Friday, April 10, 2020

የእናት ፓርቲ በኮሮና ቫይረስ ወረርሽኝ ወቅትና ከወረርሽኙ በኃላም ከግንዛቤ መግባት አለባቸው ያላቸው ጉዳዮች በተመለከተ ባለ ሦስት ነጥብ የመፍትሔ ሃሳቦች የያዘ ደብዳቤ ለጠቅላይ ሚኒስትር ዓቢይ አህመድ ላከ።(የደብዳቤውን ሙሉ ይዘት ይዘናል)


በቅርቡ የተመሰረተው እና ከከፍተኛ ምሁራን ባለሙያዎች እስከ ገበሬዎች ድረስ በሁሉም የኢትዮጵያ ክፍሎች አባላት እንዳሉት የሚነገረው የእናት ፓርቲ ለጠቅላይ ሚኒስትር ዓቢይ አህመድ የኮሮና ቫይረስ ወረርሽኝን አስመልክቶ ሶስት የመፍትሄ ሃሳቦች የያዘ ደብዳቤ ዛሬ ሚያዝያ 2፣2012 ዓም መላኩን ጉዳያችን ተረድታለች።የደብዳቤው ሙሉ ይዘት ከእዚህ በታች ያንብቡ። (ፎቶ ኮፒው በጥራት ካልተነበብልዎት፣ከኮፒው ስር በጥራት የተለጠፈውን ያንብቡ)


===========================
ለክቡር ዶ/ር ዐቢይ አህመድ
የኢፌዴሪ ጠቅላይ ሚኒስቴር
አዲስ አበባ 
ጉዳዩ፡- ኢትዮጵያዊ እሴቶቻችንን ተጠቅመን ከመጣብን መዓት እንውጣ 

