ግርማ ወ/ጊዎርጊስ መስራች የሆኑበት የኢትዮጵያ የአካባቢና ልማት ማኅበር የረጅም ጊዜ ህልሙ የሆነው ስራ መጀመሩ አስደሰተው ለተግባራዊነቱም ከግንባር ቀደምቶቹ የጠቅላይ ሚኒስትሩ ሀሳብ ደጋፊ ሆነ።
  • በወቅቱ በአዲስ አበባ ዩኒቨርስቲ የዶክትሬት ዲግሪያቸውን በአፈር አጠባበቅ ላይ እየሠሩ የነበሩት አቶ መሀመድ እንድሪያስ ስለ የኢትዮጵያ የደን ሽፋን ማሽቆልቆል በወቅቱ ለቢቢሲ ሲያብራሩ በ1990ዎቹ አካባቢ የአገሪቱ የደን ሽፋን መጠን 15 ሚሊዮን አንድ መቶ አስራ አራት ሔክታር ነበር የሚሉት መምህሩ፤ በ2000 ላይ 13 ሚሊዮን ሰባት መቶ አምስት አካባቢ መሆኑን በመጥቀስ፤ በ2010 ላይ አስራ ሁለት ሚሊዮን ሁለት መቶ ዘጠና ስድስት፤ በ2018 ላይ ደግሞ አስራ ሁለት ሚሊዮን 147 ሔክታር አካባቢ ሽፋን መኖሩ ጠቅሰዋል።

የሚተከሉት ችግኞች ቁጥር እንዴት ታወቁ?

በሐምሌ 22፣2011 ዓም በአንድ ጀንበር 200 ሚልዮን ችግኝ ለመትከል የታቀደው ዕቅድ 300 ሚልዮን ችግኝ በመትከል የህንድን በሦስት እጥፍ የበለጠ ሥራ ተሰርቷል። ጥያቄው ቁጥሩ ትክክል ነው? እንዴት ተቆጠረ የሚለው ጥያቄ ነው። የችግኞቹ አቆጣጠር በተመለከተ 
  • የችግኝ ቆጠራውን በተመለከተ የኢኖቬሽንና ቴክኖሎጅ ሚኒስቴር ኃላፊነት ሲሆን በሥሩም አንድ ቡድን ተቋቁሟል። ቡድኑ የችግኝ ተከላዎችን አቆጣጠራቸውንና ምዝገባቸውን የሚከታተል ነው።
  • በሚኒስትር መስሪያቤቱ የበለጸገ ሶፍትዌር የተተከሉትን ችግኞች በመቁጠር ሂደት ወሳኝ ስራ እንደተሰራ በአንድ ወቅት መስርያቤቱ በሰጠው ማብራርያ ላይ ገልጿል።
  • ሶፍት ዌሩ በዛፍ መትከያ ቦታዎች ላይ የተከላውን ሂደት ለመቆጣጠር የተመደቡ ሰዎች ስልክ ላይ ብቻ የሚሠራ ሲሆን በአካል በመገኘት የቆጠሩትን ችግኝ ብዛት የሚያስተላልፉበት ሥርዓት አለው።
  • በዚህም መሠረት በተመደቡበት ቦታ ላይ ምን ያህል ችግኞች እንደተተከሉ ቁጥሩን ሲያስገቡ ሶፍት ዌሩ በተለያዩ ቦታዎች የሚደርሱትን አሃዞች በማጠቃለል እየደመረ ውጤቱን ይሰጣል። በመጨረሻ ላይም በአጠቃላይ በመላዋ ሃገሪቱ የተተከሉትን ችግኞች ቁጥር ምን ያህል እንደሆነ እንደሚያሳውቅም ቢቢሲ አማርኛ ከአራት ዓመታት በፊት ሰፊ ዘገባ ሰርቶበታል።
  • እዚህ ላይ የሚነሳው ጥያቄ ከተተከሉ በኋላ ምን ያህሉ እንክብካቤ እየተደረገ ነው? ለመትከል የተቋቋመው ግብረኃይል ያህል ለመንከባከብም ህብረተሰቡ እራሱ ሊያቋቁመው የሚገባ ግብረኃይል መኖር አይገባውም ወይ? የሚለው ጥያቄ አሁንም አለ።ከተተክሉት ምን ያህሉ እየጸደቁና የክረምት ዝናብ እስኪመጣ ለምልመው የመቆየት አቅም አዳበሩ? የሚለው በተመለከተ ተአማኒ ጥናት ተደርጎ መቅረብ ያለበት ነው።
ዘንድሮ ለመትከል የታሰበው ምን ያህል ነው?

ሁለተኛው የደን ልማት  ምዕራፍ ትናንት በአፋር ሲከፈት
  • የመጀመርያው የደን ልማት ምዕራፍ ከሐምሌ 22፣2011 ዓም እስከ ዘንድሮ ያለው ሲሆን፣ትናንት ሰኔ 1፣2015 ዓም በአፋር በጠቅላይ ሚኒስትር ዐቢይ፣የክልል ፕሬዝዳንቶች እና የፈረንሳይ፣ጣልያንና ቻይናን ጨምሮ በርካታ በአዲስ አበባ ተቀማጭ የሆኑ ዲፕሎማቶች በተገኙበት የተጀመረው ሁለተኛው ምዕራፍ የደን ልማት (ችግኝ ተከላ) መርሐግብር አራት ዓመታት የሚወስድ ሲሆን በእነኝህ ዓመታት ውስጥ ደግሞ 25 ቢልዮን ችግኞች ለመትከል ስራ ተጀምሯል።
  • በመጀመርያው ምዕራፍም እንዲሁ ከ25 ቢልዮን በላይ ችግኞች መተከላቸው ይታወቃል።
  • በእዚሁ በሁለተኛው ዙር  በሁለተኛው ምዕራፍ የአረንጓዴ አሻራ መርሐ-ግብር 60 በመቶ የጥምር ደን እርሻ ችግኞች፣ 35 በመቶ ደግሞ የደን ችግኞች ሲሆኑ 5 በመቶ ለከተማ ውበት የሚውሉ ችግኞች መሆናቸውን በማስጀመርያ መርሐግብሩ ላይ ጠቅላይ ሚንስትር ዐቢይ አብራርተዋል።
ለማጠቃልል ይህ የደን ልማት ስራ ለኢትዮጵያ የህልውናዋ ወሳኝ እና ቁልፍ ከሆኑት ጉዳዮች ውስጥ ነው።የእዚህ ዓይነቱ ስራ ደግሞ የፖለቲካ እና ፖሊሲ አውጪው አካል የቁርጠኝነት ልክ በሚፈለገው ደረጃ ካልሆነ ተግባራዊ ማድረግ አይቻልም። ለእዚህ ደግሞ ሀሳቡን ከማመንጨት ጀምሮ በተከታታይ ለተግባራዊነቱ የፖለቲካ አመራር ቁርጠኛነት እንዲኖር የጠቅላይ ሚኒስትሩ ትኩረት መስጠት ወሳኝ ለመሆኑ ማንም ሊረዳው የሚገባ ነው። የዓለም አቀፉ ማኅበረሰብ አንዳንድ አክቲቪስቶች ሳይቀሩ የተከሉትን የዛፍ ቁጥር እየቆጠረ በዓለም አቀፍ ደረጃ ሽልማት ሲሰጥ ኢትዮጵያ ለምትሰራው ስራም ሆነ ለጠቅላይ ሚኒስትሩ መስጠት የሚገባውን ያህል እውቅና አለመስጠቱ ብቻ ሳይሆን የዜና ሽፋኖችም ሆኑ በዛፍ የመትከል ስነስርዓት ላይ ለምሳሌ የተባበሩት መንግስታት የአካባቢ ጥበቃ ቢሮ ወይንም ዋና ጸሐፊው ተገኝተው ኢትዮጵያን ማበረታታት ግዴታቸው ነበር። ምክንያቱም ኢትዮጵያ የምትተክለው ለእራሱ መተንፈሻ ብቻ ሳይሆን ለዓለም የአካባቢ ጥበቃ ከፍተኛ አስተዋጾ የሚያደርግ ነው። ለሁሉም ግን ጠቅላይ ሚኒስትር ዐቢይ ዳግማዊ ምንሊክ ኢትዮጵያን በደን ለማልበስ የጀመሩትን በጎ ጅምር በማስቀጠላቸው ሀገራዊም፣ዓለም አቀፋዊ ሽልማት ይገባቸዋል።
=============////==========

