Sunday, March 20, 2022

የትግራይ ተወላጅ የኢንጅነር እምብዛ ታደሰ አስከሬን ከተቀበረበት ቤተክርስቲያን አውጥቶ መልሶ ለጅብ የሰጠው ማን ነው?

ኢንጅነር እምብዛ ታደሰ
===============
ጉዳያችን /Gudayachn
===============
በኢትዮጵያ ከፋሺዝም የከፋ፣ናዚዝምን የሚያስንቅ በብዙ ግፎች የተሞላ፣ከአርባ ዓመታት በላይ ከትግራይ እስከ ሞያሌ በበርካታ ኢትዮጵያውያን ደም የተነከረው ህወሓት ከፈጸማቸው የግፍ ስራዎች ውስጥ በራሱ በትግራይ ህዝብ ላይ የፈጸመው ግፍ የሽብርተኛው ህወሓት ደጋፊዎች ሊሸፋፍኑት ይሞክራሉ እንጂ ታሪክ እና ጊዜ የሚያወጣበት ጊዜ እሩቅ አይደለም።

ህወሓት የትግራይን ህዝብ መፍጀት የጀመረው ከምስረታው ጊዜ ጀምሮ ነው።በ1967 ዓም እስከ 1970ዎቹ መጨረሻ ድረስ ትግራይ አዛውንቶችን እና የዕድሜ ባለጸጋዎች ሳይቀሩ ኢትዮጵያዊነትን ያጠብቃሉ የተባሉ ህይወታቸው  በህወሓት እየታደኑ ጠፍቷል።

በዘመናችን ህወሓት ከፈጸማቸው ግፎች ውስጥ የትግራይ ተወላጅ የኢንጅነር እምብዛ ታደሰ ላይ የተፈጸመው የሕወሓትን ከፋሺዝም እና ናዚዝም የከፋ ድርጊት አመላካች ነው። ኢንጅነር እምብዛ ታደሰ የትግራይ ተወላጅ ነው።የመከላከያ ሰራዊት መቀሌ ለሕግ ማስከበር ከገባ በኋላ ህዝቡን ለማገልገል ካለው ፍላጎት አንጻር የትግራይ ክልል ኢንቨስትመንት ቢሮ ኃላፊ በመሆን ማገልገል የጀመረው።ሆኖም ህወሓት ወኪሎቹን ልኮ መቀሌ ላይ በቢላዋ አርደው አስከሬኑም እንዳይገኝ ሜዳ ላይ ጣሉት። አስከሬኑም በከፊል በጅብ ተበላ።በኋላ ፖሊስ አስከሬኑን አግኝቶ ጓደኞቹ እና ቤተሰቡ የቀረውን አስከሬኑን ወስደው በክብር ቤተክርስቲያን ቀበሩት። 

ይህ በእንዲህ እያለ መከላከያ መቀሌን ለቆ ሲወጣ ህወሓት መቀሌ ሲገባ ህወሓት በተቀበረው የኢንጅነር እምብዛ ታደሰ ተረፈ አስከሬን ላይ የፈጸመው የግፍ ግፍ የሚዘገንን ነው።የህወሓት ሰዎች ህዝብ እያየ የኢንጅነር እምብዛ ታደሰ ተረፈ አስከሬን ከተቀበረበት ቤተክርስቲያን እንዲወጣ አድርገው ሜዳ ላይ እንዲጣል ካደረጉ በኋላ የተረፈውን አስከሬን የሌሊት ጅብ እንዲበላው መደረጉ የመቀሌ ወሬ ነው።ይህ ሁሉ የሚሆነው ለትግራይ ህዝብ አይደለም።ለእነደብረጽዮን እና ጌታቸው ረዳ ስልጣን ሲባል 

ይህንን አስመልክቶ ጋዜጠኛ ሔርሜላ አረጋዊ በትዊተር ገጿ ዛሬ ኢንጅነር እምብዛን  አስታውሳዋለች።በሌላ በኩል የአሓዱ ራድዮ ጋዜጠኛ ፍሬወይኒ ገብረ ጻዲቅ ገብሩ በፌስቡክ ገጿ ላይ ድርጊቱን የገለጸችበት ከስር ይመልከቱ።

የጋዜጠኛ ሄርሜላ አረጋዊ ትዊተር መጋቢት 11፣2014 ዓም






Saturday, March 19, 2022

የአቡነ ማትያስ ንግግር ግልጽ የሆነ ፖለቲካዊ ተልዕኮ እንጂ ሃይማኖታዊ አይደለም። ''እውነት አርነት ያወጣችኋል'' የሚለው ቃል ተዘቅዝቆ ተጻፈ።ህወሃትም ለማለት ያልደፈረውን ማለታቸው ደግሞ አስተዛዛቢ ነው።



👉አቡነ ማትያስ ''ትግሬዎችን ከምድር ገጽ ለማጥፋት ተብሎ የተጀመረ ጦርነት'' ያሉት የትኛው ኢትዮጵያዊ የትግራይ ተወላጅን ከምድረ ገጽ ለማጥፋት ሲዘምት ተመለከቱ? 
👉120 ሺህ ሰራዊትስ ትግራይ ገብቶ 120 ሺህ ሴቶች ለመድፈሩ ማስረጃቸው ምንድነው? 
👉ህወሃትም 120 ሺህ ሴቶች በትግራይ ተደፈሩ በማለት ወደ ትግራይ ለህግ ማስከበር ከዘመተው የመከላከያ ሰራዊት ቁጥር በላይ ሴቶች ተደፈሩ የሚል ዘገባ ሲያወጣ አልተሰማም።

===============
ጉዳያችን/Gudayachn
===============
ከአምስት ዓመታት በፊት አቡነ ማትያስን የሸገር ኤፍኤም ራድዮ ቀርበው ጋዜጠኛ መዓዛ ብሩ የተለያዩ ጥያቄዎች አቅርባላቸው ነበር። 
''የሙስናው ጉዳይ በቤተክህነት በሰፊው ይነሳል።እርስዎ ይህንን ለመቅረፍ ምን እርምጃ መወሰድ አለበት ይላሉ?''
አቡነ ማትያስ በወቅቱ የሰጡት መልስ አስደንጋጭ ነበር። ''ሙስናው ከባድ ነው።እንዲህ በቀላል የሚፈታ አይደለም።እኔ ይቻላል ብዬ አላስብም'' ነበር መልሳቸው። 
''እና አይቻልም እያሉኝ ነው አባታችን?'' መዓዛ ደግማ ጠየቀች
ጋዜጠኛ መዓዛ ቀጠለች  ''የግል ጉዳዮች ላይ ልጠይቅዎት። አባታችን ያነባሉ? ምን ጊዜ ያነባሉ?'' 
አቡነ ማትያስ ቀጠሉ '' አዬ ማንበብ፣ድሮ ነበር እንጂ አሁን ምን ማንበብ አለ።አንዴ ያንዱን ጉዳይ ሌላ ጊዜ የሌላውን ጉዳይ እና ስሞታ ስንሰማ ነው የምንውለው'' ነበር የአቡነ ማትያስ ምላሽ። 

ይህ በመረጃም ሆነ በማስረጃ ያልተደገፈ ሂደት ትናንት በትግራይ ሚድያ ቀርበው ''ትግሬዎችን ከምድር ገጽ ለማጥፋት ተብሎ የተጀመረ ጦርነት'' እና ''120ሺህ ሴቶች ተደፈሩ'' ሌላም ለመናገር የሚከብዱ ዓረፍተነገሮች ከአቡነ ማትያስ ሰምተናል።ቃላቶቻቸው ለትግራይ ሕዝብ በራሱ አደገኛ ንግግሮች ናቸው።አቡነ ማትያስ በትግራይ ሚድያ ላይ ከላይ የጠቀሱትን እና ሌሎች ህዝብ የሚያጋጩ ንግግሮችን መነሻ ያደረጉት በቅርቡ በቤኒሻንጉል ክልል በአንድ ግለሰብ ላይ የተፈጸመ ግድያን በመጥቀስ ነው።ይህ ግድያ ሁሉም ኢትዮጵያዊ ያወገዘው ብቻ ሳይሆን ጉዳዩን መንግስትም አውግዞ መግለጫ ከመስጠት አልፎ ይፈጸሙትን ለፍርድ እንደሚያቀርብ ገልጧል። 

የቢኒሻንጉል ግድያ በህወሃት መንደር የሰርግና ምላሽ ያህል ነበር የተወሰደው።ከትግራይ ክልል ውጪ የሚኖረውን የትግራይን ህዝብ የእገሌ ህዝብ ሊበላህ ነው፣ሊፈጅህ ነው እያሉ የሰሩት ፕሮፓጋንዳ ሁሉ አልሰራ ብሎ።ህዝቡ ይልቁን እያስፈጀው ያለው እራሱ ህወሃት መሆኑን ሲያውቅ ህወሃት የሚቆጣጠረውን ቦታ እየተወ ወደ ሰሜን ወሎ መሰደድ መጀመሩ የሰሞኑ ዜና ነበር።ህወሃቶች ይህንን ስደት ለመዋሸት ሞክረው ነበር።ለቪኦኤ አማርኛው የተናገሩት የቀድሞ የመቀሌ ዩንቨርስቲ ፕሬዝዳንት እና አሁን ህወሃትን ወክለው የሚናገሩት ሰው የትግራይ ህዝብ ህወሃትን እየተወ መምጣቱን ሊክዱ ሞክረዋል። ህዝቡ ግን በሺዎች እየሆነ በህወሃት ቁጥጥር ስር ያለውን ቦት እየተወ እየተሰደደ ነው።