የኖብል ኮሮና ቫይረስ(CoVID-19)በይፋ መገኘቱ ከተገለፀበት ዕለት ጀምሮ በዓለም አቀፍ ደረጃ በቫይረሱ የተያዙ ሰዎች ቍጥር ቀስ በቀስ እያሻቀበ ሄዶ 1.5 ሚሊዮን ደርሷል፤ የሟቾችም ቍጥር ከ80 ሺህ አልፏል፡፡ በሀገራችንም የታማሚዎች ቍጥር ከ50 እንዳለፈ ታውቋል፡፡ ማኅበረሰባችን ወደ ጤና ተቋማት ሄዶ የመመርመር ባህሉ በሽታ በእጅጉ ሲፀናበት ብቻ መሆኑና የምርመራ ማእከላት አነስተኛ ከመሆናቸው የተነሳ የተመረመረው ሰው ቍጥር አነስተኛ በመሆኑ በቫይረሱ የተያዘው ሰው ቍጥር በኦፊሴል ከሚነገረው ከፍ ሊል እንደሚችል መገመት አዳጋች አይደለም፡፡ ካለን የምጣኔ ሀብት እድገት፣ አነስተኛ የሐኪሞች ቍጥር፣ ውስን የመመርመሪያ መሣሪያ ላይ የጠነከረ ማኅበራዊ መስተጋብር ሲጨመርበት የችግሩ ስፋት 
ያስጨንቃል፡፡ 
አሁን በጤናችን በኩል የመጣ ጠላት ጋር ጦርነት ውስጥ ነን፡፡ መሽነፍ ደግሞ የኢትዮጵያውያን ባህል አይደለም፣ ሥነልቡናችንም አይፈቅድም። ይህ ከሆነ መጪው ትውልድ ይታዘበናል፤ ታሪክም ይፈርድብናል፡፡ በዚህ ረገድ ሌሎች ሀገራት ይህን ጦርነት ከመቆጣጠር አኳያ የዘየዱትን መላ መመልከት ተገቢ ሲሆን የወረርሽኙ መነሻ የሆነችው ቻይና፣ በኋላም ጃፖን እንዴት አድርገው ወረርሽኙ በተከሰተበት ግዛት እንዲገደብ ብሎም በከፍተኛ ሁኔታ እንዲቀንስ እንዳደረጉ ትምህርት መውሰድ ያሻል፡፡ 
ወረርሽን ከአፍሪካ አህጉር አንጻር ሲታይ እጅግ ፈታኝ መሆኑ አሌ አይባልም። የአኗኗር ዘይቤ፣ የማኅበረሰብ ቁርኝት፣ የጤና ሽፋን፣ የሐኪምና ታማሚ ምጣኔ፣ የሕክምና መሣሪያ እጥረት ባለበት ሁኔታ ምን ያህል አደጋ ሊሆን እንደሚችል መረዳት መረዳት አያዳግትም። በዚህ አስቸጋሪ ወቅት እኛ አፍሪካውያን በአጠቃላይ እና ኢትዮጵያውያን በተናጠል የምንኮራባቸው ለሌሉቹም አህጉራት ተምሳሌት ሊሆኑ የሚችሉ የማኅበረሰብ እሴቶች አሉን፡፡ ለምሳሌ ደቦ፣ እድር፣ ድርጎ፣ ኡቡንቱ፣ ... የመሳሰሉ እምቅ እሴቶች ማኅበረሰቡ ከሚመጡበት ማንኛውም ችግርና አደጋ በመተሳሰብ፣ በመረዳዳት፣ በአንድነት ለአንድ የጋራ ዓላማ የሚቆምበት ዘመን ጠገብ መሣሪያዎቹ ናቸው፡፡ 
አህጉራችንም ሆነ ሀገራችን ከገጠማቸው ችግር ለመውጣት የመንግስት ድርሻ ከፍ ያለ መሆኑ ቢታወቅም እነዚህን እሴቶች በአግባቡ መጠቀም የገጠመንን ፈተና ለመወጣት የምናደርገውን ጥረት በእጅጉ ይረዳል፡፡ ወረርሽኙ ከዚህ ቢሰፋ የሚያስከትላቸው አሉታዊ ተጽዕኖዎች እንደ የቤት ኪራይ መጨመር፣ የገበያ ዋጋ መናር፣ የደሞዝ መቋረጥ፣ የቤት መልቀቅ፣ የሚላስ የሚቀመስ ማጣት ሆነ ሌሎች ተያያዥ ችግሮች በኢትዮጵያዊ እሴቶቻችን የሚፈቱ ጉዳዮች ናቸው፡፡ የማኅበረሰባችን ችግር በማኅበረሰባችን መፍትሔ ያገኛል የሚለው እሳቤ ዘለቄታዊ መፍትሔ ከማምጣቱ ባሻገር ማኅበረሰቡ ጉዳዩን በባለቤትነት እንዲይዘው ያደርጋል ብለን እናምናለን፡፡ ለዚህም፡ 
በመጀመሪያ ወረርሽኙ በሀገር አቀፍ ደረጃ እንዳይስፋፋና ከቁጥጥር ውጭ እንዳይሆን የበሽታውን ሥርጭት ባለበት መገደብ ያሻል፡፡ ከዚህ አኳያ በሀገር አቀፍ ደረጃ የሚተገበር በባለሙያዎች የተጠናና ያለውን ነባራዊ ሁኔታ በውል ያገናዘበ እንቅስቃሴን የመገደብ ሥራ /Declaring Total Lock-down/ ያስፈልጋል፡፡ ይህ ሲሆን ግን የማኅበረሰቡን የመኖር ሕልውና ማገናዘብ አለበት እንላለን፡፡ወደተግባር ሲገባም ከእጅ ወደአፍ ኑሮ የሚገፋው ማኅበረሰብ በእጅጉ ይጎዳል፡፡ በዚህ ጊዜ ኢትዮጵያዊ እሴቶቻችን በተግባር ማዋል ለመጫው እጅጉን ይጠቅማል፡፡ በዕለት ምግብ እርዳታ ለማለፍ የሚገደዱ ዜጎች ቍጥር በየቀበሌው በአስቸኳይ በስልክ እንዲመዘገብ ወይንም ጎረቤቱ እንዲያስመዘግበው ማድረግ፡፡ በሌላ በኩል ደግሞ ገደቡ በሚጸናበት ጊዜ ሁሉ የአንድን ሰው የዕለት ምግብ ፍጆታ በየዕለቱ መሸፈን የሚችለውን የኅብረተሰብ ክፍል እንዲሁ መመዝገብ ያስፈልጋል፡፡ ይህ ሥራ ሕዝቡ የዕለት ምግብ ፍጆታ በማበርከት በየቀኑ መትጋትን ሲጠይቅ መንግሥት የራሱን ተሽከርካሪዎች ጨምሮ በጎ ፈቃደኛ ባለመኪናዎችንና ሌሎች ማጓጓዣ ስልቶችን በማስተባበር የዕለት ምግብ እርዳታው ከለጋሾች ወደሚፈለግበት ማድረስን መደበኛ ሥራ ማድረግ ይጠይቃል፡፡ 
በሁለተኛ ደረጃ ዘመናዊውን ሕክምና ከሀገር በቀሉ የዳበረ የሕክምና ጥበብ ጋር በማጣመር መፍትሔ መሻት ነው፡፡ እንደእኛ ዓይነት ነባር እውቀትና በባህል ሕክምና ለሺህ ዓመታት ሲሠራበት ለኖረ ማኅበረሰብ የጊዜውን ትሩፋት መጠበቅ እንዳለ ሆኖ እገረ መንገዱን ነባሩን እውቀትና አዋቂዎች መዝገብ ገለጥ ገለጥ ማድረግ ለነገ የሚባል አይደለም፡፡ አዳፍነነው ስለኖርን ይህ እንኳን መንገዱ ረጅም ነው ቢባል ከየባህሉና መልክዓ ምድሩ የሚበቅሉ ለእንዲህ ዓይነት ወረርሽኝ መታገያ አቅም የሚሆኑ አዝርእትን አፈላልጎ የትግሉ አካል ማድረግ ተገቢ ነው፡፡ በዚሁ አጋጣሚ የባህል ሕክምና ሕግና ሥርዓት ተበጅቶለት ከዘመናዊው ሳይንስ ጋር ተቀናጅቶ የሌላው ወገን ይሁንታ እንዳለ ሆኖ ሲያዋጣን ግን በፍጥነት መጠቀሙ አስፈላጊ ነው፡፡ 
ሦስተኛው ይህ ጊዜ ሲያልፍ /Post Corona/ የምንሆነው ከአሁኑ መታሰብ አለበት፡፡ የሀገሪቱ ምጣኔ ሀብት፣ የአልሚው ሁኔታ፣ የማኅበረሰቡ ሥነልቡና፣ የአምራች ኃይሉ የመሥራት ፍላጎት፣ የሸማቹ ፍርሃት፣ የተማሪው የመማር ዝግጁነት፣ ዳግም ማኅበራዊ ቅርርብ፣... ወዘተ በተጎዳ ሥነልቡናና እንደአዲስ በሚጀመር አኳኋን ነው የሚመለሱት፡፡ ይህም የችግሩ አካል እንደሚሆን አድርጎ ማሰብና ከወዲሁ ትልቅ ሥራ መሥራትን ይጠይቃል፡፡ ለዚህም የሃይማኖት ተቋማት የሰውን ሥነልቡና ከፍ በማድረግና ባለበት ሁኔታ ከፈጣሪው ጋር በማገናኘት የሚወጡት ሚና ቀላል አይሆንምና የተጀመረው ሀገር አቀፍ ጸሎት መልካም ሆኖ አሁንም የፖኬጁ አካል የሚሆኑ ቀሪ መርሐ ግበሮች (በክርስትናው ቅዳሴ፣ የሰንበታት አምልኮዎች፣ የሰሙነ ሕማማት ክዋኔዎች፣ በእስልምናው እንደ ጁምዐ ሰላት፣ የረመዳን ጾም ክዋኔዎች) በብሔራዊ ቴሌቪዥን ጣቢያዎች የቀጥታ ሥርጭት ሽፋን እንዲያገኙ ማድርግ አስፈላጊ ነው፡፡ በሌላ በኩል የሥነልቡና አዋቂዎች፣ የፍልስፍና ምሑራን፣ ተደማጭ ኢትዮጵያውያን ጊዜና ሁኔታው ተመቻችቶላቸው ወደመድረኩ እንዲመጡ፣ ጉዳይ ተኮር ሥራ እንዲሠሩ ማድረግ ጊዜው የሚጠይቀው ነው፡፡ የምጣኔ ሀብት ምሑራን፣ በችግር ጊዜ መውጫ ሀሳብ ያላቸውን እነአባ መላን ይዞ ነገ የሚሆነውን በትክክል በመተንበይና መውጫ መንገዱንም በመተለም የምጥ ስሩን ማሳጠር አለብን፡፡ 
ክቡር ጠቅላይ ሚኒስቴር
ይህን የመጣብንን ታላቅ ፈተና ለመሻገር መላ ማበጀት በእርስዎና በዙሪያዎ ባሉ ባለሥልጣኖች ጫንቃ ላይ ብቻ እንዳልወደቀ ፖርቲያችን ጠንቅቆ ይረዳል፡፡ እንዲያውም እኛን ጨምሮ ብዙ ከፊት ተሰልፈው የአቅማቸውን በማድረግ የጦርነቱ ፊታውራሪ መሆን የሚችሉ ወጣቶች ስላሉ ሊኮሩ፣ ሊጠቀሙባቸው እንደሚችሉ ስንነግርዎት በደስታና ቃል በመግባት ጭምር ነው፡፡ ሆኖም በታሪክ አጋጣሚ የዚህች ውድ ሀገራችን አመራር በእርስዎ እጅ በወደቀበት በአሁኑ ወቅት ዛሬ ለብዙዎች መዳን ወይም እልቂት ነገ ስምዎ በወርቅ ቀለም ሊፃፍ ወይንም የታሪክ ተወቃሽ ሊያደርግዎ የሚያስችል ሥራ የሚሠሩበት ጊዜ ነው፡፡ ስለሆነም የሕዝባችንን የዳበረ እሴት ተጠቅመን ሀገራችን ከተጋረጠባት ጦርነት በድል ተሻግራ ብሩህ ነገን የምታይ እንድትሆን ሁሉም ሓላፊነቱን እንዲወጣና አስፈላጊው እርምጃ በአስቸኳይ እንዲወሰድ ባለብን የዜግነት ግዴታና እንደ አንድ የፖለቲካ ፓርቲ እናሳስባለን፡፡ 
ፈጣሪ ኢትዮጵያን ይጠብቅ 