ማስታወሻ - 

ለእዚህ ጥንቅር ጉዳያችን ቢቢሲ አማርኛ፣ኢዜአ እና ፋብኮ ዘገባዎች ለመዳሰስ ሞክራለች 


Wednesday, June 7, 2023

''ያንን ጉድጓድ ማን ማሰው? ያ! ሰው። ማን ገባበት? የማሰው።'' ኢትዮጵያዊነትን ቀና ለማድረግ የተኛህ ንቃ! የጀዋር የሌሊት ወፍ ፖለቲካና የኦነግ ሸኔ ኦሮምያን የመገንጠል ቅዠት።


በጅማ ጎዳናዎች ላይ ሰዎች ''አዕምሮውን ስቷል'' የሚሉት እርሱ ግን የራሱ ፍልስፍና እና አስቸጋሪ የህይወት ውጣ ውረድ ላይ ያለፈ ሰው ነው በቀይ ሽብር ጊዜ ለተፈጸመው ግድያ እና እርሱን ተከትሎ ለመጣው እልቂት በእየመንገዱ እየዞረ የሚናገር ሰው ነበር።ታሪኩ እውነተኛ ታሪክ ነው።ስሙ ለጊዜው ይቆይና ሸገር ኤፍኤም ሰሞኑን በስንክሳር ሳምንታዊ መርሐግብሩ ላይ የግለሰቡን እውነተኛ ታሪክ አስደምጦናል።ግለሰቡ በጅማ መንገዶች ላይ እየዞረ ይለፍፍ ከነበረው ውስጥ ''ያንን ጉድጓድ ማን ማሰው? ያ! ሰው። ማን ገባበት? የማሰው።'' የሚለው እዝነ ልቦናዬን የሳበው አባባል ነው።

ኢትዮጵያዊነትን ቀና ለማድረግ የተኛህ ንቃ!

ኢትዮጵያ ላይ ጉድጓድ የማሱባት ሁሉም እራሳቸው ገብተውበታል። ይህ ግን ዝም ብሎ በተዓምር ብቻ የመጣ አይደለም። ለኢትዮጵያ መስዋዕትነት የከፈሉ ለማንነቷ የቆሙ የእውነት ዜጎች ስላሏት ነው።ባለፉት አርባ ዓመታት ውስጥ ብቻ በትንሹ ቆንጽለን ለማስታወስ ብንሞክር ከኡጋዴን በረሃ እስከ የኤርትራ በርሃዎች፣በምጽዋና አሰብ በር ላይ በጨበጣ ውግያ እየተሞሻለቁ ለኢትዮጵያ አንድነት ህይወታቸውን ከሰዉት እስከ የቅርቡ ኢትዮጵያን ለማፍረስ መከላከያ ሰራዊቷ ላይ የተከፈተው የህልውና ዘመቻ ድረስ ሺዎች ለኢትዮጵያ ሞተዋል። ይህች ሀገር በቀልድ የተሰራች አይደለችም።በፌዝ እና በቧልትም የሚዘባበቱባት ምድር አይደለችም። የደም ዋጋ ነች። ሰንደቅ ዓላማዋን  ለመስቀል የሚነዝራቸው የባንዳ አስተሳሰብ ስንኩልነት ያጠቃቸው ሊያናንቋት እንደሚፈልጉት አይደለችም።የማንም ሀገር ህልውና በመሽሞንሞንና በዋዛ ተከብሮ አልኖረም። ኢትዮጵያዊነትም ኢትዮጵያዊነት የሚጠሉትን በማሽኮርመም አይከበርም።

የኢትዮጵያ ህዝብ ኢትዮጵያዊነትን በከፍተኛ ግለት እና ማንነት እንዳያስከብር እንቅፋት የሆነው አንዱ ምክንያት ኢትዮጵያውያንን በጎሳ የመከፋፈል ሴራ ነው። ኢትዮጵያዊነቱን ለማስከበር የተነሳ የእገሌ ጎሳ ፍላጎት ልታሟላ ነው እየተባለ ሲሸማቀቅ ኖሯል።ይህ ደግሞ እንደ ሀገር ከመጉዳት አልፎ ኢትዮጵያን ወደ አደገኛ ቁልቁለት እየመራት ነው። የኢትዮጵያ ህዝብ ከደቡብ እስከ ሰሜን፣ከምስራቅ እስከ ምዕራብ በአንድነት ቆሞ ኢትዮጵያዊነቱን አጽንቶ እንዳይይዝ ምሑራን የተባሉቱ ሳይቀር በኦሮሞ፣አማራ፣ትግራይ ወዘተ የብሔር አስተሳሰብ ውስጥ ተሰንገው የእየብሔራቸው ተንታኞች ሆነው መክነው ቀርተዋል። ኢትዮጵያዊነት በእዚህ ሁሉ መሀል እየተጎሳቆለ እና እየደበዘዘ የመጣ እንዲመስል ሆኗል።ኢትዮጵያዊነት በሰሜን ቢበርድ ደቡብ ያቀጣጥለዋል፣ ምዕራብ ቢያቀዘቅዘው ምስራቅ ይዞት ይነሳል።በሁሉም ዘንድ ግን ኢትዮጵያዊነት እንደ የተዳፈነ ፍም በድንገት እንደቋያ እየተቀጣጠለ ይንቦገቦጋል።ለእዚህ ነው ዘላቂው ኢትዮጵያዊነት እንጂ እንደኩፍኝ የሚጠፋ ነገር ግን ሀገርን አደጋ ላይ የሚጥል የጎሳ ፖለቲካን ጭዳ ማድረጉ አይቀርም። ለእዚህ ግን ከምሑር እስከ ጨዋ፣ከሊቅ እስከ ደቂቅ ኢትዮጵያዊነትን ማቀንቀን እንደገና ማቀጣጠል የሁሉም ኢትዮጵያዊ ግዴታ ነው። እያንዳንዱ ጥቃቅን እንቅስቃሴ ኢትዮጵያዊነትን ለመነቅነቅ የሚደረጉ ማናቸውም እንቅስቃሴዎች፣ጽሑፎች እና ሙከራዎች ሁሉ ላይ የማያዳግም አጸፋዊ ምት ለመስጠት ከሀገር ውስጥ እስከ ባሕር ማዶ ያሉ ኢትዮጵያውያን ከምር ካልተነሳን ኢትዮጵያን ለባንዳና ዱርዬ ሸኔ እና መሰሎቹ አስረክበን የታሪክ ተጠያቂ የመሆን ግዙፍ አደጋ ላይ ነን። 

የጀዋር የሌሊት ወፍ ፖለቲካና የኦነግ ሸኔ ኦሮምያን የመገንጠል ቅዠት።

ኢትዮጵያ ባለፉት አምስት ዓመታት ውስጥ የገባችበት የለውጥ ሒደት ውስጥ ያለፈችባቸው ውጣ ውረዶች ከውጭ የኢትዮጵያ ጠላቶች ብቻ የተፈበረኩ አይደሉም። ኢትዮጵያን ገልብጦ ለመስራት እና የነበረ ታሪኳን አፍርሶ የባዕዳን ተገዢ ለማድረግ የሚሮጡ የራሳችን ወገኖች የጥፋት ድግስ ውጤት ነው። የለውጦቹ ሒደቶች ኢትዮጵያዊነትን እያኮሰሰ መከፋፈል እና የሀሰት ትርክቶችን እያመነዠከ የሚኖር የጀዋር እና የኦነግ ሸኔ ኦሮምያን የመገንጠል ቅዠት ውስጥ በገቡ ሩቅ አላሚ ቅርብ አዳሪዎች ሀገር ታውኳል። የእነኝህ የጥፋት ኃይሎች ሴል በመንግስታዊ መዋቅር ውስጥ ገብቶ ፖሊሲ ለማጣመም ከመሞከር የጸጥታ ኃይሉ በቀጥተኛ ጭፍጨፋ ውስጥ እንዲገባ ሙከራ እስከማድረግ ደርሷል።

የጀዋር ፖለቲካ የሚለው በግለሰብ ስም ተጠቀሰ እንጂ ሃሳቡ በእርሱ አስተሳሰብ ውስጥ ተግተልትለው የሚጓዙ ሁሉ የሚመለከት ነው። ጀዋር ስለ ኦሮምያ ክልል ይጨነቃል ብሎ የሚያስብ ወይንም አጀንዳው የኦሮምያ ክልል የብሔርተኝነት ፖለቲካ የሚመስለው ካለ ተሳስቷል። የጀዋር የፖለቲካ ማኔፌስቶ የሚጀምረውም የሚያልቀውም ሆነ ሙሉ መገለጫው ከእዚህ በፊት '' የሜጫ ንግግሩ'' ተብሎ በሚታወቀው የአሜሪካን ሀገር ንግግሩ የተቋጨ ነው። ኦሮምያን የፈለጋት በእዚሁ ንግግሩ ላይ እንደገለጸው የጽንፍ አክራሪ እስልምና ለማራመድ ከሌላው ክልል በተሻለ የእምነቱ ተከታዮች ይገኛሉ በሚል እና ክልሉ የተሻለ የተፈጥሮ ሀብት ባለቤት ነው በሚል የሚማልሉ አንዳንድ የመካከለኛ ምስራቅ ሀገሮችን የቆየ አጀንዳ ማስፈጸም ብቻ እና ብቻ ዓላም ያደረገ ነው። 