ይህ በእንዲህ እያለ ነው የቤኒሻንጉል ግድያ ቪድዮ በተለቀቀ ምሽት የትግራይ ሚድያ ስታሊን ''ቪድዮውን ለእያንዳንዱ የህወሃት ታጣቂ በቶሎ እንዲሰራጭ ይደረግ ይህ በቶሎ እንዲሰራ ይደረግ '' የሚል ንግግር ከህወሃት እንደመመርያ የወረደ ህዝብ ከህዝብ የሚያጋጭ እና የትግራይን ህዝብ የሚያስደነብር ርዕስ ማግኘቱን የገለጠው። ይህ በቀጣይ ቀናት ህወሃት ይህንኑ የቤኒሻንጉል የአንድ ሰው ግድያ አስመልክቶ የትግራይ ህዝብ ላይ ሁሉ የታወጀ ጦርነት አስመስሎ መግለጫ አወጣ።ይህ ማለት በህወሃት መዋቅር ስር ያሉ ሁሉ የፕሮፓጋንዳ ማሽኖች የትግራይን ህዝብ ለማስደንበር እንዲጠቀሙበት ትዕዛዝ ወረደላቸው። ከእዚህ ሁሉ በኋላ አቡነ ማትያስም በትግራይ ሚድያ ቀርበው  ''ትግሬዎችን ከምድር ገጽ ለማጥፋት ተብሎ የተጀመረ ጦርነት'' እና ''120ሺህ ሴቶች ተደፈሩ'' ብለው ተናገሩ።በነገራችን ላይ ህወሃትም 120 ሺህ ሴቶች በትግራይ ተደፈሩ በማለት ወደ ትግራይ ለህግ ማስከበር ከዘመተው የመከላከያ ሰራዊት ቁጥር በላይ ሴቶች ተደፈሩ የሚል ዘገባ ሲያወጣ አልተሰማም።እንደ አቡነ ማትያስ አባባል 120 ሺህ የትግራይ ሴቶች ተደፈሩ ያሉት ሆስፒታል የሄዱትን ብቻ እንደሆነ አቅርበዋል።

አቡነ ማትያስ በጭና ተክለሃይማኖት በህወሃት ሰራዊት ካህናት በቤተክርስቲያን መታረዳቸውን፣የካህናት ሚስቶች መደፈራቸውን፣እናቶች በልጆቻቸው ፊት መደፈራቸውን፣በቤተመቅደስ ውስጥ የህወሃት ጀሌ ከብት ማረዱን፣ታቦታት መዘረፋቸውን፣ንዋየቅድሳት እና ቅርሶች ተሰርቀው በዓለም አደባባይ እየተቸበቸበ መሆኑን ሲቃወሙ አልታዩም።ከእዚህ በተጨማሪ ከላሊበላ እስከ ሰሜን ሸዋ ካህናት ከህዝቡ ጋር ከመኖርያቸው ሲፈናቀሉ፣በአፋር በአንድ ቀን ከአንድ መቶ 12 በላይ ህጻናት በህወሃት ሲጨፈጨፉ ምንም ዓይነት መግለጫ አልሰጡም።

የአቡነ ማትያስ ንግግር ፖለቲካዊ እንጂ ሃይማኖታዊ አይደለም።በቤኒሻንጉል የደረሰው ማንንም ኢትዮጵያዊ አሳዝኗል።ድርጊቱ ኢትዮጵያውያንን ለማጋጨት የተፈጸመ ድርጊት እንደሆነ ግልጥ ነው። ድርጊቱን ማውገዝ አንድ ነገር ነው።''ትግሬዎችን ከምድረገጽ ለማጥፋት'' የተደረገ ነው ብሎ በመሃል ሃገር ለሚኖሩ የትግራይ ተወላጆች ላይ ህወሃት ለብዙ ጊዜ ሞክሮ ያልተሳካለትን አጀንዳ ለመፍጠር መሞከር ሌላ ጉዳይ ነው።ይህ አካሄድ ምን ያህል ሃላፊነት የማይሰማ አካሄድ እንደሆነ እራሱ የትግራይ ህዝብ ይታዘባል።በእዚህ ጊዜ አቡነ ማትያስ እንዴት የሁሉም አባት ሆነው ቢያገለግሉ ለሁሉም እኩል አባትነታቸውን ቢያሳዩ ምን ያህል የትግራይ ህዝብ ይደሰት እንደነበረ ብዙ መመራመር አይፈልግም።አሁን ግን በፖለቲካዊ ተልዕኮ ባዘሉ ንግግሮች ብቻ ሳይሆን ማስረጃ በሌለባቸው እንደ 120 ሺህ ሴቶች ተደፈሩ የውሸት ዜና ሁላችንም ከማዘን በላይ አፍረናል። ''እውነት አርነት ያወጣችኋል'' የሚለው ቃል ተዘቅዝቆ ተጻፈ።
==================///============


 

Wednesday, March 16, 2022

በኖርዌይ የሚኖሩ ኢትዮጵያውያን እና የኢትዮጵያ ወዳጆች ባለፉት 9 ወራት ውስጥ ብቻ ወደ 1.2 ሚልዮን የኖርዌይ ክሮነር ወይንም ከ7 ሚልዮን ብር በላይ በማዋጣት ለዓባይ ግድብ ማሰርያ፣በጦርነት ለተጎዱ ወገኖች የሚሆን ለአማራ ክልል፣ለአፋር ክልል እና ለአደጋ ስጋት አመራር ኮሚሽን ልከዋል።ተቀባዮቹም የምስጋና እና ማረጋገጫ ልከዋል።(የምስጋና ደብዳቤዎቹን ይዘናል)

==============
ጉዳያችን/Gudayachn
==============

በውጭ የሚኖሩ ኢትዮጵያውያን በሃገራቸው በደረሰው የጦርነት ተጎጂዎችን የማቋቋም እና የዕለት ደራሽ ዕርዳታ የሚሆን ድጋፍ ማድረጋቸው በተለያየ ጊዜ ተዘግቧል።በሰሜን አውሮፓ የምትገኘው በኖርዌይ የሚኖሩ ኢትዮጵያውያንም ካለፈው ግንቦት ወር ወዲህ ብቻ ከ7 ሚልዮን ብር በላይ በማዋጣት ለዓባይ ግድብ ማሰርያ፣በጦርነት ለተጎዱ ወገኖች የሚሆን ለአማራ ክልል፣ለአፋር ክልል  እና ለአደጋ ስጋት አመራር ኮሚሽን በተናጥል ልከዋል።ተቀባዮቹም የምስጋና እና ማረጋገጫ ልከዋል።

ሁሉም መዋጮዎች ከኢትዮጵያ ማኅበረሰብ (ኮምዩኒቲ) በኖርዌይ ጋር በመተባበር እና በኖርዌይ የሚገኙ የተለያዩ የሲቪክ ድርጅቶች በጥምረት በፈጠሩት ቅንጅት የተከናወነ ነው። በእዚህም የማስተባበር ሥራ ላይ በኖርዌይ የኢትዮጵያ ኮሚኒቲ ጋር በመተባበር በኖርዌይ የኢትዮጵያ ስኮላርስ ግሩፕ፣በቅርቡ የተመሰረተው እንቁም ለኢትዮጵያ እና ሌሎች የሲቪክ ድርጅቶች በማስተባበር ሥራው ላይ የተሳተፉ ሲሆን በሁሉም የመዋጮ ሂደት ላይ ያዋጡ ሰዎች በቫይበር ቡድን (ግሩፕ) ላይ ስማቸው እየተጻፈ እንዲያዩት በማድረግ የተከናወነ ነው። 

በእዚህ መሰረት 

1) ባለፈው ግንቦት ወር 2013 ዓም ለአባይ ግድብ ፕሮጀክት ወደ ፕሮጀክቱ ባለቤት የኢትዮጵያ ኤሌክትሪክ ባለስልጣን የግድቡ ፕሮጀክት የኢትዮጵያ ንግድ ባንክ የባንክ ሂሳብ 331,659.00 የኖርዌይ ክሮነር የተላከ ሲሆን ከእዚህ በተጨማሪ 30ሺህ የኖርዌይ ክሮነር በስቶኮልም የኢትዮጵያ ኤምባሲ ለግድቡ በከፈተው ሂሳብ ገብቷል።በድምር ለግድቡ ከኖርዌይ ባለፈው 9 ወራት ውስጥ ብቻ 361,659 የኖርዌይ ክሮነር ተዋጥቶ ተልኳል።

2) ባሳለፍነው መስከረም ወር መጨረሻ ላይ ደግሞ ለአፋር እና አማራ ክልል በጦርነቱ ለተጎዱ ወገኖች ለሁለቱም ክልሎች የኢትዮጵያ ንግድ ባንክ ሂሳባቸው ለየብቻ በመክፈል በድምር 342,411 የኖርዌይ ክሮነር ገብቷል።

3) በመጨረሻም ባሳለፍነው የየካቲት ወር 2014 ዓም ደግሞ ለአደጋ ስጋት አመራር ኮሚሽን የኢትዮጵያ ንግድ ባንክ አካውንት 525,938 የኖርዌይ ክሮነር በቀጥታ ገቢ ተደርጓል።

ባጠቃላይ በኖርዌይ የሚገኙ ኢትዮጵያውያን እና የኢትዮጵያ ወዳጆች በዘጠኝ ወራት ውስጥ የምንዛሪ ጊዜው በተለያየ ጊዜ እንደተላከበት ወቅት ቢለያይም ወደ 1ነጥብ 2 ሚልዮን የኖርዌይ ክሮነር ወይንም ከ7 ሚልዮን ብር በላይ ወደ ሃገር ቤት በኢትዮጵያ ንግድ ባንክ በኩል አስገብተዋል።

ከእዚህ በታች በኖርዌይ የሚኖሩ ኢትዮጵያውያን ለላኩት ገንዘብ ተቀባይ ተቋማት የላኩት የምስጋና ደብዳቤ ያገኛሉ።ከላይ ከተላከው ገንዘብ ላይ በጣም አነስተኛ ገንዘብ ለባንክ ቻርጅ ተከፍሏል።የምስጋና ደብዳቤዎቹ በቫይበር ቡድን (ግሩፕ) ላይ ለሕዝብ እንዲያውቀው የተሰራጩ ሲሆን ሁሉም ገንዘብ ከኖርዌይ ወደ ኢትዮጵያ በቀጥታ የባንክ ለባንክ ስዊፍት ማስተላለፍያ መንገድ የተላከ  ነው።በኖርዌይ የሚኖሩ ኢትዮጵያውያን ቁጥራቸው አነስተኛ ቢሆንም ያደረጉት አስተዋጾ ግን የሚናቅ አይደለም።


ከአፋር ክልል የተላከ የምስጋና ደብዳቤ

ለዓባይ ግድብ የተዋጣ ምስጋና ከኢትዮጵያ ንግድ ባንክ




ከአማራ ክልላዊ መንግስት የተላከ የምስጋና ደብዳቤ




የአደጋ ሥጋት አመራር ኮሚሽን የምስጋና ደብዳቤ



Monday, March 14, 2022

አስቸኳይ! የተፈናቃዮችን ችግር ለመፍታት እና በከተሞች የሰራተኛው ኑሮ ለማሻሻል መንግስት ቀላል የሆኑ 3 ቁልፍ ሥራዎችን በፍጥነት ይስራ!