ኃይለኢየሱስ ሙሉቀን (ዶ/ር) 
ፕሬዚዳንት  
. 
ግልባጭ : 
- ለሁሉም መገናኛ ብዙኃን አካላት ባሉበት 




Tuesday, April 7, 2020

ከዓለም ጤና ድርጅት ፕሬዝዳንት ከዶ/ር ቴዎድሮስ አድሃኖም ጎን እንቆማለን!

  • ዶ/ር ቴዎድሮስ ላይ ጣታቸው የሚቀስሩት አንዳንድ የምዕራብ ሚድያዎች ዋና ምክንያት ምንድነው?
  • በጃፓን የኤርትራ አምባሳደር በዶ/ር ቴዎድሮስ አንፃር የሚፅፉት ትውቴር ያሉበትን ቦታ አይመጥንም 
==============
ጉዳያችን ሚድያ፣ኮሚኒኬሽን እና ምክር አገልግሎት 
Gudayachn Multimedia, Communication and Consultant

ሰሞኑን አንዳንድ ሰዎች ከምዕራብ አገሮች ጭምር በዓለማችን ላይ ለተከሰተው የኮሮና ቫይረስ ወረርሽኝ ተከትሎ የዓለም ጤና ድርጅት የአመራር ድክመት እንዳለበት ለመናገር ሲሞክሩ ይሰማሉ።የዓለም ጤና ድርጅት ግን የሚጠበቅበትን ስራዎች በሚገባ እየተወጣ ነው።ከድርጅቱ የሚጠበቁት ሁለት መሰረታዊ ተግባራት ማለትም በወቅቱ የበሽታውን መከሰት ለመላው ዓለም ማስታወቅ፣በየወቅቱ ያለበትን ሁኔታ መንገር፣ አስፈላጊውን የባለሙያ ምክር እና የማስተባበር ሥራ መስራት ነው።በእዚህ መልክ ዶ/ር ቴዎድሮስ አድሃኖም በሽታው ከመከሰት አንስቶ ወደ ወረርሽኝ ደረጃ ሲቀየር የዓለም አገሮች ከምር የሆነ ርምጃ እንዲወስዱ አምርረው  በማስታወቃቸው  አገሮች ጉዳዩን ከምር እንዲመለከቱ አድርገዋል።ከእዚህ በተረፈ እንደ ፕሬዝዳንት ትራምፕ ያሉ መሪዎች በራሳቸው የዝግጅት መዘግየት ምክንያት መወቀሳቸው የዓለም ጤና ድርጅትን አይመለከትም።

በአሁኑ ጊዜ በዓለም የጤና ድርጅት ፕሬዝዳንት ላይ በትዊተር ሳይቀር የስም ማጥፋት ዘመቻ ላይ የተሰማሩት በጃፓን የኤርትራው አምባሳደር እስጢፋኖስ  ናቸው።የዓለም አቀፍ ድርጅት ፕሬዝዳንት ዓለም አቀፍ የዲፕሎማሲ ከለላ ያለው በሌላ በዲፕሎማት ደረጃ ያለ ሰው በትዊተር የሚፅፉቸው ጉዳዮችም ውስብስብ ትርጉም እንዳለው ይታወቃል።

አምባሳደሩ የድርጅት ቁርሾን ወደ ዓለም አቀፍ ዲፕሎማሲ መድረክ ባይወስዱት ጥሩ ነው።አምባሳደሩም ሆኑ ዶ/ር ቴዎድሮስ ያሉበት የአሁኑ ቦታ ከድርጅት ቁርሾ ያለፈ ትልቅ አፍሪካዊ ብሎም ዓለም አቀፋዊ ቦታ መሆኑን አምባሳደሩ ሊገነዘቡት ይገባል።







በዶ/ር ቴዎድሮስ አድሃኖም ላይ የተከፈተው የአንዳንድ የምዕራብ አገሮች ዘመቻ መነሾ ምንድነው?