ጀዋር የኦሮምያ ክልል መተራመስ፣የአማራ ክልል ሰላም ማጣት እና የኢትዮጳ ማዕከላዊ መንግስት አለመረጋጋትን እና የኦሮምያ ክልል የመገንጠል ዓላማን ማራገብ እንደ ስልታዊ ማስፈጸምያ እንጂ አንድም የኦሮምያ ብሔርተኝነት መቆርቆር ፍላጎት የለውም። ጀዋር የሌሊት ወፍ ፖለቲካ በለውጡ መሃል ላይ አራምዷል። የሌሊት ወፍ አንድ የቆየ ታሪክ ይነገርላታል። ይሄውም በአንድ ወቅት የሰማይ አዕዋፋት እና የምድር አራዊት ተጣሉ ይባላል።የምድር አራዊት የሰማይ አዕዋፋት መሬት ላይ አያርፏትም፣ውሃም አይጠጡም ምግብም አይበሉም ብለው አመጹ።የሰማይ አዕዋፋት ደግሞ የምድር አራዊት ዝናብ እንዳያገኙ፣ፀሐይ እንዳይሞቁ እንደደመና አጥልተን እንጎዳቸዋለን ብለው ተነሱ።በእዚህ መሃል ታድያ ከምድር አጥቢ እንስሳትም ሆነ ከሰማይ አዕዋፋት የምትመደበው የሌሊት ወፍ የምድር አራዊት እና የሰማይ አዕዋፋት ላስታርቅ ብላ ተነሳች። ሆኖም ግን ለማስታረቅ ተነስታ ሁለቱን ለማጣላት ላይና ታች ሮጠች። ሆኖም ሁለቱም የሰማይ አዕዋፋት እና የምድር አራዊት አንዳቸው ካለአንዳቸው እንደማይኖሩ አውቀው ታረቁ።ሲታረቁ የሌሊት ወፍ ለሁለቱም ታቀብል የነበረው የማጣያ ነገሯ ተገለጠ። ጀዋር በአንድ ወቅት የኦሮምያ አንድነት ምክርቤት ይህንን ሰነድ ፈርሙ፣ ያንን ቅደዱ እያለ መኖርያው ቤት ድረስ እየጠራ ሲያፈራርም ነበር። በሌላ ጊዜ ደግሞ ኦነግ ሸኔን ከኦሮምያ ክልል ጋር ለማስታረቅ ወለጋ ወረድኩ ሲልም ተደምጧል። ሆኖም ግን በሂደት ኦነግ ሸኔም ሆነ የኦሮምያ ክልል ብልጽግና አላመኑትም።የእርሱ አጀንዳ የኦሮምያ ክልል ጉዳይ አይደለም። አጀንዳው ሌላ ነው። ይህ ማለት ግን ከብልጽግናም ሆነ ከኦነግ ሸኔ ከግለሰቡ እና ተከታዮቹ ጋር አይሞዳሞዱም ማለት አይደለም። የሁሉም ጠላት ኢትዮጵያዊነት እና የኢትዮጵያ ያለፈ ታሪክ ጠልነት አገናኛቸው እንጂ አሁንም የጀዋር ግብና መድረሻ አክራሪ መንግስት በኢትዮጵያ ማቆም ነው።ይህንን ደግሞ በግልጽ ወደፊት የበለጠ ፍንትው እያለ የሚመጣ ሃቅ ነው።

ይህ በእንዲህ እያለ የኦነግ ሸኔ እና የጀዋር መንገድ አንድ ሌላ የጋራ ነጥብ ላይም ይገናኛል።ይሄውም የኦሮምያ ክልልን በረጅም ጊዜ መገንጠል እና የራሷ መንግስት ማድረግ ለእዚህም ከወዲሁ ፖለቲካዊ፣ማኅበራዊ እና ምጣኔ ሃብታዊ አደረጃጀት ማጎልበት በሚለው ጉዳይ ላይ ነው። የጀዋር እና የቡድኑ ፍላጎት በኦሮምያ መገንጠል የአክራሪ መንግስት በኦሮምያ ይመሰረታል በሂደት የምስራቅ አፍሪካን በአክራሪ መንግስት ተጽዕኖ ውስጥ ማስገባት እና መስፋፋት ነው። ይህንን ስልት ደግሞ አንዳንድ የመካከለኛ ምስራቅ ሀገሮች ለረጅም ጊዚ ሲያልሙት የነበረው እና የአፈጻጸሙ ሂደት ሲያጠኑት የነበረ ነው። ኦሮምያን የመገንጠል ፍላጎት የለም የሚለው የአንድ ወቅት የጠቅላይ ሚኒስትር አቢይ የፓርላማ ንግግርን እዚህ ላይ ሙሉ በሙሉ ውድቅ ማድረግ ቀዳሚ ጉዳይ ነው። 

የኦሮምያ ክልልል ህዝብም ከወዲሁ ሊያውቀው የሚገባው ይህ ሁሉ በክልሉ ያለው ግርግር መድረሻ ክልሉን መገንጠል ነው። በክልሉ የሚገኙ የሌላ ክልል ተወላጆች ማባረር፣የንግድ ተቋሞቻቸውን ለምሳሌ በሻሸመኔ የተፈጸመው ዓይነት የማውደም ስራ፣የኢትዮጵያ ኦርቶዶክስ ተዋህዶ ቤተ ክርስቲያንን እና መስጊዶችን ማውደም፣የትርክት ታሪክ መፍጠር እና ለማሳመን መሞከር፣የክልሉ ሰንደቅ ዓላማ እና መዝሙር ከብሔራዊ መዝሙር አልቆ ለማሳየት የሚደረገው መጋጋጥ ሁሉ ግቡ ኦሮምያን ለመገንጠል ነው። መገንጠሉን ብሔርተኞቹ ከብሔር አንጻር ሲያዩት ጀዋር እና ቡድኑ ግን ሁሉንም በመጨረሻ አስወግዶ የአክራሪ ጽንፈኛ መንግስት ከተቻለ በኢትዮጵያ ደረጃ ካልተቻለ በኦሮምያ ክልል ደረጃ መመስረት ነው። በእዚህ ፍላጎት ውስጥ የጊዜ ጉዳይ እንጂ የኦሮምያ ክልል የአሁኑ ግፈኛ እና ሙሰኛ ቡድን ጨምሮ የብልጽግና መንግስትም እንዲዳከም እነኝሁ ቡድኖች አብረው ይሰራሉ። የኢትዮጵያ ማዕከላዊ መንግስት መዳከም ብቻ ሳይሆን ኢትዮጵያዊነት ያቀነቅናሉ የሚባሉ የአማራ፣አፋር፣ሱማሌና ጌድዮ ጭምር ሰላም እንዳይኖራቸው እና እንዲታወኩ የኢትዮጵያዊነት አጀንዳ እንዲታወክ ሁሉም ቡድኖች አብረው ይሰራሉ።