አስቸኳይ! 
===========
የጉዳያችን መልዕክት
===========

ኢትዮጵያ ያለፈውን፣አሁን ያለችበትን እና መጪውን በሚገባ ፈትሻ ወደፊት ለመሔድ የመንደርደርያዋ ጊዜ አሁን ነው። ፖለቲካ መንግስትን መቃወም ብቻ አድርጎ የሙሉ ጊዜ ሥራ መሆን የለበትም።መንግስትም የስልጣን ወንበር ላይ በመቀመጡ ሁሉ ነገር አልጋ በአልጋ ነው፣ኢትዮጵያ ፀሓይ በፀሓይ ነች የሚል ንግግሮች መቀነስ አለበት።

የድኅነት መጠኑ ቀላል አይደለም። በቀላሉ ስሌት ሁሉ ነገር እንዳለ ሆኖ ቢሆን እንኳን ህዝቡ ያለበት ቀላል የኑሮ ትግል አይደለም።በኢትዮጵያ ግን ነገሮች ሁሉ እንዳሉ አይደሉም።ከባድ የጦርነት እና የኮቪድ ወረርሽኝ ውስጥ አልፈናል። በኢትዮጵያ የሚሰሩ ፈጣን ተግባራት የሃገሪቱን መጪ ዕጣ የሚወስኑ ናቸው።በመቶ ሺዎች ከቀያቸው ተፈናቅለዋል። ሌሎች መቶ ሺዎች ስጋት አለባቸው።ሚልዮኖች ሥራ አጥ ናቸው።በተለይ በከተሞች ያለው የሥራ አጥ ችግር በቀላሉ የሚታይ አይደለም።ለእነኝህ ሁሉ ችግሮች ብዙ ምክንያቶች መዘርዘር ቢቻልም አንዱ እና ዋናው የክልል እና ብሄር ተኮር አጥሩ ወጣቶች ተንቀሳቅሰው በፈለጉት ክልል እንዳይሰሩ ማድረጉ እና የምርት ገበያ ፍሰቱ የተሳለጠ አለመሆኑ የሚሉት ተጠቃሽ ናቸው።ይህ ሁኔታ ለረጅም ጊዜ ሊቆይ አይችልም።በውስጥ ኢትዮጵያን ለማተራመስ ከፍተኛ የማቴርያል እና የገንዘብ እንዲሁም የሙያ ድጋፍ የሚያገኙ በኢትዮጵያውያን ጊዜያዊ ችግሮች በማስፋት ሃገሪቱ እንዳትረጋጋ የሚጥሩ ሃይሎች ኢትዮጵያን ወደ አልተፈለገ አቅጣጫ እንዳይወስዷት መንግስት መስራት ያለበት ወሳኝ ተግባራት አሉ።

ወቅታዊ ችግሮችን ለመፍታት መንግስት ማድረግ ያለበት 3 ተግባሮች

በኢትዮጵያ ያለውን በመቶ ሺዎች የሚቆጠሩ ከትግራይ እስከ ወለጋ፣ከቤኒሻንጉል እስከ ባሌ የተፈናቀሉ ወገኖችን ችግር ለመፍታት እና ወቅታዊውን የከተሞች የኑሮ ውድነት ለመቅረፍ የሚከተሉትን ሦስት ተግባራት መከወኑ እንደሃገር ጥቅም አለው።

1) የተፈናቃዮች አስመላሽ ብሔራዊ ኮሚቴ በፍጥነት መመስረት 
  • ተፈናቃዮች እየገጠማቸው ያለው ችግር የዕለት ተደራሽ እርዳታ ብቻ አይደለም።ጉዳያቸውን ከሌላ የመንግስት ሥራ በተለየ የሚመለከት ባለስልጣን እና ቢሮ የማጣት ግዙፍ ችግርም ጭምር ነው። ይህ ትልቅ ስብራት ነው።ጎዳና የወጣ ዜጋ ቢያንስ የሚያደምጠው ሰው ሊያጣ አይገባም።ለእዚህ በቅርቡ ከወለጋ የተፈናቀሉ ኢትዮጵያውያን ከአዲስ አበባ እስከ አርሲ እና ደብረብርሃን የተንከረታተቱበት ሂደት በሃገር ውስጥ መገናኛ ሁሉ የተዘገበውን መመልከት ይቻላል። የሚያደምጣቸው የለም።ሃላፊነት የሚወስድ የለም።
  • በመሆኑም ይህ ብሔራዊ ኮሚቴ የማስፈጸም አቅሙ በቶሎ በህግ ተሰጥቶት ሊንቀሳቀስ እና በሁሉም ክልሎች ከትግራይ የመጡትን ጨምሮ የአጭር ጊዜ ፕሮግራም አዘጋጅቶ ወደ ሥራ መግባት አለበት።
  • ኮሚቴው ከሙሰኝነት የጸዱ እና ብሄራዊ ሃብት በማዕከል የሚያሰባስቡ ታማኝ ሰዎች መያዝ አለበት።
  • በስራው ላይ የመከላከያ አባላት መሳተፋቸው የሰው ኃይል እንቅስቃሴው ፈጣን ያደርገዋል።በህዝቡ እና በመከላከያ መሃል ያለውን ግንኙነትም ያጠነክራል።
2) የከተሞች የኑሮ ውድነትን ችግር ለመፍታት የሚከተሉት 2 ተግባሮች መስራት ይችላል።

እነርሱም 
        ሀ) ለመንግስት እና የግል ሰራተኞች የሰራተኛ ማኅበራት ለሰራተኛው መሰረታዊ ፍላጎት በቅናሽ በጅምላ ሸቀጦችን እየገዙ እንዲያከፋፍሉ ማድረግ።

አሁን ባለው ሁኔታ የሸማቾች ማኅበር ለህዝቡ የሚያከፋፍለው በትክክል ለባለ ተጠቃሚው እንዳይደርስ የሆነው ነጋዴው በጉቦ ስለሚሸምት እና መልሶ በትርፍ ስለሚሸጥ ነው። ይህ ማለት በከተማ ያለውን ትክክለኛ ተጠቃሚ ለማኘት ቢያንስ የመንግስት ሰራተኞች እና የግል ሰራተኞች በቅናሽ የሚያገኙበት መንገድ በሰራተኛ ማኅበሮቻቸው በኩል ቢመቻች ቀሪው ለፍቶ አዳሪን የሚሻማው ሳይኖር የማግኘት ዕድሉ ይጨምራል።የመንግስት እና የግል ሰራተኞች የቤተሰብ ብዛት እያስመዘገቡ የመሰረታዊ ሸቀጦች ማድረስ በሚልዮን የሚቆጠር ቤተሰቦቻቸው ስለሚጠቅም ቀላል የዋጋ ለውጥ አያመጣም።

    ለ) መንግስት ፈጣን ቤቶች እየሰራ በኮንትራት ለሰራተኞች ማከራየት መጀመር አለበት።

ይህ መንግስት በሁሉ ቦታ እየገባ የሚለው የኢኮኖሚ ፍልስፍና እራሱ የፍልስፍናው ሰሪዎችም አይጠቀሙበትም።ማኅበራዊ እና ምጣኔ ሃብታዊ ችግሮች የሚፈቱት ከህዝብ በተሰበሰበ ቀረጥ ነው።ይህ የቀረጥ ገንዘብ ደግሞ ያለው መንግስት ጋር ነው።በእዚህ ዓይነት መንግስት ወደገበያው ሲገባ የግል የቤት ኪራይ ይቀንሳል።ገበያውን ያረጋጋል።አሁን ባለው ሁኔታ መንግስት ከአዲስ አበባ ወጣ ያሉ አካባቢዎች ላይ ፈጣን ቤቶች በመስራት የትራንስፖርት ሁኔታ ማመቻቸት ይችላል።

 3) ወቅታዊ (Seasonal) የእርሻ የስራ ዕድሎች ለከተማው ወጣት መፍጠር 

በኢትዮጵያ ሁለት የዝናብ ወቅቶች አሉ።በእነኝህ ጊዜዎች የከተማ ነዋሪ ወጣቶች በከተማ ሥራ መፈለግ ላይ ብቻ ሳይሆን ለአንድ ዓመት ተከራይተው የመረጡትን የሰብል ዓይነት ዘርተው በአንድ ዓመት ሰብስበው እና ሸጠው ወደ ከተማ የሚመለሱበት መንገድ ማመቻቸት ይቻላል። ይሄውም በከተማ በማኅበር ተደራጅተው የሥራ ዕድል እንደሚፈጠረው ሁሉ ከከተሞች ውጭ የሆኑ ባዶ ቦታዎች ለተደራጁ ወጣቶች ለአንድ ዓመት ወይንም በበለጠ ጊዜ በማከራየት እና ብድር እንዲያገኙ በማድረግ ሰብል አምርተው ሸጠው በአንድ ዓመት ውስጥ እንዲመለሱ ማድረግ ነው።ይህ ማለማመድ ወጣቶች የግብርና ምርት ምን ያህል ሃብት እንደሚያስገኝ ሲያውቁ እንዲገፉበትም መንገድ የሚያመቻች ነው።