የኮሮና ወረርሽኝ ከተከሰተ በኃላ ዶ/ር ቴዎድሮስ ተከታታይ መግለጫዎች ከሰጡበት ውስጥ ሁለቱ መግለጫዎች አንዳንድ የምዕራብ ባለስልጣናትን አላስደሰተም።ይሄውም የቻይና እና የሰሜን ኮርያ እየወሰዱ ያሉት እርምጃ በሽታውን በተሻለ መንገድ ለመከላከል እየረዳ መሆኑ መግለጣቸው ነው።እርሳቸው የገለጡት ሂደቱን ነው።ሂደት ደግሞ ተለክቶ ተሰፍሮ የሚቀመጥ ምክንያታዊ  ጉዳይ ነው።እንዳሉትም የሂደቱ ውጤት ደግሞ አሁንም እየታየ ነው።ሁለቱ አገሮች ብቻ ሳይሆኑ ሲንጋፖርም በጥሩ ሂደት እንዳለች እና ውጤቷም የተሻለ እንደሆነ ተመዝግቧል።መልካም የሰሩ አገሮችን ማመስገን በአንዳንድ የምዕራብ ሚድያዎች አንፃር እንደወንጀል እየተቆጠረ ይመስላል።በሌላ በኩል ወረርሽኙን በቻይና አሜሪካ የነበረ የምጣኔ ሃብት ቁርሾ አንፃር ለመጠቀም ዶ/ር ቴዎድሮስ ያልተመቿቸው አንዳንድ የምዕራብ ሚድያዎች አሉ።


የእዚህ ጽሁፍ አቅራቢ እንደናሙና የሁለት የቢቢሲ ዓለም አቀፍ ዘገባዎችን ተመልክቷል።የመጀመርያው ዶ/ር ቴዎድሮስ የኮርያ እርምጃ መልካም መሆኑን የገለጡበት መግለጫ እንደተላለፈ የቢቢሲ ዘጋቢ የዶ/ር ቴዎድሮስ መግለጫ ''non diplomatic'' (ዲፕሎማሲያዊ ያልሆነ መግለጫ) ስትል አዳምጧል።ዲፕሎማሲያዊ ያልሆነ ያስባለው በወቅቱ የምዕራቡ ዓለም በተለይ አሜሪካ ከሰሜን ኮርያ ጋር ያላቸውን ግንኙነት አላገናዘበም ለማለት እንደሆነ መረዳት ይቻላል።የምዕራቡ ዓለም በተለይ አሜሪካ  ለዓለም አቀፍ ድርጅቶች ዳጎስ ያለ ገንዘብ እንደማዋጣቷ ተፅኖ ማሳረፍ ካላስቻላት ገንዘቡ ይቆጫታል።ይህንን ደግሞ በዩኔስኮ መረዳት ይቻላል።አሜሪካ ከዩኔስኮ ለቃ የወጣችው ድርጅቱ የአሜሪካንን ፍላጎት የሚያሟላ አንቀፅ ባለማፅደቁ ነው። ዩኔስኮ አገራት በዘረፋም ሆነ በማናቸውም መንገድ ከሌሎች አገሮች የዘረፉት ቅርስ መመለስ እንዳለባቸው ያምናል። በእዚህ የዓለም ጤና ድርጅት አንፃርም ኮርያን ማመስገን ያስወቅሳል። ሌላው ዶ/ር ቴዎድሮስ ቻይናን በሰበብ አስባቡ አለመውቀሳቸውም የምዕራቡን ዓለም ያስከፋ ሌላው ጉዳይ እንደሚሆን መገመት ይቻላል።ይልቁንም በመጀመርያ አካባቢ ቻይና በሽታውን በተመለከተ እየወሰደች ላለው እርምጃ ማመስገናቸው ለአንዳንድ የምዕራቡ ባለስልጣናት ሌላው ራስ ምታት ነበር።

የዓለም ጤና ድርጅት ባለስልጣን እና የቢቢሲው ጋዜጠኛ 


ከአራት ሳምንታት በፊትም የእዚህ ጽሁፍ ፀሐፊ  ከአንድ የዓለም ጤና ድርጅት ከፍተኛ ባለስልጣን ጋር የተደረገውን  የቢቢሲ ''ሃርድ ቶክ'' ቃለ መጠይቅ ተከታትሏል።እዚህ ላይም በዶ/ር ቴዎድሮስ ላይ ምክንያት ፍለጋ ቁፋሮ እንዳለ መመልከት ይቻላል።

ጋዜጠኛው = የዓለም ጤና ድርጅት ፕሬዝዳንት ዶ/ር ቴዎድሮስ አድሃኖም  ፖለቲከኛ ናቸው።ቀደም ብሎ የህዝባዊ አርነት ትግራይ ድርጅት ማዕከላዊ ኮሚቴ አባል የነበሩ ፖለቲከኛ ናቸው፣ድርጅቱን የሚመሩትም በፖለቲካ ነው ይባላል .....