መፍትሔዎቹ 

ኢትዮጵያውያን ዋና ግባችን ሊሆን የሚገባው ዛሬም ኢትዮጵያዊነት እና ኢትዮጵያዊነት ብቻ መሆን አለበት። የጀዋር የሌሊት ወፍ ፖለቲካም ሆነ የኦነግ ሸኔ ዓላማዎች ኢትዮጵያዊነትን ማደብዘዝ ነው።ይህንን መሰሪ አካሄድ አለማወቅ ትልቅ ጥፋት ነው። ኢትዮጵያዊነትን አጉልቶ ለማስኬድ ደግሞ አንዳንዶች እነርሱ ስልጣን ላይ ሲመጡ ብቻ የሚሳካ አድርገው ይህንኑ ስልጣን ለመያዝ በሚደረግ ፍትጊያ ውስጥ ብቻ ይጠመዳሉ። የፖለቲካ ስልጣን ማለት ቤተመንግስት መግባት ብቻ አይደለም። በየትኛውም መንገድ ተጽኖ ፈጥሮ ዓላማን ማስፈጸም ነው።ኢትዮጵያዊነትን የማይቀበል እና የማያጎላ መንግስት እንዳይኖረን የግድ ቤተመንግስት መግባት እና ፖሊሲ አውጪ መሆን ብቻ አሁን ባለንበት የ21ኛው ክ/ዘመን ብቸኛው መንገድ አይደለም። የማስፈጸም አቅምን መገንባት እና አሁን ያለውን መንግስት ፖሊሲ አስገድዶም ሆነ አስረድቶ ኢትዮጵያዊነትን ጠብቆ እንዲሄድ ማድረግ ዓይነተኛው መንገድ ነው። የሚወጣውን ጸረ ኢትዮጵያዊ ፖሊሲ መቃወም እና ኢትዮጵያዊ አጀንዳዎች በትክክል እንዲተገበሩ የጎሳ ፖለቲካ እንዲሽቀነጠር ተጽዕኖ የመፍጠር መንገድ በራሱ የፖለቲካ ስልጣን ነው። ይህንንም ከሰላማዊ ትግል እስከ የምሁራን ተከታታይ ሞጋች ጽሑፎች እና ንግግሮች፣ከትምሕርት ፖሊሲው አስጣጥ እስከ የመገናኛ ብዙኃን የእየዕለቱ መልዕክቶች ሁሉ መዳሰስ እና በኢትዮጵያዊነት ቅኝት እንዲቃኙና ትውልድ እንዲያፈሩ ማድረግ ሁሉ የተጽዕኖ መፍጠርያ እና መተግበርያ መንገዶች ናቸው። ኢትዮጵያዊነት አገንግኖ እንዲወጣ እና የጎሳ ፖለቲካን አሽቀንጥሮ ሁሉም በህብረ ብሔራዊ ስሜት ከጎሳ አደረጃጀት የጸዳ እውነተኛ የፌድራሊዝም ስርዓት በኢትዮጵያ ለማምጣት የሞት ሽረት ትግል ያስፈልጋል። ይህ ደግሞ አክራሪ የሌሊት ወፍ ፖለቲከኛን ሴል ከማምከን እስከ የጎሳ ፖለቲካ ሙሰኞች ድረስ ያለውን ትብተባ መበጣጠስ ይጠይቃል።ዛሬም ለአፍታ መዘናጋት አይገባም። ኢትዮጵያዊነትን ቀና ለማድረግ የተኛህ ንቃ! ይህ ግዙፍ ኃይል የተዳፈነ እረመጥ ነው።ሲነሳ ማንም አይስቆመውም።ጀዋርም ሆነ ኦነግ ሸኔ፣የጎሳ ፖለቲካ የተከለው ህወሓትም ሆነ የጽንፍ ኃይሎች ሁሉ በኢትዮጵያ ላይ ጉድጓድ ምሰዋል።ነገር ግን በማሱት ጉድጓድ ገቡ።ነገሩ እንደ የጅማው ምስኪን ''ያንን ጉድጓድ ማን ማሰው? ያ! ሰው። ማን ገባበት? የማሰው።'' እንዳለው ነው። አሁን ኢትዮጵያዊነትን ቀና እናድርገው።የጎጥ ፖለቲካን እንቅበረው። በህብረት ከተነሳን እንችላለን።ነገር ግን በየጎጡ እየተቧደንን ለኢትዮጵያ ጠላቶች ሀገራችንን የማስረከብ አደጋ ላይ ነን።
================//////=============
ቀና በል!
በድምጻዊ ቴዎድሮስ ካሣሁን




Monday, May 22, 2023

መንግስት ከዲፕሎማሲያዊ መፋዘዝ ይውጣ! የአረብ ሊግ በአባይ ግድብ አንጻር የወሰነውን የጸብጫሪነት ተግባር በውጪ ጉዳይ ሚኒስቴር የምላሽ መግለጫ ብቻ የሚበቃ ሊሆን አይገባም።መንግስት ያልሰራው ግዙፍ ስራ ኢትዮጵያን ለአደጋ እንዳያጋልጣት ያሰጋል።

የኢትዮጵያ ውጪ ጉዳይ ሚኒስቴር ዋና መስሪያቤት

  • መንግስት በፍጥነት ሊሰራቸው የሚገቡት አምስት ወሳኝ ዲፕሎማሲያዊ ተግባራት
=========
ጉዳያችን አለርት
=========

የአረብሊግ አንዱ የሚታወቅበት መለያው እንደባዶ ቆርቆሮ ብዙ መጮህ እና ትንሽ ማድረግ ነው።በፍልስጤም እስራኤል ግጭት፣በሊብያ፣የመን እና ሶርያ መንግስታት መፍረስ ላይ ሁሉ ብዙ በመጮህ የሚታወቀው የአረብሊግ ነገር ግን አንድ የጋራ ሰላም አስከባሪ ልኮ በጋራ የቀጠናውን ችግር ሲፈታ አልታየም። ሰሞኑን በሱዳን ጉዳይ ላይም ስብሰባ ተቀምጦ ብዙ ንግግር ሰምቷል። የአረብ ሊግ በውስጡ የተለያየ የመከፋፈል ስንጥቆች ስላሉት በስሜት የአካፋ ያህል የሚናገረውን አንዲት ማንኪያ ያህል የማድረግ ልማድ እንደሌለው ብዙዎች በድርጅቱ ላይ የሚሰጡት ምስክርነት ነው።

ሊጉ በኢትዮጵያ የአባይ ግድብ አንጻር በግብጽ አነሳሽነት አማካይነት ያሳየው ድፍረት ግን እንዲሁ በቀላል የሚታይ አይደለም። የግብጹ ውጪ ጉዳይ ሚኒስትር  ሳማህ ሃሰን ሸሪክ የአባይ ጉዳይ በአረብ ሊግ እያንዳንዱ መደበኛ ስብሰባ ላይ ቋሚ አጀንዳ እንዲሆን አስደርገዋል።የውጭ ጉዳይ ሚኒስትሩ የረጅም ጊዜ የዲፕሎማሲ ልምድ ያላቸው ግለሰብ ናቸው።የዛሬ ሦስት ዓመት ጉዳያችን ስለግለሰቡ ማንነት የጻፈችውን በእዚህ ሊንክ ላይ ያንብቡ።

የአረብ ሊግ መደበኛ ስብሰባውን ባደረገ ቁጥር የአባይ ግድብ ጉዳይን እያነሳ መፈትፈቱን የኢትዮጵያ መንግስት እንደዋዛ ሊመለከተው አይገባም። ባሕር ተሻግረው የኢትዮጵያ ወንዞች ጉዳይ ይመለከተናል የመካከለኛ ምስራቅ ጉዳይ ነው የሚለው የአረብ ሊግ የድፍረት ድፍረት ወሳኝ የሆነ አጸፋዊ የዲፕሎማሲያዊ ምት ይፈልጋል። ለእዚህ ደግሞ ኢትዮጵያ አቅሙም ሆነ ብቃቱ አላት። ነገር ግን ጉዳዩን እንዴት ማስተናገድ እንዳለባት መንግስት የተረዳ አይመስልም። የአረብ ሊግ በኢትዮጵያ የውስጥ ወንዝ ጉዳይ ላይ ውሳኔ ማሳለፉ የሰሞኑ ዜና ነው። የኢትዮጵያ መንግስትም ዛሬ በውጭ ጉዳይ ሚኒስቴር በኩል መግለጫ አውጥቷል። ከመግለጫው በላይ ግን ከዲፕሎማሲያዊ መፋዘዝ ወጥቶ መንግስት በፍጥነት ሊሰራቸው የሚገቡ አምስት ተግባራት አሉ።


የውጪ ጉዳይ ሚኒስቴር ለአረብ ሊግ ውሳኔ ዛሬ የሰጠው ምላሽ

መንግስት በፍጥነት ሊሰራቸው የሚገቡት አምስት ወሳኝ ዲፕሎማሲያዊ ተግባራት:

1/ የአፍሪካ ሀገሮችን የውሳኔው አደገኛነት እንዲገባቸው ማድረግ፣ ጉዳዩን ወደ አፍሪካ ሕብረት መርቶ ተጻራሪ መግለጫ ማሰጠት እና የዲፕሎማሲ ጉዞ ወደ አፍሪካ ሀገሮች መላክ።በእዚህ አንጻር የሚከተሉት ተግባራት መንግስት መከወን ይችላል።
  • የጠቅላይ ሚኒስትር ዐቢይ ልዩ መልዕክት የያዘ ደብዳቤ ለአፍሪካ ሀገራት የሚያደርስ ከፍተኛ ልዑክ መላክ እና የአረብ ሊግ ጣልቃ ገብነትን ኢትዮጵያ ፈጽሞ የማትቀበለው ብቻ ሳይሆን በአፍሪካውያን ላይ የተቃጣ የቅኝ ግዛታዊ መንፈስ መያዙን ማሳየት፣
  • ለአፍሪካ ቀንድ ቀጣይ የጸጥታ ስጋት መሆኑን በሚገባ ማስረዳት፣
  • የአፍሪካውያን ጉዳይ በራሳቸው በአፍሪካውያን በግብጽ እና ኢትዮጵያ መካከል የሚታይ እንጂ የሌሎች ጣልቃ ገብነትን እንደማይቀበሉ የአፍሪካ ሀገሮችን ማግባባት እና ይህንኑ እንዲገልጹ ሰፊ ዲፕሎማሲያዊ ዘመቻ ማቀጣጠል፣
  • የአፍሪካ ሕብረት የአረብ ሊግን ውሳኔ እንዲቃወም ኢትዮጵያ ከፍተኛ ተጽዕኖዋን በድርጅቱ ላይ ማሳየት አለባት፣
  • ኢትዮጵያ የአፍሪካ ሕብረት መቀመጫ እንደመሆኗ መጠን የአፍሪካ ሕብረት ላይ በእዚህ ጉዳይ ከፍተኛ ተጽዕኖዋን ማሳየት አለባት። በሕብረቱ ስብሰባዎች ላይ የአረብ ሊግ የአፍሪካን ሉአላዊነት መዳፈሩን ደጋግማ መንገር አለባት።በመቀጠልም ኅብረቱ የአረብ ሊግን ውሳኔ በሌላ ውሳኔ እስኪሽር ድረስ ዲፕሎማሲዋን አጠናክራ መቀጠል አለባት።
2/ ኢትዮጵያ የአረብ ሊግን አካሄድ ለተመድ፣ የአውሮፓ፣የአሜሪካ፣ቻይና፣እስራኤልና ሩስያ መንግስታት እንዲቃወሙት የዲፕሎማሲ ዘመቻ ማጠናከር አለባት።
  • በጠቅላይ ሚኒስትሩ የተላከ ልዩ መልዕክት ለሀገራቱ  እና ለተመድ ዋና ጸሐፊ በልዩ ልዑክ ተልኮ መስጠት እና ጉዳዩ የሉአላዊነት ጉዳይ መሆኑን ማስረዳት እና ሀገራት አቋም እንዲወስዱ መወትወት፣
  • አሁን በመካከለኛው ምሥራቅ አንጻር ያሉትን የሀገራቱን አሰላለፍ ተመልክቶ በበቂ ሁኔታ አስልቶ መንቀሳቀስ
3/ የአረብ ሊግ አባል ሀገር የሆኑ ጎረቤቶቻችን ጂቡቲ፣ሱማሊያና ሱዳን የድርጅቱን ውሳኔ በብርቱ እንዲቃወሙ የጠነከረ ዲፕሎማሲያዊ ዘመቻ ማድረግ፣ ያሉትን የተጽዕኖ መንገዶች ሁሉ መጠቀም እና

4/ የአረብ ሊግ ውሳኔ ምን ያህል የኢትዮጵያን ሉአላዊነት የተጻረረ እንደሆነ ለኢትዮጵያ ህዝብ በሚገባ መግለጽ።
  • አስገራሚው ጉዳይ የአረብ ሊግ ውሳኔ በሚገባም የምሬት አቀራረብ የመንግስት መገናኛዎች ለኢትዮጵያ ህዝብ አልነገሩትም። ይህ መታረም ያለበት ነው።
  • የመንግስትም ሆኑ የግል መገናኛ ብዙሃን በሚገባ ጉዳዩ ምን ያህል የሉዓላዊነት ጥሰት እንደሆነ መግለጽ እና የኢትዮጵያ ህዝብ ቁጣውን እንዲገልጽ ሊደረግ ይገባል። ይህ በራሱ የዲፕሎማሲው አንዱ አካል ነው።
5/ የአረብ ሊግን ውሳኔ በመቃወም ኢትዮጵያውያን ዲያስፖራዎች በውጭ ሃገር አጠቃላይ የተቃውሞ ሰልፍ በመላው ዓለም ሊያደርጉ እና ለሚመለከታቸው ዓለም አቀፍ ድርጅቶችም ሆነ መንግስታት ማሳወቅ አለባቸው። በተመሳሳይ በሀገር ውስጥም ኢትዮጵያውያን አደባባይ ወጥተው ሊቃወሙትና የሉዐላዊነቱን አደጋ በሀገር ውስጥ ያለው ህዝብ በሚገባ እንዲረዳው መደረግ አለበት።

ባጠቃላይ የአረብ ሊግ ውሳኔ ኢትዮጵያ በብርቱ ልትቃወመው እና በቀላሉ ልታየው የሚገባ ጉዳይ አይደለም። ከመካከለኛው ምስራቅ ጋር ኢትዮጵያ ባላት ስልታዊ አቀማመጥ ብቻ ሳይሆን ባላት የህዝብ ብዛት እና ታሪካዊ ሃይማኖታዊ ዳራ ሳይቀር ኢትዮጵያን ለማጥፋት የሚፈልጉ አንዳንድ የመካከለኛው ምስራቅ ሀገሮች ኢትዮጵያ በአባይ ግድብ አንጻር የምታደርገውን መንሰራራት እንደ የራሳቸው ስጋት አያዩትም ማለት ሞኝነት ነው። ኢትዮጵያን ለማጥቃት ደግሞ እንደ አንድ ምክንያት ሊጠቀሙበት የሚፈልጉት በማይመለከታቸው የአባይ ጉዳይ እጃቸውን ለመንከር እንዳሰፈሰፉ በሚገባ እያሳዩን ነው። በቀጣይ ዓመታት የሚኖረው የዓለማችን የኃይል አሰላልፍ ደግሞ የአካባቢ ጉልበተኞች በአካባቢያቸው ያሉ ደካማ ሀገሮች የመውረር ስልት እንደሚይዝና የዓለምም የጸጥታ ስጋት እንደሚሆን የሚናገሩ ቀላል አይደሉም። ከመካከለኛው ሀገሮች ጋር ግብጽ የገባችው የወታደራዊ ስምምነቶች ደግሞ በአረብ ሊግ ስም አንዳንድ የመካከለኛው ምስራቅ ሀገሮች ኢትዮጵያን በወታደራዊ ኃይልም ጭምር ለማጥቃት አይቃዡም ማለት አይቻልም። ስለሆነም የኢትዮጵያ መንግስት የአረብ ሊግን ውሳኔ ከመግለጫ ባለፈ በጠነከረ የዲፕሎማሲ ምት መመለስና አስተማሪ እንዲሆን የማድረግ ስራውን ከላይ በተጠቀሱት አምስት መንገዶች ቢከውን ጠቃሚ ነው። ጉዳዩ ለኢትዮጵያ ህዝብ በሚገባ ጎልቶ ያልተገለጸበት ምክንያትና ዲፕሎማሲውን በሚገባ አድምቶ እንዳይሰራ በራሱ በመንግስት መዋቅር ውስጥ ያዘናጉት ካሉም እራሱን ይፈትሽ። ጉዳዩ ግን በምንም መለኪያ አደገኛ የሉዐላዊነት ድፍረት ነው።

======================///////==================

Saturday, May 20, 2023

ጎሳንና የፖለቲካ ተጽዕኖን መሰረት ያደረገ የጵጵስና ሹመት በመስጠት ቤተክርስቲያን የሲሞን መሰሪን መንገድ አትከተልም።

  • ቤተክርስቲያን ጳጳሳትን የምትሾመው የፖለቲካው አውድ እንዲፈነጥዝ ወይንም ይህኛው ጎሳ ደስ እንዲለው ሌላው እንዲከፋው አይደለም።
=========
ጉዳያችን ምጥን
=========