ይህ ስራ ለምሳሌ በመጪው ዓመት ወደ ኮሌጅ የሚገቡ ወጣቶች የ12ኛ ክፍል መልቀቅያ ፈተና ከወሰዱ በኋላ ወደ ኮሌጅ ከመግባታቸው በፊት የተወሰነ ገንዘብ አግኝተው ወደ ከተማ የሚመለሱበት ሥራ ሊሆን ይችላል።በእዚህም በከተማ ያለውን የሥራ አጥ ቁጥር በተወሰነ ደረጃ ያቅልላል።ወጣቶች ግብርናው ምን ያህል ሃብት እንደሚያፈራላቸው ሞክረው እንዲረዱ ያደርጋል።የተሳካላቸው ወጣቶች ደግሞ ምሳሌ ሆነው ሌሎችን ይስባሉ። እዚህ ላይ ወጣቶቹ ለሚወስዱት ብድር እና ለእርሻቸው የመድን ዋስትና እንዲገቡ በማድረግ መተማመናቸው እንዲጨምር ያደርጋል። ለእዚህም ክልሎች የእርሻ ቦታዎችን እና ለወጣቶቹ የመኖርያ ቦታ ማዘጋጀት ይችላሉ።ይህ ሥራ ወደ መስኖ ሥራ ሲገባ የሚያወጣው ውጤት ቀላል አይደለም።ከእዚህ ጋር አብሮ የሚታየው የቀላል ኢንዱስትሪ ማስፋፋት ሥራ አብሮ የሚቀጥል ይሆናል።ከተሞች ላይ ያሉ አስፈላጊ ዕቃዎች ወጣቶቹ በቀላል ኢንዱስትሪ የማምረት ሥራ በማስፋፋት ከግብርናው ጎን ሊያስኬዱት ይችላሉ።

ለማጠቃለል አሁን መንግስት በተፈናቃዮች አንጻር የሚታየውን የተዝረከረከ አሰራር ለመፍታት በብሔራዊ ደረጃ በተቋቋመ ኮሚቴ መመራት፣የከተሞችን የኑሮ ችግር ለመቅረፍ የመንግስት እና የግል ድርጅቶች ሰራተኞች ላይ ያተኮረ ሥራ መስራት እና ወቅታዊ የግብርና ሥራ ላይ ወጣቶች እንዲሰማሩ የዝናብ ወቅቱ ሳያልፍ ከአሁኑ ማደራጀት ላይ መስራቱ ጠቃሚ ነው።ይህንን እና የመሳሰሉት ተግባራት ላይ ማትኮር ካልተቻለ የሕዝብ አለመረጋጋት ወደ የሰላም መደፍረስ ሊያመራ ይችላል።የኢትዮጵያ ጠላቶች ደግሞ የሚፈልጉት ኢትዮጵያ ወደ ነበረችበት የውጥረት ሜዳ እንድትገባ ነው።ስለሆነም እርምጃዎቹ ጠቃሚዎች ናቸው።
=============///==========



  



Sunday, March 13, 2022

የብልፅግና ፓርቲ የሦስት ቀን ጉባዔውን ፈጽሟል።አርባ አምስት የስራ አስፈፃሚ አባላት መርጧል።የተመረጡ የሥራ አስፈፃሚ ዝርዝሩን ይዘናል።

ጉባዔው በከፊል (ፎቶ ፋና ብሮድካስቲንግ ኮርፖሬሽን)
==============
ጉዳያችን/Gudayachn
==============
  • ብልፅግና ፓርቲ ከብሔር ተኮር የፖለቲካ ፓርቲነት ይልቅ ሕብረ ብሔራዊ ፌድራል የፖለቲካ ፓርቲ እንደሚሆን ገልጿል።
  •  የኢትዮጵያ ኦርቶዶክስ ተዋኅዶ ቤተክርስቲያን በተመለከተ መንግስት በቤተክርስቲያን ጉዳይ እንደማይገባ በሕገ መንግስቱ የተደነገገ መሆኑን አንቀጽ ጠቅሰው የገለጡት የፓርቲው ፕሬዝዳንት እና ጠቅላይ ሚንስትር ዐቢይ ነገር ግን  መንግስት ሲወጣ ተቃዋሚዎች ይግቡ ማለት አይደለም ብለዋል።
  • የሥራ አስፈጻሚ ኮሚቴ አባላት ሰኞ መጋቢት 5፣2014 ዓም የመጀመርያ ስብሰባውን ያደርጋል።
ባለፈው ዓመት ምርጫ ያሸነፈው ገዢው የብልፅግና ፓርቲ ጠቅላላ ጉባዔውን ከመጋቢት 2 እስከ 4፣2014 ዓም በአዲስ አበባ አድርጓል።ጉባዔው ፕሬዝዳንቱን እና ምክትል ፕሬዝዳንቱን የመረጠ ሲሆን በእዚሁ መሰረት ጠቅላይ ሚኒስትር ዐቢይ አሕመድ የፓርቲው ፕሬዝዳንት፣ አቶ ደመቀ መኮንን እና አቶ አደም ፋራህ በምክትል ፕሬዝዳንትነት የተመረጡ ሲሆን ፓርቲው ብልፅግና ፓርቲ ከብሔር ተኮር የፖለቲካ ፓርቲነት ይልቅ ሕብረ ብሔራዊ ፌድራል የፖለቲካ ፓርቲ እንደሚሆን ገልጿል።

ፓርቲው በመጨረሻ ቀኑ ስብሰባ ላይም የማዕከላዊ እና የስራ አስፈፃሚ ኮሚቴ አባላትን የመረጠ ሲሆን በእዚህ መሰረት ለማዕከላዊ ኮሚቴ አባል የሚሆኑ መስፈርቱን አስቀምጧል። ይሄውም ለማዕከላዊ ኮሚቴ አባል የሚሆን ሰው ሊኖሩት ከሚገቡት መስፈርቶች ውስጥ የሚከተሉት በስብሰባው ላይ ተገልጸዋል። 

1) ቢያንስ የመጀመርያ ዲግሪ ያለው፣
2) የፖሊሲና ስትራቴጂ ጉዳዮች የሚረዳ፣
3) የወደፊቱን አሻግሮ መመልከት የሚችል፣
4) ከማናቸውም ዋልታ ረገጥ የጽንፍ አስተሳሰብ የራቀ፣
5) በስነምግባር የታነጸ፣
6) በኢትዮጵያ አንድነት የሚያምን የሚሉት ይገኙበታል።

በስብሰባው ላይ በፓርቲው ፕሬዝዳንት እና ጠቅላይ ሚኒስትር ዐቢይ አሕመድ የምጣኔ ሃብት እና ሌሎች ወቅታዊ ጉዳዮች ላይ የተሰጡ ማብራርያዎችም ነበሩ።ከጠቅላይ ሚኒስትሩ ከተነሱት ጉዳዮች መሃል ኢትዮጵያ ወቅታዊውን የዓለም ሁኔታ ተጠቅማ ለማደግ ያላትን መንገድ በቶሎ መጠቀም እንዳለባት ሲጠቅሱ ''የዓለም ወቅታዊ ሁኔታ አይሸታችሁም? ይህንን ዓይነት ሁኔታ ተጠቅመው የሚሰሩ ሃገሮች ናቸው ሊያድጉ የሚችሉት '' በማለት ጠቁመዋል። በሌላ በኩል የኢትዮጵያ ኦርቶዶክስ ተዋኅዶ ቤተክርስቲያን በተመለከተ መንግስት በቤተክርስቲያን ጉዳይ እንደማይገባ በሕገ መንግስቱ የተደነገገ መሆኑን አንቀጽ ጠቅሰው የገለጡት የፓርቲው ፕሬዝዳንት እና ጠቅላይ ሚንስትር ዐቢይ ነገር ግን  መንግስት ሲወጣ ተቃዋሚዎች ይግቡ ማለት አይደለም ብለዋል።


 በምርጫው ላይ የዕጩ ጥቆማ የተደረገው ሌላው ክልል ለሌላ ክልል ዕጩ መሆኑ የብሔር ተወላጅ ብቻ የራሱን ብሔር ባብዛኛው ያልጠቆሙበት ሂደት ታይቷል።
ጉባዔው በመጨረሻ ቀን ስብሰባው የአቋም መግለጫ ያወጣ ሲሆን  225 የማዕከላዊ ኮሚቴ አባላት እና 45 ሥራ አስፈፃሚ አባላትን መርጧል።በእዚህ መሰረት ከእዚህ በታች ያሉት ለሥራ አስፈፃሚነት ተመርጠዋል። እነርሱም፣