የዓለም ጤና ድርጅት ተወካይ መልስ = እንዴ! እራሱ የዓለም ጤና ድርጅት የምን ውጤት ነው? የፖለቲካ ውጤት አይደለም ወይ? ከፖለቲካ ውጪ የሆነ ዓለም አቀፋዊ ድርጅት የቱ ነው? ደግሞስ ድርጅቱን መምራት እና ፖለቲካ ምን አገናኛቸው።የዓለም ጤና ድርጅት በትክክል ስራውን እየሰራ ነው።አመራሩም ኃላፊነቱን እየተወጣ ነው።ስለሆነም ይህ አቀራረብ መሰረተ ቢስ ነው። በማለት መልስ ሰጥተዋል።

ባጠቃላይ በኮሮና ቫይረስ ወረርሽኝ ሳብያ አሜሪካ ተገቢ ሚና መጫወት ሲገባት በትራምፕ ቸልተኝነት እና ጉዳዩን አቅልለው በማየታቸው ለዓለም ከመትረፍ ይልቅ ራሷ አሜሪካ ችግሩን ለመቆጣጠር ፈተና ላይ ነች።ይህ ደግሞ በርካታ የአሜሪካንን ፖለቲከኞች እና ጋዜጠኞች አበሳጭቷል። አሜሪካ በዓለም ላይ በተከሰቱ ፖለቲካዊ፣ማኅበራዊ እና ምጣኔ ሃብታዊ ጉዳይ ሁሉ የመሪነት ሚና ስትጫወት ቆይታለች።በኮሮና ወረርሽኝ ግን ለዓለም ከመትረፍ ይልቅ እራሷ ከፍተኛ ፈተና ላይ ነች።ለእዚህ ተጠያቂው የትራምፕ አመራር እንደሆነ ብዙዎች አሜሪካውያን ይናገራሉ።ስለሆነም  ለእዚህ ውስጣዊ ችግር አዲስ ምክንያት ለመፍጠር ''መሬት የመጫር'' ዓይነት ሙከራ ይታያል።ለእዚህ ማምለጫ ደግሞ ዶ/ር  ቴዎድሮስን በመውቀስ ለማሳበብ ይፈለጋል።ጉዳዩ የአንዳንድ ዘረኞች ደካማ አስተሳሰብም ሰለባ ነው።ስለሆነም ኢትዮጵያውያን ከዶ/ር ቴዎድሮስ ጎን  መቆም ይገባቸዋል።ይህ በእንዲህ እያለ ዶ/ር ቴዎድሮስ ሰሞኑን የኮሮና ቫይረስ ክትባት በአፍሪካውያን ላይ ለመሞከር እንደሚያስቡ የተናገሩትን የፈረንሳይ የሐኪሞች ቡድን ትናንት በሰጡት መግለጫ ወቅሰዋል።ይህ ዓይነት የክትባት ሙከራ በድርጅቱ መርህ መሰረት የሚከናወን እንጂ የተለየ አካባቢ ለይቶ የሚደረግ ሙከራ የለም።ይህ ጉዳይ ከዘረኝነት እና ከቅኝ ገዢ አስተሳሰብ የሚመነጭ ክፉ ሃሳብ ነው ካሉ በኃላ በአፍሪካ ፈፅሞ ሊሆን አይችልም ብለዋል።በእዚሁ ጉዳይ ላይ የሰጡትን መግለጫ ከእዚህ በታች ካለው ቪድዮ ላይ ይመለከቱ።

video source = Daily Nation



ጉዳያችን GUDAYACHN
 www.gudayachn.com

Sunday, April 5, 2020

በወረርሽኙ ስጋትም ውስጥ ሆነን ከአዲስ አበባ የምስራች ተሰምቷል።

ጉዳያችን ሚድያ፣ኮሚኒኬሽን እና ምክር አገልግሎት 
Gudayachn Multimedia, Communication and Consultant
=================

የሐምሌ ደመና እና ደማቁ የመብረቅ ብርሃን 

አስረኛ ክፍል እያለሁ በጣም የምናደንቀው የእንግሊዝኛ መምህር ነበር።ይሄው መምህራችን በአንድ ወቅት የጠቀሳትን የህንዶች አባባል አስታውሳታለሁ። ''በሐምሌ ጥቁር ደመና ውስጥ ብልጭታ መብረቅ አይጠፋም'' ነበር ያለው።አባባሉ በብዙ የመከራ ጊዜ ውስጥ ሁሉም ነገር መከራ ነው አይባልም።ከመከራው ውስጥ የሚወጣ መልካም ነገር ፈፅሞ አይጠፋም ለማለት ነው።እንደ መምህራችን አገላለጥ የሐምሌ ድቅድቅ ጨለማ አስፈሪ ጥቁር ሰማይ ቢታይም በመሃል ላይ ሳይታሰብ ብልጭ የሚለው ደማቅ የመብረቅ ብልጭታ መኖሩን ለመግለጥ ህንዶች የሚጠቀሙበት አባባል ነው።ይህንን ከነገረኝ በኃላ ሐምሌ በመጣ ቁጥር ጥቁር ሰማይ ስመለከት ይህንን አባባል አስታውስ ነበር።ዛሬም በኢትዮጵያ በኮሮና ቫይረስ ወረርሽኝ ስጋት ውስጥ ሆነን አንድ መልካም ተስፋ ፈንጣቂ መንገድ አገሪቱ እየሄደች እንደሆነ ተሰምቷል።በሌላ አነጋገር በኮሮና ወረርሽኝ ሳብያ በሞት የስጋት ጥላ ውስጥም ሆነንም ከአዲስ አበባ የምስራች ተሰምቷል። 

ጉዳዩ ለአንዳንዶች ቀለል አድርገው ሊያዩት ይችላሉ።ጉዳዩ ግን ኢትዮጵያ ከ1966ቱ የየካቲት አብዮት ወዲህ ለሚገጥማት ችግር ሁሉ በአንዱ እና ዓይነተኛ  የመፍትሄ መንገድነት ተጠቅማ የማታውቀው፣ኢትዮጵያ ግን ከስሪቷ እስከ መላ ዘመኗ ሁሉ ስትጠቀምበት የነበረው መፍትሄ ነበር።ይሄውም ከተፈጥሮን በጉልበት እንቆጣጠራለን ወደ ተፈጥሮን እናለማለን ተፈጥሮን የፈጠረ አምላክንም እንለምናለን ወደሚል ወሳኝ ምዕራፍ ከዛሬ ሰኞ መጋቢት 28/2012 ዓም ጀምሮ መሸጋገሯ ማሳያ ምልክት ታይቷል።

በእዚህ መሰረት የኢትዮጵያ መንግስት እንደመንግስት በባለስልጣናቱ፣የአገሪቱ ዋና ዋና መገናኛ ብዙሃን እንደ አገሪቱ አንደበትነታቸው  የፈጣሪን አምላክነት የሚዘክሩበት የእየቀን መርሃግብር ተይዟል።ስለሆነም የኢትዮጵያ የሃይማኖት ተቋማት ጉባኤ ዛሬ በሰጠው መግለጫ ላይ እንደገለጠው   -