ሲሞን በሰማርያ ይኖር የነበረ አስማተኛ ሰው ነበር፡፡ ሕዝቡም የሚያደረገውን ምትሐት እያዩ ይከተሉት ነበር በኋላ ግን በፊልጶስ ትምህርት አምነው ሲጠመቁ እሱም ተጠመቀ፡፡ በኢየሩሳሌም የነበሩ ሐዋርያት በሰማርያ ያሉ ሰዎች የእግዚአብሔርን ቃል መቀበላቸውን ሲያውቁ ቅዱስ ጴጥሮስንና ቅዱስ ዮሐንስን ላኩበቸው፡፡ እነርሱ እጃቸውን በመጫን በሕዝቡ ላይ የመንፈስ ቅዱስን ጸጋ አሳዳሩባቸው፡፡ ይህንን ያየ ሲሞን መሰሪንም ብዙ ገንዘብ አምጥቶ እኔም እጅን የሚጭንበት ሰው መንፈስ ቅዱስ እንዲያድርበት ይህንን ሥልጣን ስጡኝ አለቸው ፡፡ ቅዱስ ጴጥሮስም ‹‹የእግዚአብሔርን ሥጦታ በገንዘብ ልትገዛ አስበሃልና ገንዘብህ ከአንተ ጋር ይጥፋ›› አለው፡፡ ሙሉ ታሪኩ በመጽሐፍ ቅዱስ የሐዋርያት ሥራ ምዕ 8፣18-23 ላይ ይገኛል።

ይህ የመጽሐፍ ቅዱስ ታሪክ የሚያስተምረን ሁለት ቁምነገር አለ። አንዱ መንፈስ ቅዱስን ለማታለል የመሞከር ተግባር ሰይጣናዊ እንጂ መንፈስቅዱሳዊ እንዳልሆነ ሲሆን ሌላው ይህንኑ በገንዘብ እና በሌላ ጥቅማዊ መንገድ የእግዚአብሔርን ሹመት ለማግኘት መሞከር በሐዋርያት ዘመንም ታይቶ ነገር ግን በመንፈስ ቅዱስ የሚመሩት ሐዋርያት እንዴት እንደተዋጉት ያሳየናል።

በኢትዮጵያ ኦርቶዶክስ ተዋሕዶ ቤተክርስቲያን ቅዱስ ሲኖዶስ የሚመራው በመንፈስ ቅዱስ ነው።ጌታችን መድሐኒታችን ኢየሱስ ክርስቶስ ከዋለበት እየዋሉ እና ካደረበት እያደሩ የተማሩት ሐዋርያት የመጀመርያ ቅዱስ ሲኖዶስ ጉባኤያቸውን በ50 ዓም ካደረጉ ጀምሮ ከእዚያ ቀድሞም ጌታችን መድሐኒታችን ኢየሱስ ክርስቶስ ለቅዱስ ጴጥሮስ የሰጠው ስልጣነ ክህነት  መሰረት የኢትዮጵያ ኦርቶዶክስ ተዋሕዶ ቤተክርስቲያንም ሆነች ምስራቃውያን የኦርቶዶክስ አብያተክርስቲያናት በጳጳሳት ሹመት ሂደት ላይ የመንፈስ ቅዱስ ሥራ ብቻ እንዲሆን እና ምንም ዓይነት የፖለቲካ፣የዘር፣የገንዘብ እና ሌላም  ተጽዕኖ እንዲኖረው አይፈቀድም። ይህ መንፈስ ቅዱስን በውጪያዊ ተጽዕኖ ለማግኘት የሚሞክር ሁሉ የሲሞን መሰሪያዊ መንገድ የተከተለ ተደርጎ ይወሰዳል።

ሰሞኑን የኢትዮጵያ ኦርቶዶክስ ተዋሕዶ ቤተክርስቲያን እያካሄደች ያለው የርክበካሕናት ጉባኤ ላይ ከቀረቡት አጀንዳዎች ውስጥ በጎሳዊ እና ፖለቲካዊ አድመኝነት የቤተክርስቲያኒቱን ቅዱስ ሲኖዶስ ለመክፈል የሞከሩ እና በኋላም በመግባባት ወደ ቅዱስ ሲኖዶስ ጉባኤ የተመለሱት ሶስቱ ጳጳሳት በሕገወጥ መንገድ የሾሟቸውን አሁን በቅዱስ ሲኖዶስ በሚገባ ሳይመረመሩ እና የሚገባቸውና የማይገባቸውን ቤተክርስቲያን ከሐዋርያት ጉባኤ ጀምሮ የምትመረምርባቸውን የመንፈስ ቅዱሳዊ መንገዶች በመግፋት እንዲሾሙ የሚገፉ ደፋሮች እያየን ያለበት ጊዜ ነው። ይህ ሲሞን መሰሪያዊነት ነው።ፈጽሞ ተቀባይነት የለውም።

ቤተክርስቲያን ጳጳሳትን የምትሾመው የፖለቲካው አውድ እንዲፈነጥዝ ወይንም ይህኛው ጎሳ ደስ እንዲለው ሌላው እንዲከፋው አይደለም።ማንም ማን ቢሆን መንፈስ ቅዱስ የሚሾመውን ከሁሉም የሀገሪቱ ክፍል በእኩል ዓይን አይታ፣መርምራ እና ጸሎት አድርጋ ትሾማለች እንጂ በሆያሆዬ እና የፖለቲካ ትኩሳት ለማብረድ የምትሾምበት የጳጳሳት አሿሿም መንገድ የለም።ይህንን ቤተክርስቲያኒቱን በቅርበት የማያውቁ ፖለቲከኞች ጠንቅቀው ሊያውቁት የሚገባ እና በእንቢተኝነት ቤተክርስቲያኒቱን ለማዋከብ ከሞከሩ የሲሞን መሰሪ የተሰጠ ቅጣት ለእነርሱም እንደሚተርፍ ሊረዱት ይገባል።


Thursday, May 4, 2023

በአማራ ክልል ያለው ወቅታዊ ሁኔታ በመመካከር፣በመግባባትና በሽምግልና ብቻ ነው የሚፈታው።በአማራ ክልል ጸብ ከምታባብሱ የመረጃ አዛቢዎች በላይ የአማራም ሆነ የመላዋ ኢትዮጵያ ሕዝብ ጠላት የለም።


 

በአማራ ክልል ያለው ወቅታዊ ሁኔታ ፈጽሞ ወደ የደም ማፋሰስ ሊያመራ የሚገባው ጉዳይ ሊሆን አይችልም። ህዝብም ሆነ መከላከያ ፈጽሞ ምንም ዓይነት ግጭት እንዲፈጠር ፍላጎት ብቻ ሳይሆን የሚያጋድል በቂ ምክንያት አለመኖሩንም ጭምር ያምኑበታል። ይህም ሆኖ ግን ከውጪ ሆነው በአማራ ህዝብ ላይ ጦርነት እንዲነሳ ግፋ በለው የሚሉ እና በሰራዊቱም ውስጥ መንግስት አላስፈላጊ እርምጃ እንዲወስድ እና ህዝብ በመከላከያ ላይ ቅሬታ እንዲኖረው የሚፈልጉ ይጠፋሉ ማለት አይቻልም። ከእዚህ በተጨማሪ የኢትዮጵያን የጸጥታ መደፍረስ ከሱዳን ጋር ተያይዞ ምስራቅ አፍሪካን ለማበጣበጥ የሚፈልጉ ደግሞ የራሳቸውን የቤት ሥራ አይሰሩም ማለት አይቻልም።

የመረጃ አዛቢዎች መከላከያን ሊያጠቅ የመጣ ታጣቂ እንዳለ ይነግሩታል። በሌላ በኩል ደግሞ መከላከያ የሆነ ብሔር ወክሎ የመጣ አድርገው የመከላከያን ቁመና ለማውረድ የሚሞክሩ ደግሞ ሕዝቡን በሌላ አቅጣጫ ለማስደንበር ይሞክራሉ።ከእዚህ ሁሉ ጋር ደግሞ እራሱ መንግስት ከመጀመርያው የልዩ ኃይልን ወደ መደበኛ ሰራዊት የማስኬድ ሂደት አስመልክቶ መንግስት ከአማራ ክልል ጋር ያደረገው የኮሚኒኬሽን መንገድ መልክ ባለው አካሄድ አለመሆኑ ሌላው አሁን ላሉት አለመግባባቶች ያደረሱ ናቸው።

ኢትዮጵያውያን የራሳቸውን መከላከያ አይገድሉም።መከላከያም ለሀገር ሕልውና የቆመን የመግደል ፍላጎት የለውም። ይህ በእንዲህ እያለ ግን የመረጃ አዛቢዎች በተለያዩ የማኅበራዊ ሚድያ ገጾች እየተጠቀሙ በተከታታይ የሚለቋቸው መረጃዎች የሰራዊቱን አመራሮችንም ሆነ ከህዝቡ የወጡ ታጣቂዎችን የማስደንበር ሥራ በመስራት ነገሮች ከሚገባ በላይ እንዲጋጋሉ የማድረግ እኩይ ተግባር ላይ ተጠምደዋል።