በዚሁ መሰረት የፓርቲው ስራ አስፈጻሚ ኮሚቴ አባላት የሚከተሉት ናቸው፦

1. ዶ/ር ዐቢይ አሕመድ
2. አቶ አደም ፋራህ
3. አቶ ደመቀ መኮንን
4. አቶ ደስታ ሌዳሞ
5. ዶ/ር ፍጹም አሰፋ
6. አቶ አብርሃም ማርሻሎ
7. አቶ አሻድሊ ሀሰን
8. አቶ ጌታሁን አብዲሳ
9. አቶ ኡሙድ ኡጁሉ
10. አቶ ተንኳይ ጆክ
11. አቶ ኦርዲን በድሪ
12. አቶ አሪፍ መሃመድ
13. ዶ/ር አብርሃም በላይ
14. ዶ/ር ሊያ ታደሰ
15. ሀጂ አወል አርባ
16. ሀጅሊሴ አደም
17. አቶ ኤሌማ አቡበከር
18. ወ/ሮ ሀሊማ ሀሰን
19. አቶ ሙስጠፌ መሀመድ
20. አቶ አህመድ ሽዴ
21. ዶ/ር ነጋሽ ዋጌሾ
22. አቶ ፀጋዬ ማሞ
23. ወ/ሮ ሙፈሪያት ካሚል
24. አቶ ተስፋዬ በልጅጌ
25. አቶ ርስቱ ይርዳው
26. አቶ ተስፋዬ ይገዙ
27. አቶ ሞገስ ባልቻ
28. አቶ ጥላሁን ከበደ
29. አቶ መለሰ ዓለሙ
30. አቶ ሽመልስ አብዲሳ
31. አቶ ፍቃዱ ተሰማ
32. ዶ/ር አለሙ ስሜ
33. ወ/ሮ ጫልቱ ሳኒ
34. አቶ አወሉ አብዲ
35. አቶ ሳዳት ነሻ
36. ወ/ሮ አዳነች አቤቤ
37. ዶ/ር ኢዮብ ተካልኝ
38. ዶ/ር ቢቂላ ሁሪሳ
39. ዶ/ር ይልቃል ከፍያለ
40. ወ/ሮ ዳግማዊት ሞገስ
41. አቶ ተመስገን ጥሩነህ
42. አቶ መላኩ አለበል
43. ወ/ሮ አይናለም ንጉሴ
44. ዶ/ር ሰማ ጥሩነህ
45. አቶ ግርማ የሺጥላ ናቸው።

የሥራ አስፈጻሚ ኮሚቴ አባላት ሰኞ የመጀመርያ ስብሰባውን እንደሚያደርግ ለማወቅ ተችሏል።

Tuesday, March 8, 2022

የሴቶች ቀን ማርች 8 በሚከበርበት በዛሬዋ ኢትዮጵያ በኢትዮጵያ ዩንቨርስቲዎች የሚማሩ ሴት ተማሪዎች ዩንቨርስቲዎቻቸው እጅግ አስፈሪ እንደሆኑባቸው ስንቶቻችን እናውቃለን?



    • ለክብርት ፕሪዝዳንት ሣህለወርቅ ዘውዴ፣
    • የትምሕርት ሚንስትር ፕሮፌሰር ብርሓኑ ነጋ፣
    • የኢፌዴሪ የሴቶችና ማህበራዊ ጉዳይ ሚኒስትር ክብርት ዶ/ር ኤርጎጌ ተስፋዬ፣
    • ክብርት የፌድራል ጠቅላይ ፍርድ ቤት ፕሬዝዳንት  መዓዛ አሸናፊ እና ሌሎች
 ይህ ጉዳይ እጅግ አሳሳቢ እና ወቅታዊ ነው። አፋጣኝ መፍትሄ ይፈልጋል።

==========
ጉዳያችን ልዩ ዘገባ
==========

ኢትዮጵያ አሁን ካደጉ ሃገሮች ሁሉ በተሻለ የሴቶች ትልልቅ ሚናዎች በፖለቲካም ሆነ በአመራር ደረጃ የወጡባት ሃገር ነች። እትዮጵያ ከክርስቶስ ልደት በፊት 700 ዓመት በፊት በእስራኤል የነገሰው ንጉስ ሰለሞንን ለመጎብኘት የሄደችው ኢትዮጵያዊት ንግስት ሳባ ትመራት የነበረች ሃገር ነች።የአክሱም መንግስትን ያፈረሰች እና  በ9ኛው ክ/ዘመን በኢትዮጵያ ከፍተኛ ጥፋት ያመጣችው ዮዲት ጉዲትም ሴት ነበረች። በኋላም በየዘመኑ ከተነሱት ንግስት ዕሌኒ፣ንግስት ጣይቱ፣ንግስት ዘውዲቱ ሁሉ የኢትዮጵያ መሪዎች ሆነው አልፈዋል።ለምሳሌ ንግስት ዘውዲቱ በነገሱበት የ20ኛው ክ/ዘመን የመጀመርያ ዓመታት ላይ የኢትዮጵያ መሪ ሲሆኑ በአውሮፓ ብዙ ሃገሮች ሴቶች ስራ ወጥተው የማይሰሩበት እና የመምረጥ መብታቸው ብቻ ሳይሆን የመማር ዕድል በማይፈቀድላቸው ዘመን ነበር።

 ዛሬ ማርች 8 የሴቶች ቀን ነው።ቀኑ በኢትዮጵያ እየተከበረ ነው።የአከባበሩ ታሪክ የሚነሳው ወደኋላ 100 ዓመታት ይጓዛል።እንደ አውሮፓውያኑ 1908ዓም  በኒውዮርክ ከተማ ነዋሪ የሆኑ 15,000 ሴቶች የተሻሻለ የሥራ ሰዓትና የደመወዝ ክፍያን እንዲሁም የመምረጥ መብታቸው እንዲከበር ጠይቀው አደባባይ ወጡ። ከአንድ ዓመት በኋላ በአሜሪካ በብሔራዊ ቀንነት አወጀ።በዓሉ ዓለምአቀፋዊ ሆኖ እንዲከበር ክላራ ዚክተን የተባለች ሴት በ1910 ዓም እአአ በዴንማርክ ዋና ከተማ ኮፐንሃገን በተደረገ ዓለምአቀፍ ስብሰባ ላይ ሃሳቡ ቀረበ። በእዚህም ከ17 ሃገራት የተውጣጡ 100 ተሳታፊ ሴቶች በሃሳቡ ተስማሙ። በመቀጠል በ1911 ዓም እአቆጣጠር በዓሉ በኦስትርያ፣ዴንማርክ፣ጀርመንና ስዊዘርላንድ በዓሉ መከበር ጀመረ።በዓሉ በተሟላ ደረጀ ዓለምአቀፋዊ መልኩን የያዘው እንደ አውሮፓ አቆጣጠር በ1975 ዓም የተባበሩት መንግስታት ድርጅት የሴቶች ቀንን ሲያከብር ነበር።

በኢትዮጵያ በወታደራዊ መንግስት ጊዜ ከሶሻሊዝም ርዕዮት ጋር እየትጠቀሰ መከበር ጀመረ።በወቅቱ የአብዮታዊት ኢትዮጵያ ሴቶች ማኅበር (አኢሴማ) በሚል በብሔራዊ ደረጃ ኢስከ ቀበሌ ድረስ መዋቅር ያለው ነበር።ይህ አደረጃጀት ግን ነጻ አደረጃጀት ባለመሆኑ እና የመንግስት ውሳኔ አስፈጻሚ ብቻ ሳይሆን የካድሬነት ተግባሩ ማመዘኑ እንደማኅበር ጸንቶ መቀጠል አልቻለም።

በዘመነ ህወሃት/ኢሃዲግ የሴቶች መብት ጉዳይ ይህንን ያህል የተሻለ ለውጥ አልታየበትም።ለሩብ ክፍለዘመን ያህል አንዳች ይህ ነው የሚባል ብሄራዊ የሴቶች ማኅበር የለም።አንድ በጉልህ ሥራ የሚነሳው በራሳቸው አነሳሽነት የተነሳሱ የኢትዮጵያ የህግ ባለሙያ ሴቶች ማኅበር የሰሩት አመርቂ ውጤት ተጠቃሽ ነው። ማኅበሩ በሺህ የሚቆጠሩ ሴቶች ነጻ የሕግ ምክር እና ጥብቅና የቆመ እንዲሁም ሴቶች የተመለከቱ የሕግ ክፍተጎች እንዲስተካከሉ ለፖሊሲ አውጪዎች በመቀስቀስ ትልቅ ሥራ ሰርተዋል። ሆኖም ግን የህወሃት/ኢሃዴግ መንግስት ማኅበሩን አላሰራውም።በሚልዮን የሚቆጠር ከበጎ አድራጊዎች ያገኘውን ገንዘብ በፍርድቤት አግዶ በክልሎች ያሉትን ቢሮዎች እንዳያንቀሳቅስ ከጉዞው ሊያደናቅፈው ሞክሯል።

ከህወሃት ወደ መቀሌ መሸሽ በኋላ የጠቅላይ ሚኒስትር ዐቢይ አስተዳደር አዲስ ምዕራፍ የሚከፍቱ እርምጃዎች ወስደዋል። የኢትዮጵያ ፕሬዝዳንት፣የፍትሕ መስርያቤቱ ከፍተኛ ባለስልጣን፣የምርጫ ቦርድ ሰብሳቢ እና በሚንስትር ደረጃም ቁጥራቸው ከቀድሞው ላቅ ባለ መልክ ወደ ስልጣን እርከን መጥተዋል።

በኢትዮጵያ የሴቶች ችግሮች እጅግ ብዙዎች ናቸው።በእዚህ ጽሑፍ ግን የሚተኮርበት በኢትዮጵያ ሴት ዩንቨርስቲዎች የሚማሩ ተማሪዎች ዩንቨርስቲዎቻቸው አስጨናቂዎች እና ምቹ እንዳልሆኑ ይህም በምን ያህል ደረጃ በሴቶች የትምሕርት ስኬት ላይ ተጽዕኖ እንዳለው በሚገባ አለመታየቱን መጠቆም ነው።ይህንን አስመልክቶ ጉዳያችን በአንድ ዩንቨርስቲ የደረሰ በሴት ተማሪ ላይ የደረሰ በደል ከሰማች በኋላ አንድ መጠነኛ የመረጃ ማሰባሰብ ስራ በኢትዮጵያ በሚገኙ አምስት ዩንቨርስቲ ተማሪዎች ላይ ዩንቨርስቲዎቻቸው በምን ያህል ደረጃ ለሴቶች ምቹ ናቸው? በሚል ጥያቄ አቅርባ ነበር።በእዚህ መሰረት እጅግ የሚያስደነግጥ ሁኔታ ላይ እንዳለን የሚያሳይ ስዕል ለማግኘት ተችሏል።