1ኛ) ሰኞ መጋቢት 28/2012 ዓም ከምሽቱ 3 ሰዓት ጀምሮ በሶስት የተመረጡ ቦታዎች የሃይማኖት አባቶች እና ከፍተኛ ባለስልጣናት በተገኙበት የፀሎት ማስጀመርያ መርሃ ግብር ይጀመራል መርሃ ግብሩ  በኢትዮጵያ ያሉ አራቱ ዋና ዋና ቴሌቭዝኞች ማለትም ኢቲቪ፣ፋና፣ዋልታ እና አዲስ ቲቪ በቀጥታ ያስተላልፉታል።

2ኛ) የፀሎት እና የሃይማኖት አባቶች የትምህርት መርሃግብር ከሰኞ መጋቢት 28/2012 ዓም ጀምሮ በእየቀኑ በሚወጣው መርሃግብር መሰረት ለአንድ ወር ያህል የሚቀጥል ሲሆን መርሃግብሩን በሙሉ ከምሽቱ 3 ሰዓት እስከ 4 ሰዓት ድረስ ኢቲቪ፣ፋና፣ዋልታ እና አዲስ ቲቪ በቀጥታ ያስተላልፉታል።


3ኛ) የጸሎት እና የትምህርት መርሃግብሩ ዋና  ዋና ዓላማዎች 

  ሀ)  ምእመናን ለእውነተኛ ንስሐ እንዲነሱ ለማድረግ እና 
  ለ) ምእመናን መንፈሳዊ ሕይወታቸውን በማጠናከር ዓለምአቀፍ ወረርሽኝ በፈጣሪ ፍቃድ እንዲነሳ ሁሉም በየእምነቱ በፀሎት እንዲበረታ  እና መንፈሳዊ እና ስነልቦናዊ ጥንካሬ ለመስጠት መሆኑ ተጠቅሷል።


ይህ ለኢትዮጵያ ምን ማለት ነው?

ይህ ለኢትዮጵያ ታላቅ ደስታ ነው።ምናልባት አንዳንዶች የሃይማኖታዊውን ጉዳይ ዋጋ ለማይሰጠው፣ምናልባትም ''በግራ ግንፍ'' አስተሳሰብ ውስጥ ለተዘፈቀ ሰው ጉዳዩ ትርጉም ላይሰጠው ይችላል።የኢትዮጵያ የመገናኛ ብዙሃን፣የኢትዮጵያ የቤተመንግስት ሰዎች ኢትዮጵያ ለመጣባት ፈተና ሕዝብ በእየእምነቱ ይፀልይ ብለው ሲንበረከኩ ማየት እና መስማት በራሱ ኢትዮጵያ ከ46 ዓመታት በኃላ የመጀመርያ ተግባር ነው።ኢትዮጵያ ለዘመናት የዘለቀችው በእግዚአብሔር ፊት ተንበርክካ ነው።የኢትዮጵያ የመንግስት መገናኛ ብዙሃን የእግዚአብሔርን ነገር በቀጥታ ሲያስተላልፉ አሁንም ከ46 ዓመታት በኃላ  ይህ የመጀመርያ መጀመርያ ነው።ስለሆነም ኢትዮጵያ ወሳኝ የአስተሳሰብ ለውጥ መኖሩን የሚያሳይ ብቻ ሳይሆን  የትውልድ ሽግግር ሂደትም ነው።ሽግግሩ ከስር የጀመረ ለመሆኑ አንዱ ማሳያ አድርጎ መውሰድም ይቻላል።

ጅማሮው መርሳት የሌለበት ጉዳይ  

ይህ መልካም ጅማሮ ለአንድ ወር እንደሚቆይ ነው የተነገረው።ይህ በራሱ ጥሩ ነገር ሆኖ፣ነገር ግን ከአንድ ወር በኃላ ሁኔታው ከተሻሻለ ለችግር ጊዜ ብቻ አልቅሰን በኃላ ነገር ዓለሙ እንዳይረሳ ጅማሮው በቀጣይ ከኃይማኖታዊው ጉዳይ አልፎ የህዝብ ሞራላዊ እና ስነልቦናዊ አቅም በሚገነባ መልኩ መቀጠል አለበት። ስለሆነም የሚከተሉት ተግባራት ከግንዛቤ ውስጥ ቢገቡ መልካም ነው።እነርሱም -

1) ዓርብ እኩለ ቀን ለሙስሊሞች የጁማ መርሃግብር የቀጥታ የቴሌቭዥን እና ራድዮ ስርጭት ቢኖር ፣

2) እሁድ ማለዳ ከ11:30 ጀምሮ የኪዳን ጸሎት፣ፀሎተ ቅዳሴ እና ትምህርተ ወንጌል እስከ ረፋዱ 4 ሰዓት ድረስ የቀጥታ ራድዮ እና ቴሌቭዥን ስርጭት ቢኖር፣(ዛሬ በአዲስ ቲቪ የተጀመረው መልካም ጅምር ቢሆንም ከአዲስ አበባ ባለፈ እስከ ዳር አገር አይደርስም ይህ ደግሞ ቀረጥ ከፋዩን ሕዝብ እኩል ማገልገል ያለባቸው መገናኛ ብዙሃንን አቅማቸውን ይወስነዋል)፣

3) ስርጭቶቹን ማንኛውም ኢትዮጵያዊ (ካለ ሳተላይት ዲሽ ጭምር መከታተል እንዲችል) አብዛኛውን የኢትዮጵያ ክፍል የሚሸፍኑ ብሔራዊ ራድዮ እና ቴሌቭዥን እንዲያስተላልፉ ቢደረግ።እዚህ ላይ ራድዮ በአዲስ አበባ ካለ እንበል አንድ የቀን ሰራተኛ እስከ ሊስትሮ፣በገጠርም እስከ ገበሬው ድረስ የመድረስ አቅም ስላለው የሳተላይት ቴሌቭዝኖችን ብቻ ማዳረሱ አብዛኛውን ሕዝብ እንዳያጣ ያሰጋል። 