 አሁን የተጀመሩ የሽምግልና እና ወደ ሕጋዊ የመግባባት መስመር የመምጣት ሂደቶች በጎንደር በጥሩ ደረጃ ተጀምሯል። ነገ ጧትም ከመከላከያ ጄነራሎች እና የሕዝብ ታጣቂዎች መሃል ቀጠሮ ተይዟል። ዛሬ ከቀትር በኋላም የመከላከያ ጄነራሎችም ሆኑ ታጣቂዎች በተማመነ መንገድ መነጋገራቸው ነው የተሰማው። ከእዚህ በፊትም በሰሜን ወሎ ተመሳሳይ መነጋገር ተደርጎ ጉዳዩ በመግባባት ካለቀ በኋላ አሁንም የመረጃ አዛቢዎች የተወሰኑትን ለማስደንበር መሞከራቸው ይታወቃል።

የአማራ ክልል የጦርነት አውድማ እንዲሆን የሚፈልጉ የተለያዩ ፍላጎት ያላቸው የውስጥም ሆነ የውጭ ኃይሎች መኖራቸው የታወቀ ነው። ሆኖም ግን አማራን እንወክላለን የሚሉም ሆኑ የአማራ ህዝብ እንደተቀረው የኢትዮጵያ ሕዝብ በ21ኛው ክ/ዘመን ወደ የተሻለ እድገት እንዲሻገር ይህ እርባና የለሽ እና የራስ የሆነ የቀኝ እጅ መከላከያን በመቁረጥ የአማራ ክልልም ሆነ መላው የኢትዮጵያ ሕዝብ የሚያተርፈው አንዳች ነገር የለም። ስለሆነም በሁሉም አካባቢዎች ያሉ የሀገር ሽማግሌዎች፣የኃይማኖት አባቶች እና የንግዱ ማኅበረሰብም ጭምር በታጣቂዎች እና በመከላከያ መሃል በመሸምገል እና ሁሉንም ጉዳይ በህጋዊነት መልኩ እንዲያልቅ በማድረግ ሰላም የግድ መምጣት አለበት። በመንግስት በኩልም የሕዝብ ባሕላዊ ዕሴቶችን የማወቅ እና የማክበር ጉዳይም በአሁኑ የአማራ ክልል በተነሳው አለመግባባት ውስጥ መኖሩን ማመን አለበት። የወታደራዊ መንግስት እስከወደቀበት ጊዜ ድረስ የወልቃይት ህዝብ፣የቦረና የቀድሞ ሲዳማ፣አፋር እና የሱማሌ ቆላማ ቦታዎችን ላይ መሳርያ የመግፈፍ ሥራ ሙሉ በሙሉ ያልፈጸመው ይህንኑ የአንዳንዳ አካባቢዎች የባሕላዊ ዕሴቶች ዋጋ ስለሚያውቅ መሆኑም መረዳት ያስፈልጋል። በአማራ ክልልም ያለው ሁኔታም በደንብ መታየት ያለበት እና በሀገሪቱ ሕግ የመሳርያ ማስመዝገብ ሕግ ላይ አጥብቆ መስራት እና ሌሎች የጸጥታ ህጎች ላይ መስራት ይገባል። የነፍስ ወከፍ መሳርያዎች በተመለከተ ግን በኢትዮጵያ ሕግ መሰረት መመዝገባቸው በቂ መሆኑን ቢያንስ በእዚህ ጊዜ በደንብ መረዳት ያስፈልጋል። አሁንም ግን በአማራ ክልል ጸብ ከምታባብሱ የመረጃ አዛቢዎች በላይ የአማራም ሆነ የኢትዮጵያ ሕዝብ ጠላት የለም። ሰላም፣መረጋጋት እና መከላከያን በጋራ ማጠናከር የአማራ ክልልም ሆነ የሁሉም ኢትዮጵያውያን የውዴታ ግዴታ ነው። በመከላከያም ሆነ በህዝቡ መሃል ሆነው የመረጃ መዛባት የሚፈጥሩ ቢያንስ የህዝብ ስቃይ እንዲታያችሁ ወደ ህሊናችሁ ተመለሱ።

==============/////===========
 

Wednesday, May 3, 2023

ጠቅላይ ሚኒስትር ዐቢይን አንዳንዶች ለማጣጣል በምትሞክሩት ደረጃ ዕውን ሀገር አጥፍቷል? እናንተ ጠቅላይ ሚንስትር ብትሆኑ ኢትዮጵያ የገጠሟትን ችግሮች እንዴት ነበር የምትፈቷቸው?



==========
ጉዳያችን ምጥን
==========

ጠቅላይ ሚንስትር ዐቢይ አሕመድ ለኢትዮጵያ በመስራት፣በማሰብ እና አዳዲስ ሀሳቦችን በማፍለቅ ባለፉት አምስት ዓመታት ውስጥ ኢትዮጵያ የሔደችባቸው መንገዶች የፈተና እና የችግር ብቻ እንዳይሆኑ ትልቅ ድርሻ ተወጥተዋል። ይህንን ዕውነታ መጋረድ ምን ያህል አሳዛኝ እና ኢፍትሃዊነት እንደሆነ አይገባኝም። ጠቅላይ ሚኒስትር ዐቢይ ገና ለፓርላማ ንግግር ሳያደርጉ ጀምሮ ከኋላ ታሪካቸው በመነሳት በከፍተኛ ተስፋ ከደገፉት ውስጥ ነኝ። ጠቅላይ ሚኒስትሩን በዓይን ፊት ለፊት ያየኋቸው በኦስሎ የኖቤል ሽልማት ለመቀበል በተገኙበት የኦስሎ ማዘጋጃቤት አዳራሽ ተገኝቼ ሽልማታቸውን ሲቀበሉም ሆነ ታሪካዊ ንግግራቸውን ሲያደርጉ በዝግጅቱ ለመታደም በገጠመኝ ዕድል ጊዜ ነው። ከእዚህ ውጪ የማያቸውም የምሰማቸውም በመገናኛ ብዙኃን ነው። 

ጠቅላይ ሚኒስትሩ እንደማንም ሰው ከስህተት ነጻ እንደማይሆኑ አምናለሁ። በኢትዮጵያ ጉዳይ ላይ የሆነውን ሁሉ ለእኔ አዎን! ለእኔ መለኪያዬ እርሳቸው  በዘር እና በጎሳ ፖለቲካ እንዲሁም ለ27 ዓመታት በነቀዘ አስተዳደር የተጎሳቆለች ኢትዮጵያን መረከባቸው እና እርሳቸው ወደ ስልጣን ከመጡ በኋላ ይህች በተቋማቷ ብቻ ሳይሆን በአካቢያችን እና በአፍሪካ ደረጃ የተጎሳቆለ ጥግ ላይ የቆመች ሃገር እንዴት ከግራ እና ከቀኝ የነበረውን መጓተት  አንዴ ወደ አንዱ ሌላ ጊዜ ወደሌላው እየተጎተተ ሃገር ሲንገላታ እርሳቸው ያንንም ያንንም ለመያያዝ እየደከሙ የሄዱበት አስቸጋሪ መንገድ ሁሉ ሲታሰብ በእርሳቸው ቦታ ብንሆን ምን ነበር የምናደርገው? የሚለው ከማሰብ በመነሳት ነው።

አዎን! ጠቅላይ ሚኒስትሩ የሕግ ማስከበር ላይ ችግሮች እስኪያድጉ የመጠበቅ እና አንዳንድ ጉዳዮች ለምሳሌ የኢትዮጵያ ኦርቶዶክስ ተዋህዶ ቤተክርስቲያን የሲኖዶስ የመክፈል ሙከራ ላይ መጀመርያ የያዙበት አያያዝ እና ሌሎች ላይ የፈጠሩት ክፍተት በደንብ ይገባኛል። ለእኔ አልገባህ ያለኝ አንዳንዶች ጠቅላይ ሚኒስትሩ ሆን ብለው ሀገር የማፍረስ ዓላማ ያላቸው አድርገው የሚያቀርቡት ብቻ ሳይሆን መንገዳቸው የጎሳ ፖለቲካ አዋጪ ነው ብለው የሚያምኑ አድርገው የሚያቀርቡት ኢተአማኔ የሆነው ጉዳይ ነው። የጻፏቸው የመደመር መጽሐፍ ላይ የጎሳ ፖለቲካ እንደማያዋጣ ብቻ ሳይሆን መደመር ብቻ አማራጭ እንደሆነ በሚገባ ተንትነው ገልጸው ጽፈውታል። አንድ ሰው ያላመነበትን በእዚህን ያህል የተብራራ እና ከውስጥ ፈንቅሎ በወጣ ስሜት ስለ መደመር እንዴት ይጽፋል?