በዩንቨርስቲዎች ውስጥ የተፈጸሙት እና በሴቶች ላይ ሽብር በሚባል ደረጃ ወንጀል እየተሰራ ለመሆኑ አመላካች ነው።በዩንቨርስቲዎቹ ውስጥ ሴቶች ከእዚህ በታች ያሉትን ማድረግ እንደማይችሉ ወይንም እንደሚፈጸምባቸው በእዚህም ሳብያ ሴት ተማሪዎች እጅግ እንደሚጨነቁ ይህም ጭንቀት ዩንቨርስቲውን ለቀው እስከሚወጡ ድረስ የስነልቦና ችግርም እንደሚያስከትልባቸው ለመረዳት ተችሏል።በሰሞኑ በተደረገው መጠነኛ ዳሰሳ በተገኘው መረጃ መሰረት የሚከተሉትን ችግሮች በዋናነት መጥቀስ ይቻላል።
  • በአንድ የታወቀ ዩንቨርስቲ ውስጥ ሴቶች መጻሕፍት ቤት አምሽተው ፈጽሞ ወደ ዶርማቸው መምጣት አይችሉም።ዩንቨርስቲው ግቢ እና ጥበቃ ባለው በእዚህ ዩንቨርስቲ ውስጥ ሴት ተማሪዎቹ የሚፈሩት ከተማሪዎች በላይ የዩንቨርስቲው ጥበቃዎችን እና የምግብ ቤት ሰራተኞችን ነው።በአንድ ዩንቨርስቲ ውስጥ የዩንቨርስቲው ጥበቃዎች ተማሪዎችን መድፈራቸው በተማሪውም በዩንቨርስቲው ሰራተኞችም ዘንድ የታወቀ ነው።
  • በአንድ ዩንቨርስቲ ውስጥ የተማሪዎች የምግብ ቤት ኃላፊ የሴት ተማሪዎችን የመመገብያ ካርድ ቀምቶ በግል ስልካቸው ላይ እየደወለ ከስነምግባር የወጣ ጥያቄ አቅርቧል። በእዚህ ተግባር የተጨነቁ ተማሪዎች የሆነውን በዶርማቸው ላሉ ተማሪዎች ሳይናገሩ እንደሚደብቁ ታውቋል።
  • በብዙ ዩንቨርስቲዎች ውስጥ ሴት ተማሪዎች ኮምፕዩተር ይዘው ግቢው ውስጥ መታየት ይፈራሉ።በግቢ ውስጥ ብቻ ሳይሆን ዶርማቸው ውስጥ ኮምፕዩተራቸውን ይዘው ቢገቡ ጥበቃ የሚያደርግላቸው የለም።የሴቶች ዶርሞች ምሽት ላይ ተሰብረው ኮምፕዩተር እና ሞባይሎች ይወሰዳል። አንዳንዶቹ ጋር ፊታቸውን ሸፍነው በሚመጡ ሌቦች ነው የሚዘረፉት።
  • በብዙ ዩንቨርስቲዎች ውስጥ መምሕራን ተማሪዎችን በጾታቸው ብቻ በውጤቶቻቸው እና የመመረቅያ ጽሁፎቻቸው ላይ ተጽዕኖ ያደርሱባቸዋል።
  • ተማሪዎቹ ወደ ዩንቨርስቲ ቢሮዎች የሚፈልጉትን አገልግሎት ለማግኘት ሲሄዱ በብዙ ቦታዎች ሴቶች ተማሪዎችን በንቀት እና ሥርዓት አልባ በሆነ መንገድ የሚያስተናግዱ በርካታ ሰራተኞች አሉ።
  • ለሃይማኖታዊ ስርዓት አካባቢያቸው ወደሚገኝ ቤተ ክርስቲያን ወይንም መስጊድ ለመሄድ በአለባበሳቸው ምክንያት አንዳንድ ዩንቨርስቲዎች ያሉ የጥበቃ ሰራተኞች የወጣውንም ያልወጣውንም ሕግ እንደፈለጉ እየተረጎሙ ሴቶች ተማሪዎችን ያጉላላሉ።
  • ሴቶች ተማሪዎች ዩንቨርስቲ አካባቢ ወደየሚገኙ ሱቆች ወጥተው ዕቃ ለመግዛት በጣም ይሳቀቃሉ።ምክንያቱም በሱቆቹ አካባቢ ያሉ ለደህንነታቸው ስጋት የሆኑ ወጣቶች አሉ።
  • አንዳንድ ዩንቨርስቲ የሚገኙባቸው ክልሎች የጸጥታ ኃይሎች ዋና የጥቃት ኢላማዎቻቸው ወደ ከተማው የሚመጡ የዩንቨርስቲ ተማሪዎች ሲሆኑ ይህ ሁኔታ ደግሞ በከተማዎቹ አስተዳደሮች እና የዩንቨርስቲ አመራሮች ጭምር የሚታወቅ ግን ምንም እርምጃ ያልተወሰደባቸው ናቸው።
በእነኝህ ሁሉ ተጽዕኖዎች ሳብያ ሴት የዩንቨርስቲ ተማሪዎች 
  • የዩንቨርስቲ ከባቢያዊ የትምህርት ሁኔታ አስጨናቂ ሆኖባቸዋል።በእዚህ ሳብያ የትምህርት ውጤታቸው የሚቀንስ ብቻ ሳይሆን የሚያቋርጡ እንደሚኖሩ መገመት ቀላል ነው። ለመኖሩ መገመት ቀላል ነው።
  • አንገታቸውን ደፍተው በዩንቨርስቲው ውስጥ መቆየት እንደ ብልሃት እየተወሰደ ነው።
  • አዳዲስ ሃሳቦችን የማፍለቅ እና ለመብት የመቆም ቆራጥ ስሜት እንዳይኖራቸው አድርጓቸዋል።
  • ችግሩ በዩንቨርስቲዎቹ ውስጥ በሲስተም የተሳሰረ ስለሆነ ብሶታቸውን የሚያሰሙበት እና የሚከሱበት አካል ዩንቨርስቲው ውስጥ የለም።
  • ከእዚህ በፊት በደረሰባቸው በደል ለመክሰስ የሞከሩ በእዚሁ የተሳሰረ ሲስተም ሳብያ የበለጠ መሸማቀቅ ስለደረሰባቸው ሌሎች መብታቸውን እንዳይጠይቁ አድርጓል።
ባጠቃላይ በኢትዮጵያ የሚገኙ ዩንቨርስቲዎች በሴት ተማሪዎች ላይ ያለ ድምጹ ያልተሰማ በደል አለ።ይህ ችግር ወደ የልማት ችግር ሲተረጎም በኢትዮጵያ ሴት ምሑራን ላይ እያደረሰ ያለው ጉዳት እጅግ ግዙፍ ነው።የችግሩ አንዱ መገለጫ ደግሞ ጠንካራ የሆነ ለሴት ተማሪዎች የሚቆም ንቅናቄም ሆነ ሥር የያዘ ስራ አለመኖሩ ነው። የችግሩ ትልቁ መነሻ ግን ከዩንቨርስቲዎቹ ውጭ የሆነ ጥገኛ ያልሆነ አካል ተማሪዎች ያሉባቸውን ችግሮች በምስጢር የሚሰጡበት ልዩ የመገናኛ መስመር ከፍቶ ችግሮቹን ከስሩ ለመንቀል መስራት ነው።በእዚህ ሁሉ ሂደት ውስጥ ግን አንድ ዩንቨርስቲዎች የራሳቸው ጥበቃዎች እና ድጋፍ ሰጪ ሰራተኞች ለተማሪዎቹ አደጋ መሆናቸው አሳዛኝ ነው። ይህንን ችግር ከእዚህ ጠለቅ ባለ መልክ ምርመራ ቢደረግ ብዙ ጉዳዮች ሊገኙ ይችላሉ።ጉዳዩ አንገብጋቢ ነው።

====================///=========

Thursday, March 3, 2022

ዩክሬን፣ዓለም አቀፋዊ ሁኔታ እና ወቅቱ የሚጠይቀው ኢትዮጵያን እና መንግስትን የማገዝ ሃገራዊ ፋይዳው

 
ጠቅላይ ሚኒስትር ዐቢይ እና የተመድ ሊቀመንበር አንቶንዮ ጉቴሬዝ

===========
ጉዳያችን ልዩ ወቅታዊ 
==========

የዓለማችን ሁኔታ ከኮቪድ ወረርሽኝ በመጠኑ መቀነስ ተከትሎ እና የዓለም አቀፍ ኩባንያዎች ገቢ መቀነስ፣የምዕራቡን ዓለም የሚገዳደሩት የቻይና፣ሩስያ እና ቱርክ እንደገና ማንሰራራት ውጥረቶች እየጨመሩ መጥተዋል።ይህም የዓለምን ሥርዓት እንደገና እንዲከለስ ያስገድዳል። ሥርዓቱ ደግሞ በደፈናው አይከለስም።አንድ ዓይነት የጉልበት መፈታተሾች ተካሂደው ወይንም ግልጥ ከሆነ ጦርነት በኋላ የኃይል አሰላለፍ ልዩነት እንደሚኖር አሁን ከመቼውም ጊዜ በላይ ግልጥ እየሆነ መጥቷል።