4) ወደፊትም ይህ አገልግሎት ቢያንስ በሳምንት በሚሰጡ ሃይማኖታዊ ትምህርቶች እንዲቀጥል መንግስት ሁሉንም የኢትዮጵያ ክፍል የሚሸፍን ቻናል የአየር ሰዓት በመስጠት መጪው ትውልድ እግዚአብሔርን የሚፈራ እንዲሆን የሚሰሩ ስራዎችን ከአሁኑ መልክ ባለው መንገድ ማቀድ አለበት።ይህ ካልሆነ ወረርሽኙ ሲነሳ ብቻ ወደፈጣሪ የምንንበረከክ ወረርሽኙ ሲቀል ግን  የምንተወው ፕሮጀክት እንዳይመስል መጠንቀቅ ይገባል። ምክንያቱም በምድር ላይ ስንኖር የነፍስ ጉዳይ አለ።በኢትዮጵያ ነፍስ ወደፈጣሪዋ እንደምትጠራ የሚጠራጠር ሕዝብ የለም።የነፍሱ ጉዳይ የተያዘለት ሕዝብ ነው በራስ መተማመን መንፈስ ለአገሩም ሆነ ለዓለምም የሚተርፍ ሥራ የሚሰራው።

ለማጠቃለል ኢትዮጵያ ከአርባ ስድስት ዓመት በኃላ ለመጀመርያ ጊዜ ብሔራዊ ቴሌቪዥኖቿ የፈጣሪን ነገር ሊናገሩ፣የሃይማኖት አባቶቿ በይፋ ሕዝብ ሊመክሩ ነው።ይህ ኢትዮጵያ ለግማሽ ክፍለዘመን ለቀረበ ዓመታት በማያምኑ መሪዎች ተተብትባ ህዝቡ የሚሄድበት እና መንግስት የሚሄድበት መንገድ ተለያይቶ ኖሯል።አሁን ወደ የሰውነት ማዕረግ እየተመለስን ነው።ወደ ሰውነት ስንመለስ ኮሮና ቫይረስ አይደለም ሌላ ምድራዊ ፈተናም የመሻገር አቅማችን ብቻ ሳይሆን ለዓለም የመትረፍ አቅማችን በቅርቡ የሚታይበት ጊዜ እንደደረሰ አመላካች ሂደት ነው።በዘመኔ የኢትዮጵያ ቴሌቭዥን ስለ እግዚአብሔር ሲነገርበት ማየት የምናፍቀው አንዱ ጉዳይ ነበር።ለእዚህም እግዚአብሔር ይመስገን።እግዚአብሔር ደግሞ ዝም አይልም።ይሰማናል።''ጆሮን የተከለው አይሰማምን? ዓይንን የሠራው አያይምን?'' መዝሙር 94፣9

ቅያሜው ይቅርና አምላክ ሆይ ታረቀን በዘማሪ ይልማ ኃይሉ 






ጉዳያችን GUDAYACHN
 www.gudayachn.com

Friday, April 3, 2020

የዛሬ 97 ዓመት ከሁለት ሚልዮን ያላነሰ የኦርቶዶክስ ክርስቲያን አማኝ የነበረባት የጥንቷ ቆስጠንጢኖስ የዛሬዋ የቱርክ ዋና ከተማ ኢስታምቡል ጉዳይ (ጥናታዊ ፊልም)

  • የዛሬ 97 ዓመት ሁለት ሚልዮን ኦርቶዶክስ ክርስቲያን የነበረባት ቱርክ፣እንደ አውሮፓውያን አቆጣጠር በ1923 ዓም 1.5 ሚልዮን የሚሆኑት አገር ለቀው እንዲሄዱ ተፈርዶባቸው አገር ለቀው ወጡ፣የቀሩት 150 ሺህ ክርስቲያኖች ፀረ ክርስቲያኖች እንቅስቃሴ በ1955 ዓም በቱርክ ዋና ከተማ ኢስታምቡል ተቀስቅሶ ከአገር እንዲባረሩ ተደረጉ።
  • ዛሬ በመላዋ ቱርክ የቀሩት ኦርቶዶክሳውያን ከ40 ሺህ አይበልጡም።
  • ''ዛሬ በቱርክ ሰማዕትነት እየተቀበልን እንደሆነ ነው የሚሰማን'' ፓትርያሪክ በርተሎምዮስ 

Video = from CBS




Thursday, April 2, 2020

መኖርያ ፍቃድ የሌላቸው ስደተኛ ኢትዮጵያውያን በኮሮና ወረርሽኝ ሳቢያ ችግራቸው ተባብሷል።እንድረስላቸው! (ዩቱብ ኦድዮ)

ጉዳያችን ሚድያ፣ኮሚኒኬሽን እና ምክር አገልግሎት
Gudayachn Multimedia, Communication and Consultant
=========
ሙሉውን ለመከታተል ከስር ሊንኩን ይጫኑ -

ጉዳያችን GUDAYACHN
 www.gudayachn.com

Wednesday, April 1, 2020

በኮሮና ወረርሽኝ ሳቢያ ምዕመናን በአብያተ ክርስቲያናት እና መስጂዶች የማይሰበሰቡ ከሆነ መንግስታዊ ራድዮ እና ቴሌቭዥን ጣቢያዎች ለሃይማኖቶቹ የአየር ሰዓት መመደብ አለባቸው።



ጉዳያችን ሚድያ፣ኮሚኒኬሽን እና ምክር አገልግሎት 
Gudayachn Multimedia, Communication and Consultant