ለኢትዮጵያ አንድነት ቤተመንግስቱ ትቶ ዘመቻ ለሔደ፣ የኢትዮጵያን ቤተመንግስት ለማደስ ለሰራ ብቻ ሳይሆን የቀደሙትን ነገስታት ሙዜም ላስቀመጠ፣ በጦርነት ብቻ ሳይሆን ኢትዮጵያን ካቆመ ብሎ ለሰላም ደም ከተቃባቸው ጋር በሰላም አብሮ ገበታ ለተቀመጠ፣ የዓባይ ግድብ ብቻ ሳይሆን መከላከያ፣አየር ኃይል፣የትምሕርት ፖሊሲን፣የወደቀውን የልማት ባንክ፣ የተዳከመው የኢትዮጵያ ፕሬስ ድርጅት እና ሌሎችን የኢትዮጵያ ተቋማት መልሶ ለማቆም ሥራዎችን በመስራት ዓይነተኛ ለውጥ ላመጣ መሪ የምንሰጠው የማጥላላት ደረጃ ዕውን ሰውየውን የሚመጥን ነው? ዐቢይ ዕውን ማኅበራዊ ሚድያው ብቻ ሳይሆን አንዳንድ በኢትዮጵያ ፖለቲካ ላይ ሃሳባቸውን የሚሰጡ ፖለቲከኞች እንደሚሉት ነው? ነው ወይንስ ለእኔ የማይታየኝ ለሌላው የሚታየው ሌላ ዓለም አለ? 

እዚህ ላይ አሁንም እደግመዋለሁ። ጠቅላይ ሚኒስትሩ በሸኔ አንጻር እና የሸኔ ጽንፈኛ በኦሮምያ የስልጣን መዋቅር ውስጥ ገብተው እንደፈለጉ ሲሆን ወሳኝ እርምጃ አለመውሰዳቸው በተመለከተ አሁንም የእኔም ቅሬታ ነው። ይህም ሆኖ ግን ይህንን በዓላማ እና በተንኮል ኢትዮጵያን ለመጉዳት ብለው ነው ብዬ ሳይሆን እሳቸው ችግር ይፈታል የሚሉበት የራሳቸው ዓለም ውስጥ የገቡ ሆኖ ይሰማኛል።በእዚህ ሁሉ ሂደት ላይ ከወለጋ በተፈናቀሉት አንጻር እና አሁንም የኦሮምያ ክልል በአዲስ አበባ ዙርያ እና በአዲስ አበባ ነዋሪዎች ላይ እያደረሰ ያለው ግፍ ዙርያ የወሰዱት እርምጃ አለመኖሩ ሌላው ተጠቃሽ የመንግስታቸው ተአማኒነት ብቻ ሳይሆን ብዙ ሕዝብ ተስፋ እንዲቆርጥ ያደረገው ነው። 

ይህ በእንዲህ እያለ፣
  • ጠቅላይ ሚኒስትሩ ወደስልጣን ባይመጡ ኖሮ ወደኋላ አምስት ዓመት እንሂድ እና በኦሮምያ እና በአማራ መካከል የነበረው የዚያን ጊዜ ውጥረት ወዴት ይደርስ ነበር? እዚህ ላይ የዛሬ አምስት ዓመት የነበረውን የለውጡ ሂደት ሲጀመር የነበረውን አውዳሚ አካሄዶች ሁሉ እናስታውስ።
  •  እርሳቸው በሔዱበት ደረጃ በደረጃ ስልጣን የመረከብ አካሄድ ባይኬድበት ኖሮ ህወሓት ስልጣኑን ይለቅ ነበር?
  • የዓባይ ግድብ በተዝረከረከበት ሁኔታ አሁን ያለበት ደረጃ ይደርስ ነበር?
  • ተዳክመው የነበሩት የኢትዮጵያ ቁልፍ ተቋማት መከላከያ፣አየር ኃይል፣የልማት ባንክ፣የትምሕርት ፖሊሲ፣ የክክሎች የፌድራል መንግስት አካል መሆን፣ የሱማሌ የአብዲኤሊ የመገንጠል ሙከራ አደጋ፣ ከኤርትራ ጋር የተሻሻለው ግንኙነት፣የህወሃት የዙር ጦርነት እና የሃገር ህልውና አደጋው፣ቆይቶም ወደ እርቁ ለመምጣት የተሄደበት ሂደት ሁሉ የመሪው የነገሮችን አጠቃላይ ሁኔታ የመረዳት አቅም ውጤት አይደለም?
በመጨረሻ ባለፉት አምስት ዓመታት ኢትዮጵያ የገጠሟትን ፈተናዎች ሁሉ እኛ ጠቅላይ ሚኒስትር ብንሆን የቱን አስቀድመን የቱን እናስከትል ነበር? እስኪ እራሳችንን እንጠይቅ። ፈተናዎች ነበሩ። አዎን! እጅግ የሚያሳዝኑ ፈተናዎች አልፈናል። እነኝህ ፈተናዎች ግን እኔ እስከሚገባኝ ድረስ ጠቅላይ ሚኒስትር ዐቢይ ወደ ስልጣን ባይመጡም የሚቀሩ ፈተናዎች አይደሉም።ይልቁንም ክልሎች አሁን ከምናየው በላይ የተመሳቀለ አደጋዎች ውስጥ እንገባ እንደ ነበር ነው የሚገባኝ። በትንሹ የሱማሌን የአብዲ ዔሊ የመገንጠል ሙከራ በራሱ ለኢትዮጵያ ትልቅ አደጋ ይዞ ይመጣል። ጠቅላይ ሚኒስትር ዐቢይ በአቅም፣በርዕይ እና በአፈጻጸም ፍጥነት እና ጥራት እንዲሁም ክትትል የሚታማ መሪ አይደለም። ሰውየው አንድ ነው። አስር አይደለም። በብዙ ችግር በታጠረች እና ሀገሪቱን ለማጥፋት የ24 ሰዓት ጊዜ ወስደው በሚሰሩ የውጭ እና የአካባቢ ሀገሮች ውስብስብ መንገድ ውስጥ ብቻ ሳይሆን ከውስጥ ሆነን የሚሰራውን ብቻ ሳይሆን ሲያነጥስ ሁሉ ተንኮል አለበት እያልን ነገር በመጎንጎን የማናሰራው ሁሉ ተደምረን እና እነኝህን ሁሉ ተቋቁሞ መስራት በራሱ አንድ እራሱን የቻለ ፕሮጀክት ነው። እስኪ ከመተቸት እና ከማብጠልጠል በላይ ይህ የኢትዮጵያ የጋራ ጉዳያችን ነው ብለን ያገዝነው ሥራ ምንድን ነው? በህልውናው ዘመቻ የነበረውን ተሳትፎ ሳንጨምር ማለት ነው። በህልውና ዘመቻ የብዙዎች ርብርብ ስለነበር።

አሁንም በአዕምሮዬ ያለው ጥያቄ ጠቅላይ ሚኒስትር ዐቢይን አንዳንዶች በእዚህ ደረጃ ለማጣጣል የምትሞክሩትን ያህል ሀገር አጥፍቷል? እናንተ ጠቅላይ ሚንስትር ብትሆኑ እነኝህን ችግሮች እንዴት ነበር የምትፈቱት? የሚለው ነው።
አንዳንዴ ጠቅላይ ሚኒስትር ሆኖ ወጥ ሲጨልፍ ስናየው፣መንገድ ሲጠርግ ስንመለከት ሌላው ቀርቶ በመሪ ደረጃ ዝናብ ሲመጣ ዣንጥላ ሳያስይዝ እራሱ ይዞ እና ዝቅ ብሎ ስናየው እንደፈለግን ለመተቸት ተመቸን መሰለኝ። ስንወቅስ እና ስንተችም ኢትዮጵያዊ ጨዋነት የሚባል ነገር አንርሳ እንጂ! የሰፈራችንን የዕድር ሊቀመንበር የምናከብርበትን ክብር ሰጥተን ከእዝያ የሚሰማንን መውቀስ የወግ ነው። ሰውየው ግን በማኅበራዊ ሚድያ በሚሉት ደረጃ የሀገር አጥፊ ነው ብሎ ማመን ከቀላል አመክንዮ የመራቅ ችግር ብቻ ነው።ለሁሉም ጊዜ እና ታሪክ ያሳየናል። ይህም ሁላችንም ዕድሜ ካደለን ነው።ባጭሩ የአንዳንዶቻችን አወቃቀስ መሰረተ ቢስነቱ ቢብስብኝ ነው ይህንን ለማለት የተገደድኩት።
=========================////===========