ዩክሬን እና ዓለም አቀፋዊ ሁኔታ

አሁን በዩክሬን ላይ የዘመተው የሩስያ ጦር ድንገት ደራሽ አይደለም።ቢያንስ ላለፉት አስር ዓመታት በዩክሬን ጉዳይ ላይ ውዝግቡ ተጧጡፎ ነበር።የሶቬት ኅብረት መፍረስን ተከትሎ የራሳቸውን መንግስታት ካወጁት ከስቶንያ ጋር በጦር መሳርያም ሆነ በስንዴ ምርቷ የምትታወቀው እና ከ40 ሚልዮን በላይ ህዝብ ያላት የዩክሬን መሄድ በሩስያ ተቀባይነት አላገኘም።ስለሆነም ወረራው እንደማይቀር ግልጥ መሆኑን በርካታ የዓለም አቀፍ ጸጥታ ጠበብት ሲናገሩ ነው የሰነበቱት። ሩስያ ለእዚህ እንዲመቻት ክረምያን ከደቡብ ዩክሬን በኩል ባህሩን ተሻግራ የያዘችው። ይህ ዩክሬንን የመክበብ ሥራ ነበር።የምዕራቡ ዓለምም ይህንን ቀድሞ አውቋል።ጥያቄው ፑቲን መቼ ነው የሚገቡት? የሚለው ነበር።

''የሩስያ ዘመቻ ለረጅም ጊዜ የታቀደ ነበር'' ይህንን ያሉት የኔቶ ዋና ሰው እና የቀድሞው የኖርዌይ ጠቅላይ ሚኒስትር የንስ ስቶንስበርግ ናቸው። እንደ ባለስልጣኑ አገላለጥ ቀድሞ የታቀደ ለመሆኑ የክሬምያ በሩስያ መያዝ አንዱ ማስረጃ ነው። የምዕራቡ ዓለም ፑቲንን ከመጀመርያው ጀምሮ አመጣጣቸው አላማረውም።ሰውየው ከሩስያው የስለላ ድርጅት ጀምሮ የነበራቸው ልምድ እና በድንገት ወደ ስልጣን ከመምጣታቸው በላይ የስልጣን ዘመናቸውን እያራዘሙ መምጣታቸው ሁሉ አንድ ሊያሳኩት የሚያስቡት ጉዳይ እንዳለ ጥርጣሬ ነበር። የመጀመርያ የምዕራቡ ስልት የሚመስለው ፑቲንን ማቅረብ እና በምጣኔ ሃብቱ መስመርም ቢሆን ሉላዊነት (ግሎባላይዜሽንን) እንዲቀላቀሉ ያሰበ ይመስላል። ለእዚህ ማሳያው ደግሞ የሰባቱ በኢንዱስትሪ የበለጠጉ ሃገሮች ጋር ሩስያ ስምንተኛ ሆና አንድ ሰሞን አብራ ትሰበሰብ ነበር። ሆኖም ይህ ሁኔታ ብዙም አልቀጠለም።የሶርያው ጉዳይ የምዕራቡ እና የሩስያ አስተሳሰብ አንድ አይደለም።ፑቲን በአንድ የቡድን ስምንት ስብሰባ ላይ ''ሶርያ ኢራቅ አይደለችም'' የሚለው አነጋገር የመለያያ ዓረፍተ ነገር ነበረች።በእዚህም ምክንያት ፑቲን የሶርያውን ባሽር አልአሳድን ደግፈው የምዕራቡ ዓለም ደግሞ ተቃዋሚዎቻቸውን ደግፎ ቆመ።

በመቀጠል ሩስያ ክሬምያን ስትወር የአውሮፓ የጸጥታ ሁኔታ አደጋ ላይ ሊወድቅ ነው በሚል ትልቅ ተቃውሞ ተነስቶ ነበር።ይህንንም ተከትሎ የምዕራቡ ዓለም የኢኮኖሚ እቀባ በሩስያ ላይ ጣለ።እቀባው ግን ያን ያህል ውጤት አላመጣም። የባለፈው እቀባ ቀርቶ ባለፈው ሳምንት የተደረገው እጅግ የመረረ የተባለው እቀባ በቀድሞው የአሜሪካ ፕሬዝዳንት ትራምፕ ሳይቀር ተተችቷል።
ትራምፕ በትናንትናው ዕለት በአንድ ህዝባዊ ስብሰባ ላይ ባደረጉት ንግግር የባይደን አስተዳደርን ''ደደቦች ናቸው'' በማለት ቃል በቃል ነው የነቀፏቸው።በእዚሁ ንግግራቸው ላይ ትራምፕ -
'' ትራምፕ ከፑቲን ጋር ነው እያሉ የውሸት የዜና ድርጅቶችን እየሰማችሁ ከረማችሁ።አሁን የእኛ መሪዎች በሩስያ ላይ እቀባ እቀባ ይላሉ።ፑቲን 'ስማርት ነው።አዎን ስማርት ነው።የእኛ መሪዎች ግን ደደቦች ናቸው '' ያሉት ትራምፕ በመቀጠል ''እቀባ የሚሉት ላለፉት ዓመታት እቀባ ምን ለውጥ አመጣ? ከእቀባው የሚያተርፈው ፑቲን ነው።በእዚህ ውጥረት የነዳጅ ዋጋ ጨመረለት።ስለሆነም ፑቲን አስልቶታል'' በማለት ትራምፕ በወቅቱ የአሜሪካ አስተዳደር ላይ ያላቸውን ቅሬታ ገልጠዋል።ንግግራቸው በጭብጨባ የታጀበ ነበር።

እንደእውነቱ ከሆነ የነዳጅ ዋጋ በአንድ ሳምንት ውስጥ ብቻ በበርሜል ወደ 114 ዶላር አሻቅቧል።በእየቀኑም እየጨመረ ነው።ይህም ሆኖ ግን የምዕራቡ እቀባ በሩስያ ላይ ከእዚህ በፊት ተሰምቶ በማይታወቅ ደረጃ ነው እየገፋበት ያለው።ለምሳሌ በዓለም አቀፍ ደረጃ በሃገሮች ላይ ሲጣል ያልታየው የባንክ ስዊፍት ማስተላለፍያ ከመዝጋት ጀምሮ የሩስያ የሆኑ ሹፌሮች እንዳይንቀሳቀሱ እስከማድረስ ደርሷል።የሩስያ ባለሃብቶችም በአንጻሩ የራሳቸውን መንገድ እየተከተሉ ያለ ይመስላል።ለምሳሌ በትናንትናው ዕለት ሩስያዊው የቼልሲ ክለብ ባለቤት ሮማን አብራሞቪች፣ክለቡን እንደሚሸጡ ገልጠዋል።ሰሞኑን እቀባውን አስመልክቶ ለቢቢሲ ዓለም አቀፍ አገልግሎት አስተያየቱን የሰጠ የሩስያ ጉዳይ አጥኚ እንደገለጡት የሩስያ ኩባንያዎች እና ህዝቡ በሩስያ ባንኮች ከ50 ቢልዮን ዶላር በላይ ተቀማጭ አለ።ህዝቡ የውጭ ምንዛሪውን በሃገሩ ባንክ ሲያስቀምጥ እንደነበር አብራርተዋል። ይህ ማለት ግን ከበረራ እቀባ እስከ የባንክ ማስተላለፍ እገዳ የዘለቀው የምዕራቡ እቀባ ሩስያን ምንም አይጎዳም ማለት አይቻልም።ሆኖም ግን በእዚህ ዓይነት ከቀጠለ ፑቲን ጦርነቱን ወደ የተቀረው አውሮፓ ወይንም ከናቶ ውጭ ወደ ሆነ ሌላ ሃገር በድንገት ሊያስፋፉት ይችላሉ።ለእዚህም የእቀባው መስፋት እንደ አንድ ምክንያት ተወስዶ ሩስያ በኢኮኖሚ ከመድቀቅ የኢኮኖሚ መድቀቁን ወደ ምዕራቡ ማስፋፋት አለብኝ ያለኝ አማራጭ ይህ ብቻ ነው የሚል ድምዳሜ ላይ እንዳይወስዳት ያሰጋል።ስለሆነም የምዕራቡ ዓለም እቀባውን ሙሉ በሙሉ ወደ መዝጋት መሄዱ ሰላም ላያመጣ እንደሚችል መገመት ይቻላል። በእዚህ ሁሉ መሃል ግን መከራውን የሚያየው የዩክሬን ህዝብ ነው።ህዝቡ በአሁኑ የሩስያ ጥቃት የስደተኛው ቁጥር ከአንድ ሚልዮን በላይ ሆኗል። ስለሆነም ሰላም በቶሎ መምጣቱ እጅግ አስፈላጊ ነው።

ኢትዮጵያን እና መንግስትን የማገዝ ሃገራዊ ፋይዳው

ዓለም አቀፍ ሁኔታዎችም ሆነ ሃገራዊ ሁኔታው የሚያሳየው ኢትዮጵያን እና ለመጪው አምስት ዓመታት የተመረጠውን መንግስት ከማገዝ እና የሚስተካከለው እንዲስተካከል ከማገዝ ውጭ ምንም ዓይነት አፍራሽ አካሄድ ለኢትዮጵያ አይበጅም።ዓለም አቀፋዊ ሁኔታው በቶሎ ተለዋዋጭ እንደሆነ እና ይህም ሁኔታ እንደሚቀጥል ግልጥ እየሆነ ነው።የሩስያ ዩክሬንን መውረር መልዕክቱ ቀላል አይደለም። አንድ ሉዐላዊ ሃገር በሌላ ሃገር ተወረረ ማለት ነው።በእርግጥ ይህ ዛሬ የተጀመረ አይደለም።ከሁለተኛው ዓለም ጦርነት ማብቃት በኋላ በርካታ ወረራዎች ተደርገዋል።ይህም ሆኖ ግን እያንዳንዱ ወረራ የሚያሳየው የዓለም ህግ መጣሱን ነው። የዓለም ህግ መገለጫ ትልቁ ተቋም ደግሞ የተባበሩት መንግስታት ነው።በቀጣይም ሩስያን ተከትሎ ወረራዎች ሌሎች ሃገሮች በሌሎች ላይ ወረራ አያደርጉም ማለት አይደለም። በእዚህም የዓለም ትኩረት በዩክሬን ጉዳይ ላይ ስለሆነ ቶሎ ትኩረት አይስብም።