  • ይህንን ክፉ ጊዜ ካለምንም መንፈሳዊ ዕሴት  ለሺህ ዓመታት ፈጣሪውን የሚያውቅ ሕዝብን እንዲሁ መተው አይቻልም


ከሺህ ዓመታት ከፈጣሪው ጋር ሲገናኝ የኖረ ሕዝብ በድንገት ከእዚህ ሳምንት ጀምሮ በኮሮና ወረርሽኝ ሳብያ ማንኛውም ምዕመን ወደ መስጂድም ሆነ ወደ አብያተክርስቲያናት እንዳይሄድ መመርያ ከኢትዮጵያ ኦርቶዶክስ ተዋህዶ ቤተክርስቲያን ቅዱስ ሲኖዶስ እና ከከፍተኛው የእስልማና ምክርቤት ውሳኔዎች ተወስነዋል።

ውሳኔዎቹ  ለሕዝብ ጤንነት ተብለው የተወሰኑ ቢሆኑም የሚያስከትሉት መንፈሳውም ሆነ ስነ ልቦናዊ ተፅዕኖ ግን ቀላል ነው ማለት አይደለም።ምዕመኑ ከሞራላዊውም ሆነ ከመንፈሳዊው ዓለም በድንገት ሲቆራረጡ እንደ ሕዝብ የሚያስከትለው ዘርፈ ብዙ ጉዳት ይኖረዋል።ከሚኖሩት ጉዳቶች ውስጥ በስነ ልቦና መድቀቅ፣ የመንፈሳዊ ሕይወት ዝለት እና የተስፋ ቢስነት ስሜቶች በቀዳሚነት ተጠቃሽ ናቸው።ስለሆነም ምዕመናኑ ወደ መስጅድም ሆነ አብያተክርስቲያናት እንዳይሄዱ ከወጣው መመርያ ጎን መሰራት ያለበት ሥራ አለ።ይሄውም ቢያንስ በአካል ሊገኝ ያልቻለ መንፈሳዊ አገልግሎት በዘመናዊ ቴክኖሎጂ እንዲገኝ ማድረግ የመንግስት ኃላፊነት ነው።በኢትዮጵያ አንፃር አብዛኛው ሕዝብ ለቴክኖሎጂ መሣርያዎች ዕድል የለውም።ለምሳሌ አብዛኛው ሕዝብ የኮምፑተር ባለቤት አይደለም።ተንቀሳቃሽ ስልክ ሽፋን ከኢትዮጵያ ሕዝብ ግማሹን ያህል ገና አላዳረሰም።በመሆኑም ተመራጩ መንገድ ራድዮ እና ቴሌቭዥን ይሆናል ማለት ነው።

ከመስጂድ እና አብያተክርስቲያናት የታቀበው ሕዝብ አገልግሎቱን በራድዮ እና በቴሌቭዥን በጊዜያዊነት እንዲያገኝ ማድረግ ይገባል 

ከላይ ለመጥቀስ እንደተሞከረው በሕዝቡ ላይ ሊፈጠሩ የሚችሉትን የስነ ልቦና መድቀቅ፣ የመንፈሳዊ ሕይወት ዝለት እና የተስፋ ቢስነት ስሜቶች ሁሉ የሚያመጡትን ጉዳቶች ለማጥፋት ባይቻል ጉዳታቸውን ለመቀነስ እንደ መነሻነት የኢትዮጵያ ብሔራዊ ራድዮ እና ቴሌቭዥን ጣብያዎች በሚከተሉት መርሐግብሮች መሰረት የቀጥታ ስርጭት መጀመሩ አስፈላጊ ነው።ይሄውም -

  • ይሄውም በየሳምንቱ ዓርብ ከቀኑ 5:30 እስከ 7ሰዓት ከአንዋር መስጊድ የቀጥታ የጁማ መርሐግብር በኢትዮጵያ ራድዮ እና ቴሌቭዥን ማስተላለፍ ይቻላል።
  • በየሳምንቱ ዕሁድ ከማለዳው 11 ሰዓት እስከ ረፋዱ 3 ሰዓት ድረስ ደግሞ የኪዳን ጸሎት፣የቅዳሴ ጸሎት እና ትምሕርተ ወንጌል በቀጥታ በኢትዮጵያ ቴሌቭዥን እና ራድዮ መተላለፍ ይችላል።
እዚህ ላይ ለምን በራድዮ? ቴሌቭዥን አይበቃም ወይ? ብሎ የሚያስብ ይኖራል።ሆኖም ቴሌቭዥን የሌለው ኢትዮጵያዊ  ራድዮ የማግኘት  ዕድል ስለሚኖረው እና በተለይ በገጠር እና ገጠር ቀመስ ከተሞች ራድዮ የመድረስ ዕድሉ  ከፍ ያለ ስለሆነ ነው። በሌላ በኩል በአሁኑ ጊዜ በርካታ የግል ቴሌቭዥኖች ለምን የማስተላለፍ ስራውን አይሰሩም? የሚል ሃሳብም ሊነሳ  ይችላል።ሆኖም ግን አብዛኞቹ የግል ቴሌቭዥኞች በሳተላይት ብቻ ተደራሽ መሆናቸው አሁንም ለአብዛኛው ኢትዮጵያዊ ተደራሽ አለመሆናቸው የራሱ የሆነ ችግር ያስከትላል።

ባጠቃላይ የኢትዮጵያ መንግስት ብሔራዊ ራድዮ እና ቴሌቭዥኖቹን ለእዚህ የተቀደሰ ተግባር ማዋሉ ዘርፈ ብዙ ጥቅም አለው። በመላው ዓለም ያሉ መገናኛ ብዙሃን በዓረቡ ዓለም ዓርብ ዕለት፣በክርስቲያኑ ዓለም ደግሞ ዕሁድ ሰንበትን ተከትለው መንፈሳዊ መርሐግብሮች አሏቸው።እንደ ኢትዮጵያ ያለች የሁለቱም ዕምነቶች አገር ለሆነች ደግሞ ሁለቱም መርሐግብሮች ከመቼውም ጊዜ በላይ በብሔራዊ ራድዮ እና ቴሌቭዥን ሊቀርቡ ይገባል። ይህንን ክፉ ጊዜ ካለምንም መንፈሳዊ ዕሴት  ለሺህ ዓመታት ፈጣሪውን የሚያውቅ ሕዝብን እንዲሁ መተው አይቻልምና።

ጉዳያችን GUDAYACHN 
 www.gudayachn.com