በመሆኑም በአፍሪካ ቀንድ በተለይ በኢትዮጵያ ያለው ሁኔታ ከፍተኛ ጥንቃቄ የሚፈልግበት ጊዜ ነው።በሩስያው ጉዳይ ቀዳሚ የስልታዊ ቦታ ትኩረት ያለው የአፍሪካ ቀንድ ላይ ነው።በያዝነው ሳምንት መጀመርያ ላይ የሰባቱ በኢንዱስትሪ የበለጠጉ ሃገሮች አምባሳደሮች ሱዳን፣ግብጽ እና ኢትዮጵያ የሩስያ ጦር ወደ ዩክሬን መግባትን እንዲቃወሙ የቀጥታ ጥያቄ ማቅረባቸውን የዲፕሎማሲ ምንጮች ተናግረዋል።ሱዳን ሩስያን ደግፋ ቆማለች።የሱዳን አዲሱ የወታደራዊ መንግስት ባለስልጣናት በያዝነው ሳምንትም ሞስኮ ጉብኝት ላይ ናቸው።ከእዚህ አልፈው የባህር በራችን ለሩስያ ክፍት ነውም ብለዋል። ኤርትራ በተባበሩት መንግስታት ጠቅላላ ስብሰባ ላይ ሩስያን አስመልከቶ ለተደረገው ስብሰባ ሩስያን ደግፋ ድምጿን ሰጥታለች። ትናንት በተባበሩት መንግስታት ስብሰባ ላይ ድምጽ ከመሰጠቱ በፊት የኤርትራው አምባሳደር ንግግር ሲያደርጉ የምዕራቡ ዓለም በሩስያ ላይም ተመሳሳይ እቀባ ማድረጉን ጭምር ፍትሃዊ አይድለም እያሉ ሲናገሩ የተባበሩት መንግስታት የቀጥታ ስርጭት ወደ ሌላ ጋዜጣዊ መግለጫ አዞረው።ይህም ሆኖ ኤርትራ ሩስያ ላይ የሚደረገውን ውሳኔ ተቃውማ ድምጿን ሰጥታለች።

የአፍሪካ ቀንድ ሃገሮች ፖለቲካ ወሳኝ ሃገር ኢትዮጵያ ነች።ከ110 ሚልዮን በላይ ህዝብ እና እጅግ ሰፊ የተፈጥሮ ሃብት ያላት ኢትዮጵያ የምትይዘው አቋም ወሳኝ ነው። እዚህ ላይ ኢትዮጵያ ከንጉሱ ከስልጣን መውረድ ጀምሮ የነበራት የዲፕሎማሲ ግንኙነት መዘባረቅ አሁንም እንዳይገጥማት እና ካለፈው ተምራ በጥንቃቄ እና በገለልተኝነት መጓዝ ያለባት ጊዜ አሁን ነው።በቀዝቃዛው ጦርነት ጊዜ አንዱ ውስጥ ጭልጥ ብሎ መግባት ያለውን ወጪ እና ኪሳራ ከኢትዮጵያ በላይ የሚያውቅ የለም።የኢትዮጵያ መንግስትም በዩክሬን ጉዳይ እየያዘው ያለው መንገድ ተገቢ እና ድካም ቢኖርበትም መጨረሻው ጥሩ እንደሚሆን መገመት ይቻላል።ኢትዮጵያ በተባበሩት መንግስት የትናንቱ ስብሰባ ላይ ኢትዮጵያ ድምጽ አልሰጠችም።በዛሬው ዕለትም ጠቅላይ ሚኒስትር ዐቢይ ያወጡት የሩስያ እና የዩክሬንን ጉዳይ አስመልክተው ያወጡት መግለጫ ላይ በእንግሊዝኛ ባወጡት መግለጫ ላይ ''...Ethiopia urge all parties to exercise restraint in the Ukraine crises'' ''ኢትዮጵያ በዩክሬን ቀውስ ውስጥ ተሳታፊ የሆኑ በሙሉ ከድርጊታቸው እንዲታቀቡ ታሳስባለች'' ነው ያሉት።

አሁን ወቅታዊውን የዓለምን ሁኔታ በሚገባ መረዳት ኢትዮጵያ በጥንቃቄ የምትሄድበት ልጆቿም ከአላስፈላጊ ንትርክ ወጥተው የኢትዮጵያን አንድነት የመጠበቅ ሃላፊነት የሁሉም የኢትዮጵያውያን ሃላፊነት መሆኑን በደንብ የመረዳቱ ፋይዳ ነው ጠቃሚው ጉዳይ።
ስለሆነም ኢትዮጵያን ለመደገፍ ማዕከላዊ መንግስት በተረጋጋ መልክ ስራውን እንዲሰራ ማገዝ ከዜጎች ከመቼውም ጊዜ በላይ አሁን አስፈላጊ ነው።መንግስት ስህተቶቹን እንዲያርም በባለቤትነት መገፋፋት እንጂ በህገወጥ መልክ የመንግስት ለውጥ ለሚያቀነቅኑ ዕድል መስጠት ኢትዮጵያን ለማጥፋት ያሰፈሰፉ እና የአሁኑን የዓለም ሁኔታ ለመጠቀም የሚፈልጉ ኃይሎች ኢትዮጵያን ለማጥቃት እንዳይሞክሩ ውስጣዊ መረጋጋት እጅግ አስፈላጊ ነው። በእርግጥ ከባዕዳን ጋር ሸርበው ኢትዮጵያን ለማጥፋት ከሚሸርበው ከሽብርተኛው ህወሃት ጋር መቼም መቼ የህግ ማስከበር ሥራ እንደሚቀጥል ይህም በአስገዳጅ ሁኔታ መሆኑን መረዳት ይቻላል።ይህም የተሻለ አማራጭ ካለው አብሮ የሚቀርብበት ሁኔታ ዝግ ሳይሆን ማለት ነው። ኢትዮጵያ በአሁኑ ተለዋዋጭ የዓለም ሁኔታ በጥበብ ካለፈችው ነጥራ የመውጣት ብቻ ሳይሆን የማደግ ዕድሏ አብሮ የቀረበበት ጊዜ ላይ ነን።ይህንን ግን መንግስት ብቻ ሳይሆን ህዝብም ሲገባው ነው ለውጥ ማምጣት የሚቻለው።

ለማጠቃለል የዩክሬን ሩስያ ግጭት ወደ ሰፊው የዓለም ግጭት የማምራት አደጋው በግልጥ ይታያል።ለእዚህ ማሳያው የምዕራቡ ዓለም በሩስያ ላይ የጫነው የእቀባ መጠን እና ስፋት ከኢኮኖሚ እቀባ ቀጥሎ ጦርነት እንደሚከተል ሆኖ የተያዘ አያያዝ ነው።ኢኮኖሚ ማድቀቅ እና ፕሮፓጋንዳ የሚከተለው ጦርነት ነው። የሩስያ እጅ የት ድረስ እንደሆነ አሁን ለማወቅ ከባድ ሆኗል።በሱዳን ወታደራዊ መፈንቅል ውስጥ የሩስያ እጅ አለበት የሚሉ የተሰሙት በቅርቡ ነው።አንዳንድ ግልጥ ያልሆኑ ጉዳዮች እንዳሉ አመላካች ነው።በየትኛውም መንገድ ግን ኢትዮጵያ የያዘችው የገለልተኛነት መንገድ (አስቸጋሪ ቢሆንም) በመጨረሻ ፍሬ ያፈራል።በእርግጥ በአንዳንድ ጉዳዮች እትዮጵያ ወደ አንዱ የምታደላበት ጉዳይ ሊፈጠር ይችላል።በቀዝቃዛው ጦርነት ጊዜ ህንድ አንድ ጥሩ የገለልተኛ ምሳሌ ነች።ገለልተኛ የሚለው ስም በቀዝቃዛው ጦርነት ጊዜም ወደ አንድ ጎራ የገቡ ሁሉ የገለልተኛ ሃገሮች ማኅበር ውስጥ ገብተው ነበር።በተግባር የነበሩት ጥቂት ናቸው።ኢትዮጵያን ግን አሁን ሁሉም ይፈልጓታል። ግብጽንም ሁሉም ይፈልጓታል።ኢትዮጵያውያን ያለውን መንግስት ስህተቶች አብረን በባለቤትነት እያረምን ለልማቷ ባለን አቅም ከሰራን እና ይህንን ዓይነት ፖለቲካዊ ከባቢያዊ ሁኔታ በሁሉም መስክ መፍጠር እስከቻልን ድረስ በእዚህ ሁሉ ውስጥ ኢትዮጵያ ነጥራ ትወጣለች።የመጨረሻው መጨረሻ ዓለም ወደ አሁኑ ዓይነት የጦርነት አደጋ ውስጥ ሲገባ ኢትዮጵያ የምጣኔ ሃብት መንገታገት እንደማንኛውም ሃገር አይገጥማትም ማለት አይደለም።የኢትዮጵያ ህዝብ ሃላፊነትም ስለሃገር ሲባል ይህንንም አብሮ መጋፈጥ ይጨምራል።ለእዚህ ደግሞ ጋዜጠኞች፣የሃይማኖት ተቋማት፣ነጋዴዎች ሁሉ ሃላፊነታቸውን ሲወጡ ነው።

==================/////==========